Fasin We i No Stret i Spolem Man

KOT blong Teksas long Amerika i jajem Michael se hem i mas panis from we hem i fosem wan gel blong slip wetem hem. Be long yia 2010, oli mekem sam tes we oli no gat rod blong mekem long ol yia bifo, nao oli faenemaot se Michael i no mekem rabis fasin ya. Nao oli letem hem i kamaot long kalabus. Michael i stap 27 yia long kalabus blong nating nomo. Biaen, ol polis oli faenemaot man we i mekem trabol ya. Be oli no save panisim hem from we loa i talem se i longtaem tumas we hem i mekem.

Plante man we oli mekem ol nogud samting oli no kasem panis. Wan niuspepa (The Telegraph) i talem se: ‘Long Inglan, long ten yia we i pas, polis i faenemaot stret haf nomo blong olgeta man we oli kilim narafala i ded. From samting ya, ol man oli ting se polis mo kot i no naf blong blokem trabol ya we man i kilim narafala.’

Long Ogis 2011, ol polis long Inglan oli traehad blong winim wan bigfala trabol bakegen. Long ol taon ya Birmingham, mo Liverpool, mo London, mo long sam narafala ples, ol grup blong man oli faet long rod. Ol grup ya oli kros krangke, oli laetem faea olbaot, oli smasem windo blong ol stoa mo oli stilim olting insaed. Trabol ya i spolem bisnes, mo haos, mo trak blong plante man, mo i mekem se samfala oli no moa gat rod blong winim mane. ?From wanem ol grup ya oli mekem trabol ya? Plante long olgeta oli wantem kasem samting we oli no gat raet blong kasem. Be sam oli harem se gavman i mekem i no stret long olgeta, ale oli wantem soemaot se oli kros tumas. Sam man we oli mekem ripot long trabol ya, oli talem se maet ol yangfala long grup ya oli kros from we oli harem se gavman i no givim samting we oli nidim. Mo maet oli gruap long ples we i pua, nao oli no gat janis blong mekem laef blong olgeta i kam gud.

Baebol i talemaot tok blong man ya Job, se: ‘Mi stap krae blong man i mekem i stret long mi, be i no gat man i harem mi.’ (Job 19:7) Long taem blong yumi, plante man oli stap krae blong kasem stret fasin, be i no gat man i harem. ?Olsem wanem? ?I gat wan man long wol we i gat paoa blong finisim ol fasin we oli no stret? Samfala oli ting se wan dei bambae i gat stret fasin long wol. ?Hemia i wan drim nomo? Sipos yumi wantem faenem ansa blong ol kwestin ya, fastaem yumi mas save from wanem man i mekem i no stret long narafala.