BAEBOL I TALEM WANEM
Trutok Long Saed Blong God
?God i olsem wanem?
“God, hem i Spirit.” —Jon 4:24.
?BAEBOL I TALEM WANEM?
Baebol i tokbaot God se hem i spirit. (2 Korin 3:17, NW) Hem i hae moa long yumi mo hem i hae moa long ol samting we yumi luk. Fas Timoti 1:17, i tokbaot God se, hem i ‘King we rul blong hem i stap oltaem nomo, gogo i no save finis, mo hem i God we i no save ded samtaem, mo yumi no save luk hem.’ Baebol i talem tu se: “I no gat man we i luk God samtaem.”—1 Jon 4:12.
God we i mekem yumi, hem i hae moa long yumi. Taswe, yumi no naf blong kasem save se hem i olsem wanem. Long Aesea 40:18, i talem se: “?Sipos yumi wantem tokbaot God, bambae yumi save talem se hem i olsem hu? ?Sipos yumi wantem makem hem, bambae yumi save talem olsem wanem?” Taem yumi lukluk ol sta long skae, yumi luksave se God i gat bigfala paoa. Hemia i mekem se yumi wantem tumas blong presem hem.—Aesea 40:22, 26.
Nating se yumi no save luk God, be i gat sam spirit we oli stap long heven, oli luk hem mo oli toktok wetem hem. (1 King 22:21; Hibrus 1:7) Ol spirit ya hemia ol enjel. Jisas i talem se, olgeta ya “oli stap oltaem long fes blong Papa blong mi.”—Matiu 18:10.
?God i stap long evri ples?
“Taem yufala i prea bambae yufala i prea olsem. ‘Papa blong mifala. Yu yu stap long heven.’”—Matiu 6:9.
?BAEBOL I TALEM WANEM?
Baebol i no tijim se God i wan paoa we i stap long evri ples long semtaem nomo. Defren olgeta, long Matiu 6:9 mo 18:10, Jisas i soemaot se God i olsem wan “Papa” mo hem i ‘stap long hom blong hem long heven.’—1 King 8:43.
Klosap long en blong laef blong Jisas long wol ya, hem i talem se: “Mi mi aot long wol ya, mi gobak long Papa blong mi bakegen.” (Jon 16:28) Afta we hem i laef bakegen, hem i “go insaed long heven stret, mo naoia hem i stap stanap long fes blong God.”—Hibrus 9:24.
Hemia wan samting we i had blong kasem save long saed blong God. ?From wanem? Fas samting, hemia se nating we God i spirit be yumi naf blong kasem save long hem, mo yumi kam klosap long hem. (Jemes 4:8) Nambatu samting, hemia se trutok ya we yumi lanem, i blokem yumi blong yumi no mekem wosip long ol giaman god ya we ol man nomo oli wokem. Long 1 Jon 5:21 i talem se: “Ol pikinini blong mi. Yufala i mas lukaot gud blong yufala i no go mekem wosip long ol giaman god.”
?I minim wanem se God i mekem man, i olsem hem stret?
“Hem i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.” —Jenesis 1:27.
?BAEBOL I TALEM WANEM?
Yumi man yumi naf blong soemaot ol fasin blong God, olsem lav, stret fasin, mo waes. Mo Baebol i talem tu se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem.”—Efesas 5:1, 2.
God i mekem yumi wetem tingting ya we yumi naf blong luksave se wan samting i gud no i nogud. Mo hem i mekem we yumi naf blong soemaot se yumi lavem ol narafala man long plante defren rod. (1 Korin 13:4-7) Hem i mekem we yumi naf blong wokem ol niufala samting, yumi naf blong laekem ol naesfala samting, mo blong yumi respektem ol gudgudfala samting we oli stap raonabaot long yumi. Antap long samting ya, yumi naf blong kasem save long God, mo long tingting we hem i gat long yumi.—Matiu 5:3.
?Baebol i save givhan long yumi olsem wanem? Taem yumi lanem moa ol fasin blong God mo yumi folem long laef blong yumi, yumi stap mekem olsem we Jehova i wantem. Taem yumi mekem olsem, yumi glad long laef blong yumi, yumi gat pis long tingting blong yumi, mo yumi harem gud. (Aesea 48:17, 18) Yes, God i save se yumi gat sam gudfala fasin long hat blong yumi. From samting ya, hem i stap pulum ol man we hat blong olgeta i stret blong oli kam long hem. Mo hem i stap lidim olgeta long rod ya blong go kasem laef we i no save finis.—Jon 6:44; 17:3.
Maet Yu Laekem Hemia Tu
ANSA WE BAEBOL I GIVIM
?I Tru Se God i Wan Paoa Nomo?
Baebol i talem se God i wokem olgeta samting, ?be i tru se hem i kea long yumi?
ANSA WE BAEBOL I GIVIM
?God i Stap Long Evri Ples, Long Semtaem?
?Baebol i tijim se God i stap long evri ples? ?From wanem yu sua se hem i stap long wan stret ples, mo hem i save gud yu tu?
ANSA WE BAEBOL I GIVIM
?I Gat Wan Man We i Luk God Finis?
?Baebol i stap agensem hem wan taem i talem se “i no gat man we i luk God,” mo long nara ples, i talem se Moses i “luk God blong Isrel”?
