Baebol i Talem Wanem

?‘Trutok i Mekem Yu Yu Fri’ Long Wanem?

PLANTE milian man oli ting se oli fri. Be oli no fri nating. I olsem we oli stap kalabus. Plante oli bilif long gudlak mo badlak. Samfala oli fraet long dedman, mo oli mekem sam samting blong spirit blong dedman i no kam kros. Sam narafala oli no save wanem i hapen long man taem hem i ded, ale oli fraet tumas blong ded. Ol bilif ya oli mekem tingting blong man i trabol, i harem nogud, mo maet i spenem bigfala mane tu. ?Olsem wanem? ?Oli save kamfri long ol giaman bilif ya? !Yes! Tok blong Jisas antap i soemaot se trutok i save mekem man i fri. ?Wanem kaen trutok? ?Jisas i minim enikaen tok we i tru, no trutok blong Baebol nomo?

Jisas i talem wan klia ansa long kwestin ya, i se: “Sipos yufala i obei long ol tok ya blong mi, . . . bambae yufala i save trutok, mo trutok ya bambae i mekem yufala i fri man.” (Jon 8:31, 32) “Ol tok” blong Jisas mo ol tijing blong hem, oli stap long Baebol.

Taem Jisas i talem se “trutok ya bambae i mekem yufala i fri man,” hem i min se yumi fri long sin mo ded. Be taem yumi save trutok blong Baebol, yumi kam fri tu long ol giaman tingting blong gudlak mo badlak, yumi no moa fraet long dedman, mo yumi no moa fraet blong ded. ?Trutok i mekem yumi fri olsem wanem?

1. Giaman tingting blong gudlak mo badlak. Plante man oli ting se taem nasiko i krae, hemia wan saen blong gudlak no badlak. Sam narafala oli ting se sipos wan hoknaet i singaot long naet, hemia wan rabis saen. Samfala we oli gat wan impoten desisen blong mekem, oli makem gud ol smosmol saen we oli luk. Sipos no, oli go luk kleva blong i traem talemaot fiuja blong olgeta.

Trutok blong Baebol i mekem yumi fri: Baebol i tokbaot sam man blong God bifo we oli stat blong trastem gudlak mo badlak. Oli gohed gogo oli mekem wosip long ‘god ya Gad we oli talem se hem i masta blong fiuja, mo long god ya Meni we oli talem se hem i bos long ol samting we i stap kamtru long laef blong man.’ ?Wanem tingting blong Jehova God? Hem i talem se: “Yufala i stap mekem ol fasin we i nogud olgeta.” (Aesea 65:11, 12) God i gat sem tingting long ol man we oli go luk kleva blong faenemaot rod blong olgeta, i se: “Yufala i no folem fasin blong olgeta blong go luk ol kleva, . . . fasin ya i nogud we i nogud, Hae God i no laekem nating.”—Dutronome 18:10-12.

Yumi save kasem bigfala trabol sipos yumi trastem gudlak mo badlak mo wok blong ol kleva. Ol samting ya oli ‘giaman trik blong Setan.’ Jisas i talem se Setan i “stamba blong ol giaman toktok.” (Efesas 6:11; Jon 8:44) Sipos yu wantem kasem advaes long wan impoten bisnes, ?bambae yu askem long wan man blong giaman? !Nogat! Long sem fasin, i gud yu no joen long wan samting we i kamaot long “stamba blong ol giaman toktok.”

Sipos yumi wantem mekem ol waes desisen, yumi mas save gud ol rul blong Baebol mo plan blong God we bambae i kamtru. Ol Proveb 2:6 i talem se: “Hae God nomo i save mekem man i waes. Fasin blong save mo fasin blong haremsave, tufala i stap kamaot long hem nomo.”

2. Fraet long ol dedman: Plante man oli ting se spirit blong olfala blong olgeta we i ded finis, i save givhan long olgeta no i save spolem olgeta. Oli ting se oli mas givim sam presen long spirit ya, sipos no bambae i kros. Samfala oli mekem bigfala kaon blong pem ol sas presen mo mekem bigfala lafet blong dedman.

Trutok blong Baebol i mekem yumi fri: Taem Baebol i tokbaot ol dedman, hem i talem samting we i tru nomo. Jisas i talem se ol dedman oli “stap slip.” (Jon 11:11, 14) ?Tok ya i minim wanem? Ansa i stap long Prija 9:5: “Ol man we oli  laef yet oli save se bambae oli ded, be ol man we oli ded finis oli no moa save wan samting.” Yes, ol dedman oli no save wan samting, i olsem we oli slip ded. Oli no moa stap laef. From samting ya, oli no moa save givhan long yumi mo oli no save spolem yumi.

Be samfala oli talem se oli bin luk sam famle blong olgeta we oli ded finis. ?Olsem wanem? ?Oli rili luk famle blong olgeta? Bakegen, Baebol i givim ansa. Baebol i talem se bifo we bifo olgeta, sam enjel oli mekem stronghed. (Jud 6) Ol rabis enjel ya oli traehad blong trikim ol man. (Revelesen 12:9, 12) Wan trik we oli yusum, se oli tekem ol fasin blong man we i ded finis, nao oli wokbaot olbaot. Long fasin ya, oli leftemap giaman bilif ya se dedman i stap laef long wan narafala ples no long wan narafala bodi.

3. Fraet blong ded. Baebol i talem se ded i wan enemi blong yumi. (1 Korin 15:26) Taswe, i stret nomo we yumi fraet blong ded, mo we yumi traehad blong stap laef longtaem. Be i no nid blong fraet bitim mak.

Trutok blong Baebol i mekem yumi fri: Baebol i talem stret se dedman i stap olsem wanem, mo i talem tu se God i gat tingting blong mekem ol dedman oli laef bakegen. Jisas i talem se: “I gat taem i stap kam we ol dedman bambae oli harem voes blong mi, nao bambae oli aot long beregraon.”—Jon 5:28, 29; Ol Wok 24:15.

?Bambae oli “aot long beregraon” long wanem bodi? Jisas i soemaot ansa blong kwestin ya. Olgeta we hem i mekem olgeta oli laef bakegen oli kambak long bodi blong man mo woman, olsem oli gat fastaem. (Mak 5:35-42; Luk 7:11-17; Jon 11:43, 44) Hemia i stret long tok ya “laef bakegen” we prapa mining blong hem se “stanap.” Taem God i toktok long man blong hem Daniel we i olfala finis, hem i talem se: “Bambae yu yu ded, be bambae yu laef bakegen [“stanap bakegen,” NW] blong kasem pei blong yu long en blong wol.” (Daniel 12:13) !Daniel i mas harem gud long tok ya, we i save mekem se hem i no fraet blong ded!

Wan wok blong Jisas i blong “talemaot long ol man we oli stap long kalabus se, ‘Yufala i save go fri.’” Hemia i minim ol man we oli stap kalabus long ol giaman bilif. (Luk 4:18) Ol tijing blong Jisas oli stap long Baebol, taswe oli gohed yet blong mekem ol man oli fri. Mifala i glad tumas sipos trutok blong Baebol i mekem yu yu fri blong olwe.

?YU YU BIN TINGBAOT?

?Olsem wanem trutok blong Baebol i mekem yumi fri long

● bilif long gudlak mo badlak?—Aesea 8:19, 20; 65:11, 12.

● fraet long ol dedman?—Prija 9:5; Jon 11:11, 14.

● fraet blong ded?—Jon 5:28, 29; Ol Wok 24:15.

[Tok blong makem poen long pej 11]

Trutok i mekem man i fri long bilif long gudlak mo badlak, mo fraet long ol dedman, mo fraet blong ded