Ol Yangfala Oli Askem

?Mi Mi Wanem Kaen Man?

Taem Michael i luk Brad i stap kam, hem i wari long samting we bambae i kamaot. Hem i save finis wanem i stap long han blong Brad. Brad i talem long hem se: “!Ei Michael! !Yu traem samting ya!” Ale hem i openem han blong hem, mo Michael i luk wan sigaret we oli wokem long lif blong mariuana. Michael i no wantem tekem sigaret ya, be hem i fraet se Brad bambae i no glad long hem. Michael i talem wetem wan voes we i fraet, se: “?Ating wan narafala taem a?”

Taem Jessica i luk Brad i stap kam, hem i rere from samting we bambae i kamaot. Hem i save finis wanem i stap long han blong Brad. Brad i talem long hem se: “!Ei Jessica! !Yu traem samting ya!” Ale hem i openem han blong hem, mo Jessica i luk wan sigaret we oli wokem long lif blong mariuana. Jessica i talem wetem strong tingting se: “No tangkiu. Mi mi wantem laef longtaem, be blong laef mi mas pulum win. Brad, ?yu no save yet se sigaret i spolem helt blong man?”

LONG tufala stori ya antap, ?from wanem Jessica i stanap strong? From we hem i gat wan samting we Michael i no gat. ?Wanem samting ya? Jessica i save gud se hem i mas wanem kaen woman, mo hem i gat strong tingting long saed ya. Samting ya i givhan long hem blong i talem ‘no’ long olgeta we oli traem hem, mo blong i bos long laef blong hem, i bitim we i letem narafala i bos long hem. ?Yu yu save mekem wanem blong yu tu yu gat strong tingting? Yu traem ansa long ol kwestin ya.

1 ?WANEM SAMTING WE MI MI GUD LONG HEM?

?From wanem i impoten?: Sipos yu yu save ol samting we yu yu naf blong mekem mo yu save ol gudfala fasin blong yu, tingting blong yu bambae i strong mo yu no fraet.

Yu traem tingbaot: Evri man i gat gudhan blong mekem wan samting. Sam man oli gat gudhan blong katem mo droem pija, mo sam man oli save plei gud long miusik. Be sam narafala oli gud moa long spot. Raquel i gat gudhan blong riperem trak. a Hem i talem se: “Taem mi gat samwe long 15 yia, mi save finis se mi wantem kam wan mekanik.”

Samting we i hapen long wan man long Baebol: Aposol Pol i raetem se: “Maet mi no skul gud blong tok, be mi mi savegud ol stamba blong gud nius, mi no sot nating long saed ya.” (2 Korin 11:6) Pol i savegud Baebol, taswe hem i naf blong stanap strong taem ol narafala oli agensem hem. Hem i no letem nogud tingting blong olgeta i spolem strong tingting blong hem.—2 Korin 10:10; 11:5.

Yu jekem yu wan bakegen. Long spes daon, yu raetem wan samting we yu yu gat gudhan blong mekem.

․․․․․

Yu raetemdaon wan gudfala fasin we yu yu gat. (?Olsem wanem? ?Yu yu tingbaot ol narafala? ?Yu yu glad blong givim samting long narafala? ?Ol narafala  oli save trastem yu? ?Yu yu kam oltaem long stret taem?)

․․․․․

“Mi mi traem blong mekem se mi rere oltaem blong lesin long narafala. Sipos wan man i wantem toktok long mi long taem we mi mi bisi, mi lego samting we mi stap mekem blong mi save lesin long hem.”—Brianne.

Sipos i had blong yu yu luksave wan gudfala fasin blong yu, yu traem tingbaot wan nogud fasin we yu yu gat taem yu pikinini, be naoia yu jenisim fasin ya finis. Nao yu raetemdaon samting ya.—Yu lukluk bokis ya “Samting We Ol Narafala Yangfala Oli Talem.”

․․․․․

2 ?WANEM OL SLAK FASIN BLONG MI?

?From wanem i impoten?: Sipos yu wantem fasem gud wan samting, be rop we yu yusum i stat blong roten, rop ya bambae i brok isi nomo. Long sem fasin, yu yu save kam nogud kwiktaem sipos yu letem ol slak fasin blong yu oli winim yu.

Yu traem tingbaot: I no gat wan man we i stret gud olgeta. (Rom 3:23) Yumi evriwan i gat sam slak fasin we yumi wantem jenisim. Wan gel we nem blong hem Seija, i askem se: “?From wanem mi mi save kros long wan samting we i no impoten nating? !Wan smol samting nomo i save mekem mi mi kros, ale mi faerap wantaem!”

Samting we i hapen long wan man long Baebol: Pol i save ol slak fasin blong hem. Hem i raetem se: “Long tingting blong mi, mi glad tumas long Loa ya blong God. Be mi luk we rabis fasin ya, we i stap wok long laef blong mi, hem i narafala. Hem i agens long Loa ya, we long tingting blong mi, mi glad tumas long hem. Fasin ya i stap mekem mi, mi olsem slef blong fasin blong sin.”—Rom 7:22, 23.

Yu jekem yu wan bakegen. ?Wanem slak fasin blong yu we yu stap traehad oltaem blong winim?

․․․․․

“Taem mi wajem wan stori blong lav long muvi, tingting blong mi i kam nogud nao mi wantem faenem wan boe we mi save lavem hem. Taswe, naoia mi lukaot gud long wanem kaen muvi we mi mi wajem.”—Bridget.

3 ?WANEM OL SAMTING WE MI MI STAP TRAEHAD FROM?

?From wanem i impoten?: Taem yu traehad from sam samting long laef blong yu, yu save wanem rod we yu yu stap go long hem, mo yu no laef blong nating nomo. Mo tu, bambae yu no joen wetem ol man mo mekem ol samting we oli save blokem yu, blong yu no kasem samting we yu stap traehad from.

Yu traem tingbaot: ?Olsem wanem? ?Bambae yu yu go insaed long wan taksi nao yu talem long draeva blong i draevem trak i goraon long sem ples nomo go kasem we bensin i finis? !Nogat, i krangke blong mekem olsem, mo bambae yu westem mane blong yu nomo! Sipos i gat sam samting we yu yu traehad from, hemia bambae i givhan long yu blong yu no goraon long sem ples nomo long laef blong yu. Yu save rod we yu wantem go long hem, mo yu gat wan plan blong folem.

Samting we i hapen long wan man long Baebol: Pol i raetem se: ‘Fasin blong mi blong resis i no olbaot.’ (1 Korin 9:26, NW) Pol i no stap nating nomo, i wet se ol samting oli hapen long hem, nogat. Hem i stap traehad from sam samting, mo hem i yusum gud laef blong hem long rod ya.—Filipae 3:12-14.

 Yu jekem yu wan bakegen. Long spes daon, yu raetem tri samting we yu wantem traehad from long nekis yia.

1 ․․․․․

2 ․․․․․

3 ․․․․․

Naoia, yu jusum wan long ol trifala samting ya antap we yu ting se i impoten moa, mo yu raetemdaon wanem we yu yu save mekem naoia, blong yu kasem samting ya.

․․․․․

“Sipos mi mi no bisi, mi no mekem wan gudfala samting nating long laef blong mi. Taem yumi traehad from sam samting, hemia i gud, from we yumi stap mekem samting blong kasem olgeta.”—José.

4 ?WANEM BILIF BLONG MI?

?From wanem i impoten?: Sipos yu no bilif long wan samting, bambae yu yu olbaot nomo. Lised i stap jenisim kala blong hem folem ol samting we oli stap raonabaot long hem. Long sem fasin, bambae yu yu jenisim fasin blong yu, blong yu save kam sem mak long ol fren blong yu. Hemia wan saen we i soemaot se yu no save se yu yu wanem kaen man.

Yu traem tingbaot: Baebol i pulum ol Kristin blong oli “pruvum se ol samting we God i wantem oli gud, oli mekem man i glad, mo oli stret gud olgeta.” (Rom 12:2, NW) Taem bilif blong yu i pusum yu blong mekem samting, yu no gat tu fes, mo yu no wari long samting we ol narafala oli mekem.

Samting we i hapen long wan man long Baebol: Taem profet Daniel i yangfala, ‘tingting blong hem i strong’ se bambae hem i folem ol loa blong God, nating se hem i stap longwe long famle mo ol fren blong hem. (Daniel 1:8) Taem hem i mekem olsem, hem i no gat tu fes. Samting we Daniel i bilif long hem, hemia nao samting we hem i folem long laef blong hem.

Yu jekem yu wan bakegen. ?Wanem bilif blong yu? Yu traem tingbaot:

● ?Yu yu bilif long God? Sipos yes, ?from wanem? ?Wanem i pruvum long yu se God i stap?

● ?Yu yu bilif se sipos yu yu obei long ol loa blong God, samting ya bambae i mekem i gud long yu? Sipos yes, ?from wanem? Yu traem tingbaot loa blong God long saed blong nogud fasin blong man wetem woman. ?Wanem i soemaot long yu se taem yu obei long loa ya, yu glad moa i bitim we yu slip olbaot olsem ol fren blong yu?

Yu no mas hareap blong ansa long ol kwestin ya. I gud yu tingting gud long kwestin ya se: ‘?From wanem mi mi bilif long ol samting ya?’ Sipos yu mekem olsem, bambae yu glad moa blong holemstrong long bilif blong yu taem ol narafala oli agensem yu.—Ol Proveb 14:15; 1 Pita 3:15.

“Long skul, ol pikinini oli jikim olgeta we oli no gat strong tingting, mo oli fraet. Mi mi wantem se tingting blong mi i strong long saed blong bilif blong mi. Taswe, mi mi traehad blong faenemaot ol save we i pruvum se bilif blong mi i stret. Mi no talem long ol man se: ‘Mi no save mekem samting ya from we skul blong mi i blokem.’ Be mi ting se i moa gud blong talem se: ‘Mi no ting se hemia i stret.’ Hemia nao bilif blong mi.”—Danielle.

?Yu wantem se yu yu wanem kaen man? ?Yu wantem se yu olsem wan lif we i foldaon, nao win i karem i go olbaot, nating se wan smol win nomo? ?No yu wantem se yu yu olsem wan tri we i naf blong stanap strong long wan bigfala hariken? Yu save stap olsem tri ya sipos yu gat strong tingting se yu yu wanem kaen man. Mo samting ya bambae i givhan long yu blong yu ansa long kwestin ya, se ?Mi mi wanem kaen man?

[Futnot]

[Bokis/Foto blong pija long pej 27]

SAMTING WE OL NARAFALA YANGFALA OLI TALEM

“Taem mi stap gruap, mi lanem se sipos mi wantem mekem wan desisen, mi mas skelem gud olgeta samting, nomata se desisen ya i smol no i bigwan. Mo mi lanem se mi no mas joen long ol samting we God i no glad long hem.”

“Taem mi mi smol, mi ting se olgeta we oli no sem mak long mi, oli narakaen. Naoia, mi mi laekem samting ya se yumi evriwan i no sem mak, mo mi mi laekem blong save tingting blong ol narafala.”

[Ol foto]

Jeremiah

Jennifer

[Bokis/Foto blong pija long pej 28]

YU TRAEM ASKEM LONG PAPA MAMA BLONG YU

?Yutufala i luk se mi mi gat gudhan long wanem samting? ?Wanem slak fasin we yutufala i ting se mi mi mas traehad blong kam gud moa long hem? ?Yutufala i bin mekem wanem blong bilif blong yutufala i strong long ol loa blong God?

[Foto blong pija long pej 26]

(Lukluk niuspepa)

OL GUDFALA SAMTING

OL SLAK FASIN

SAMTING WE MI TRAEHAD FROM

BILIF

[Tok blong pija long pej 28]

Taem yu gat strong tingting se yu yu wanem kaen man, yu olsem wan tri we rus blong hem i holemtaet graon, nao i stanap strong long taem blong hariken