MAET bambae yu sapraes blong save se Frank long stori 2, hem i man blong Isabel long stori 1.

Frank i mekem sem mak long plante man we oli stap kilim woman blong olgeta. Taem hem mo woman blong hem, tufala i stap wetem ol narafala man no wetem papa mo mama blong woman blong hem, hem i mekem se hem i wan gudfala man. Be taem hem mo woman blong hem nomo i stap, fasin blong hem i nogud we i nogud, mo i stap kilim woman blong hem.

Plante man oli olsem Frank. Oli gruap long ol famle we papa i kilim mama. Ale taem oli kam bigwan, oli ting se oli mas kilim woman blong olgeta.  Mo oli ting se fasin ya i oraet nomo. Be fasin ya i no oraet nating. Hemia nao from wanem plante man oli no glad nating taem oli harem se wan man i kilim woman blong hem.

Nating se i olsem, i gat plante man we oli kilim woman blong olgeta. Long 2011, Vanuatu Women’s Center i mekem wan ripot we i soemaot se long 2061 woman, 51 pesen blong olgeta oli talem se man blong olgeta i stap kilim olgeta. Fasin ya blong man i kilim woman, i olsem wan sik we i stap kasem olgeta ples long wol. Hem i kasem ol man blong ol defdefren laen, wetem ol rijman mo ol puaman. Be plante woman oli no ripotem man blong olgeta, taswe trabol ya i bigwan moa i bitim wanem we ol ripot oli soemaot. *

Ripot we i kamaot from fasin blong kilim woman, i mekem ol kwestin ya oli kamaot: ?Wanem i mekem se wan man i save kasem mak ya we hem i kilim nogud woman blong hem? ?I gat rod blong givhan long ol man olsem?

Ol Witnes blong Jehova we oli wokem magasin ya, oli bilif se ol gudfala advaes blong Baebol oli save givhan long wan man blong i no moa kilim woman blong hem. ?Olsem wanem? ?I isi nomo blong wan man i lego fasin ya? No, i no isi. ?Be hem i naf blong jenisim fasin blong hem? !Yes hem i naf! Tijing blong Baebol i givhan finis long plante man blong oli sakemaot fasin ya blong kilim woman blong olgeta, nao oli kam ol man we oli kaen mo oli respektem woman blong olgeta. (Kolosi 3:8-10) Yu traem tingbaot stori blong Roy mo Valeri we mifala i askem sam kwestin long tufala.

?Fasin fren blong yutufala i olsem wanem long stat?

Valeri: Afta we ol famle oli kam blokem mi, long naet blong hem, Roy i givim blak ae long mi. Kil ya i stap wan ful wik. Biaen hem i talem se i sore we i sore, mo i promes se bambae i no moa mekem bakegen. Long ol yia afta we  mitufala i mared, hem i talem toktok ya plante taem afta we i kilim mi.

Roy: Eni samting nomo i save mekem mi mi kros. Sipos kakae i no rere long stret taem, saye, mi kros nao. Wan taem, mi yusum wan pistol blong wipim Valeri. Wan narafala taem, mi kilim hem strong tumas nao mi ting se hem i ded. Wan narafala taem bakegen, mi wantem mekem hem i fraet, ale mi putum wan naef long trot blong boe blong mitufala, mo mi talem se bambae mi kilim hem i ded.

Valeri: Mi mi fraet oltaem nomo. Samtaem mi mas ronwe long haos go kasem we kros blong Roy i godaon. Be samting we i mekem mi mi harem nogud moa, hemia ol rabis tok we hem i sakem long mi.

?Roy, i tru se stat bifo i kam, yu yu wan man we yu stap kros?

Roy: Yes, taem mi smol, mi mi stap kros finis. Taem mi stap gruap, oltaem nomo papa blong mi i kilim mama blong mi long fored blong mi. Taem hem i lego mama blong mi, Mama i go stap wetem wan narafala man. Be man ya tu i stap kilim hem. Mo tu, man ya i repem mi mo sista blong mi. Samting ya i mekem se hem i go long kalabus. Be mi save se i no stret blong mi yusum ol samting ya olsem eskius, blong mi kilim woman blong mi.

Valeri, nating se Roy i kilim yu, be yu no lego hem. ?From wanem?

Valeri: From we mi mi fraet. Mi stap tingting se, sipos mi lego hem, maet bambae hem i lukaotem mi ale i kilim mi mi ded, no i kilim i ded papa mo mama blong mi. Sipos mi ripotem hem, maet bambae hem i mekem i nogud moa long mi.

?Roy, wetaem yu stat blong jenisim fasin blong yu?

Roy: Woman blong mi i stat blong stadi Baebol wetem ol Witnes blong Jehova. Fastaem, mi mi jalus long ol niufala fren blong hem, mo mi ting se mi mas tekemaot hem long “krangke skul ya” blong sevem hem. Ale mi kam moa raf, mi kilim Valeri, mo mi mekem i nogud long ol Witnes tu. Be wan dei, boe blong mitufala, Daniel, we i gat fo yia blong hem, i kasem wan strong sik mo i stap tri wik long hospital. Long taem ya, ol Witnes oli mekem plante samting blong givhan long mifala. Oli lukaot long Desi, gel blong mitufala we i gat sikis yia blong hem. Wan Witnes i wok long fulnaet, afta i go stap wetem Daniel long fuldei, blong mekem se Valeri i save go slip smol. Mi mi bin mekem i nogud tumas long ol man ya, be naoia oli kaen we oli kaen long mifala. Samting ya i tajem hat blong mi bigwan. Mi luksave se ol man ya oli mekem  samting we ol tru Kristin oli mas mekem. Ale mi askem long olgeta sipos i oraet blong mi stadi Baebol wetem olgeta. Taem mi stap stadi Baebol, mi lanem fasin we wan man i mas mekem long woman blong hem, mo fasin we hem i no mas mekem. Mi sakemaot rabis fasin blong mi mo mi no moa kilim woman blong mi bakegen. Biaen, mi kam wan Witnes blong Jehova.

?Wanem ol advaes long Baebol we oli givhan long yu blong yu jenisim fasin blong yu?

Roy: I gat plante advaes. Long 1 Pita 3:7, Baebol i talem se mi mas “ona” long woman blong mi. Galesia 5:23 i talem se ol man oli mas “kwaet man” mo oli mas “blokem ol samting we olgeta nomo oli wantem.” Efesas 4:31 i soemaot se fasin blong “tok nogud” long narafala i nogud. Hibrus 4:13 i talem se “olgeta samting oli stap long klia ples nomo, stret long fes blong” God. God i luk fasin we mi stap mekem, nating se ol man raonabaot oli no luk. Mi lanem tu se mi mas jenisim ol fren blong mi, from we ‘ol fren we oli no stret, oli save spolem fasin’ blong mi. (1 Korin 15:33) Ol fren blong mi bifo oli pulum mi blong mi kilim woman blong mi. Oli talem se wan man i mas kilim woman blong hem, blong tijim hem.

?Naoia yutufala i harem olsem wanem long mared blong yutufala?

Valeri: Roy i kam Witnes blong Jehova bitim 25 yia finis. Stat long taem ya, hem i lavem mi mo i kaen long mi. Mo hem i lukaot gud long mi.

Roy: Fastaem mi bin spolem gud woman blong mi, mo hemia i no stret nating. Mi no save gobak biaen blong jenisim samting we mi mekem long famle blong mi. Be mi putum tingting blong mi i stap long promes we i stap long Aesea 65:17. Long taem ya, bambae mifala i no moa tingbaot ol rabis samting ya we oli hapen bifo.

?Wanem advaes yutufala i save talem long ol man mo woman we oli gat trabol ya long famle blong olgeta?

Roy: Sipos yu yu stap kilim woman blong yu no yu stap tok nogud long hem, yu mas luksave se yu yu nidim help, mo yu mas go lukaotem help. I gat plante samting we oli save halpem yu. Long saed blong mi, mi stadi Baebol wetem ol Witnes blong Jehova, mo mi joen plante wetem olgeta. Samting ya i givhan long mi blong mi lego rabis fasin ya blong kros mo faet.

Valeri: Yu no mas hareap blong skelem trabol blong yu wetem trabol blong ol narafala. Mo yu no mas folem advaes blong ol man we oli ting se oli save samting we i gud long yu. Yumi evriwan, mared blong yumi i no sem mak, be mi mi glad se mi no bin lego man blong mi, from we naoia mitufala i joen gud, mo hemia i wan blesing blong mitufala.

Baebol i talem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin.” (2 Timoti 3:16) Olsem stori blong Roy i soemaot, plante man we oli kilim woman blong olgeta, oli folem advaes blong Baebol mo oli naf blong jenisim tingting mo fasin blong olgeta.

I gat sam narafala samting bakegen we Baebol i talem blong givhan long mared blong yu. Sipos yu wantem save moa, i gud yu toktok wetem ol Witnes blong Jehova long ples blong yu, no yu go long Websaet ya www.mr1310.com.