Wok Wetem Wajman

“!Masta! Oltaem mi mi stap waj long ples ya. Long dei mo long naet, mi mi no spel nating.”—AESEA 21:8.

1. ?Jeova hem wan i wan witnes blong wanem promes we oli nambawan?

 JEOVA hem i Man ya we i mekem olgeta Stamba Tingting blong hem oli kamtru. Stronghed enjel ya we i kam Devel Setan, i no save mekem wan samting nating blong blokem nambawan stamba tingting we Jeova i gat blong mekem nem blong Hem i tabu mo blong stanemap wan Kingdom rul we i gud tumas antap long wol ya we i kam wan paradaes. (Matiu 6:9, 10) Aninit long rul ya, ol man bambae oli kasem ol nambawan blesing. God ‘bambae i mekem we ded bambae i go lus olgeta. Bambae hem i ravemaot wota blong ae blong olgeta.’ Bambae ol man oli glad, oli joengud mo oli haremgud long pis mo oli gat plante samting long laef blong olgeta, gogo i no save finis. (Aesea 25:8; 65:17-25) !Jeova hem wan i givim witnes long ol nambawan promes ya!

2. ?Hu ya ol witnes we Jeova i stanemap long medel blong ol man?

² Be, Bigfala Man we i Wokem olgeta samting i gat ol man tu we oli olsem witnes blong hem. Long ol yia bifo Kraes, “ol witnes we kampani blong olgeta i bigfala tumas,” we faswan long olgeta hemia Ebel, oli stanap strong, nating se oli fesem plante trabol. Eksampel blong olgeta i gud tumas mo i leftemap tingting blong ol Kristin we oli stap tru long God tede. Be Jisas Kraes hem i nambawan eksampel blong wan witnes we i no fraet. (Hibrus 11:1–12:2, Nyutesteman Long Bislama) Eksampel, tingbaot, laswan witnes we hem i givim long fored blong Ponjes Paelet. Jisas i talemaot se: “Mi mi bon, mo mi kam long wol ya blong wan samting nomo, blong mi witnes long trutok.” (Jon 18:37 NW) I stat long 33 K.T. kam kasem yia ya 2000 K.T., ol Kristin we oli wok strong, oli folem eksampel blong Jisas mo wetem strong tingting oli gohed blong talemaot “ol bigbigfala wok ya we God i mekem.”—Ol Wok 2:11.

Ol Smol Grup Blong Skul Blong Babilon

3. ?Olsem wanem Setan i agensem witnes we ol man oli givim long saed blong Jeova mo ol samting we hem i wantem?

³ Long ol taosen yia we oli pas, bigfala enemi ya Devel Setan, i yusum fasin we i rabis olgeta blong traem daonem tok blong ol witnes blong God. “Bigfala algita ya . . . , snek ya blong bifo,” we i “stamba blong ol giaman toktok” i “stap giaman long olgeta man long wol.” Hem i stap gohed nomo long faet blong hem agensem olgeta we oli “obei long ol tok blong God,” samting ya i tru moa long ol las dei ya.—Jon 8:44; Revelesen 12:9, 17.

4. ?Bigfala Babilon i stat olsem wanem?

⁴ Samwe long 4,000 yia bifo, hemia afta we bigfala wota i ron long taem blong Noa, Setan i stanemap Nimrod, “wan strong man blong kilim anamol blong kakae, we i agensem Jeova.” (Jenesis 10:9, 10 NW) Bigfala taon blong Nimrod, we nem blong hem Babilon (Babel), i kam olsem stamba ples blong wosip long ol rabis spirit. Taem Jeova i mekem lanwis blong ol man we oli bildim bigfala haos long Babel i paspas, ol man oli seraot oli go stap olbaot long evri ples long wol, mo oli karem giaman skul blong olgeta i go wetem olgeta. Long rod ya, Babilon i kam stamba blong olgeta giaman skul blong wol, we buk blong Revelesen i kolem olgeta se Bigfala Babilon. Buk ya i talemaot jajmen we bambae i kasem olgeta skul ya.—Revelesen 17:5; 18:21.

Wan Nesen Blong Ol Witnes

5. ?Jeova i stanemap weswan nesen olsem witnes blong hem, be from wanem hem i letem nesen ya i go kalabus?

⁵ Klosap 500 yia afta long taem blong Nimrod, Jeova i mekem plan blong bambae ol pikinini blong man ya blong bilif, Ebraham, oli kam nesen blong Isrel, blong oli mekem wok olsem ol witnes blong Hem long wol. (Aesea 43:10, 12) Plante man blong nesen ya oli stap tru long Jeova mo oli mekem wok blong hem. Be, taem ol handred yia oli pas, ol giaman bilif blong ol nesen raonabaot, oli spolem Isrel. Nao ol man blong nesen ya we Jeova i mekem kontrak wetem olgeta, oli lego hem blong wosip long ol giaman god. Taswe, long 607 B.K.T., * ol ami blong Babilon, we King Nebukadnesa i lidim,  oli spolem Jerusalem mo tempel blong hem mo oli karem bighaf blong ol man Jiu oli go kalabus long Babilon.

6. ?Wajman we i wok olsem profet blong Jeova i talemaot wanem gudfala nius, mo wetaem samting ya i kamtru?

⁶ !Hemia wan taem we giaman skul i winim faet agensem tru wosip! Be, rul blong Babilon i stap blong smol taem nomo. Samwe long 200 yia bifo long taem ya, Jeova i givim oda se: “Yu go putum wan wajman, mo yu talem long hem, se hem i mas ripotem olgeta samting we hem i luk.” ?Wanem nius we wajman ya bambae i talemaot? “!Babilon i kam nogud olgeta! !Ol man oli winim hem finis! Ol aedol ya we ol man Babilon oli stap mekem wosip long olgeta, oli folfoldaon finis, oli brobrok olbaot long graon.” (Aesea 21:6, 9) Mo i tru tumas, long 539 B.K.T., tok ya we profet i talemaot hem i kamtru. Strongfala taon ya Babilon i foldaon, mo ol man blong God, we hem i mekem kontrak wetem olgeta, oli gobak long kantri blong olgeta i no long taem biaen.

7. (a) ?Ol man Jiu oli lanem wanem taem Jeova i stretem olgeta? (b) ?Afta we ol man Jiu oli kamaot long kalabus, wanem traem i mekem olgeta oli foldaon, mo wanem frut i kamaot from?

⁷ Ol man Jiu, we oli gobak long ples blong olgeta, oli lanem se oli mas lego wosip blong ol aedol mo ol rabis spirit. Be, long ol yia we oli kam biaen, oli foldaon long sam narafala trap. Hae save blong ol man Gris i kam olsem wan trap blong sam long olgeta. Sam narafala oli tinghae moa long ol kastom blong man bitim Tok blong God. Mo sam narafala bakegen, oli foldaon from fasin blong tinghae long kantri blong olgeta. (Mak 7:13; Ol Wok 5:36) Long taem we Jisas i kam long wol, nesen blong Isrel i lego trufala wosip bakegen. Wanwan man Isrel oli lesin long gud nius we Jisas i talemaot, be nesen ya fulwan, i sakemaot hem. From samting ya, God i sakemaot olgeta. (Jon 1:9-12; Ol Wok 2:36) God i no moa yusum Isrel olsem witnes blong hem, mo long yia 70 K.T., Jerusalem mo tempel blong hem oli lus bakegen, taem ami blong Rom i spolem olgeta.—Matiu 21:43.

8. ?Hu i kam olsem witnes blong Jeova, mo from wanem woning blong Pol i kam long stret taem?

⁸ Be long ol taem we oli pas, wan Kristin “Isrel blong God” i bon. Naoia hem i stap wok olsem witnes blong God long ol nesen. (Galesia 6:16) Kwiktaem nomo, Setan i wokem plan blong hem blong spolem niufala nesen ya we hem i wan nesen long saed blong spirit. Long en blong faswan handred yia, sam smosmol grup oli stat kamaot insaed long ol kongregesen. (Revelesen 2:6, 14, 20) Pol i givim woning long stret taem se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.”—Kolosi 2:8.

9. ?Olsem woning we Pol i givim, wanem samting i hapen blong mekem se Krisendom i stanap?

⁹ Nao, sloslou, sam tijing oli mekem skul blong ol man we oli talem se oli Kristin, i kam doti. Long ol tijing ya i gat hae save blong ol man Gris, bilif blong skul blong ol man Babilon, mo biaen, i gat “waes” blong man, olsem tijing blong evolusen mo ol hae save we oli agensem Baebol. I olsem tok we Pol i bin talem se: “Mi mi save finis, se bambae, taem mi mi aot long yufala, olgeta ya we oli olsem wael dog, bambae oli kam long yufala, mo bambae oli ronem yufala ol man blong Jisas, olsem we yufala i sipsip nomo. Yes, i gat taem i stap kam, we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.” (Ol Wok 20:29, 30) Risal we i kamaot from fasin ya blong lego trufala bilif, hemia se Krisendom * i stat.

10. ?Wanem sam samting we oli soemaot se i no olgeta man evriwan we oli joen long rabis wosip blong Krisendom?

¹⁰ Olgeta we oli ona fulwan long klin wosip oli  mas ‘faet strong blong holem trutok ya we oli bilif long hem finis. Hemia trutok ya we God i givim wan taem nomo long ol man blong hem we i no moa save givim bakegen.’ (Jud 3) ?Be olsem wanem nao, bambae wok blong givim witnes long saed blong klin wosip mo long saed blong Jeova, i lus long wol? Nogat. Taem yumi kam klosap moa long taem ya we bambae Setan, we hem i man blong agens, i lus wetem olgeta wok blong hem, i kam klia se i no olgeta man evriwan we oli stap joen long giaman wosip blong Krisendom. Long en blong ol yia 1800, long Pittsburgh, Pennsylvania, Yunaeted Stet, wan grup blong ol trufala Baebol studen i stanap mo olgeta ya oli kam olsem stamba blong kampani ya we oli stap mekem wok olsem Witnes blong God tede. Ol Kristin ya oli pulum tingting blong ol man i go long ol pruf blong Baebol we oli soemaot se en blong rabis wol ya i klosap. Stret olsem profet tok blong Baebol i soem, “en” blong wol ya i stat long 1914 long taem blong faswan bigfala faet blong wol. (Matiu 24:3, 7) I gat ol strongfala pruf blong soem se afta long yia ya, God i sakemaot Setan mo ol rabis enjel blong hem, long heven. Ol trabol we man i kasem long ol yia 1900 oli soemaot klia se Setan i wok strong. Mo tu, ol yia ya oli pruvum se saen blong makem we Jisas i stap finis olsem King long Kingdom blong Heven, i stap kamtru.—Matiu, japta 24 mo 25; Mak, japta 13; Luk, japta 21; Revelesen 12:10, 12.

11. ?Setan i traehad blong mekem wanem, be olsem wanem traem blong hem i foldaon?

¹¹ Long Jun 1918, Setan i traehad blong spolem ol Baebol studen, we long taem ya oli stat finis blong prij long sam narafala kantri. Hem i traehad tu blong spolem Watch Tower Bible and Tract Society, we hem i kampani blong sosaeti we loa i agri long hem. Olgeta we oli gat impoten wok blong mekem insaed long sosaeti ya, oli go long kalabus from giaman tok ya se oli stap agensem gavman. Long faswan handred yia, ol man oli jajem Jisas from wan giaman tok we i sem mak. (Luk 23:2) Be long 1919, olgeta we oli wok long Sosaeti oli gofri bakegen, mekem se oli save gohed long minista wok blong olgeta. Samtaem biaen, kot i talem se olgeta ya oli no gat fol.

Wan Wajman We i Blong “Lukaotgud”

12. ?Hu ya kampani we Jeova i yusum tede olsem wajman, no “man blong lukluk,” mo wanem tingting we olgeta ya oli bin soemaot?

¹² Long stat blong “taem blong en,” Jeova i yusum wan wajman bakegen. Wajman ya i mas givim woning long ol man se ol samting we oli stap hapen oli laenap wetem ol stamba tingting blong Jeova. (Daniel 12:4; 2 Timoti 3:1) Kam kasem taem blong yumi, grup we i olsem wajman ya—ol tabu Kristin, Isrel blong God—oli mekem wok ya stret olsem profet Aesea i talemaot long saed blong wajman. Hem i se: “Hem i mas luklukgud long olgeta. Nao mi harem we wajman i singaot, i talem se, ‘!Masta! Oltaem mi mi stap waj long ples ya. Long dei mo long naet, mi mi no spel nating.’” (Aesea 21:7, 8) !Hemia wan wajman we i rili wok strong long wok blong hem!

13. (a) ?Wanem mesej we wajman blong Jeova i bin talemaot? (b) ?From wanem yumi save talem se Bigfala Babilon i foldaon?

¹³ ?Wajman ya i luk wanem? Wajman blong Jeova, hemia kampani ya we i mekem wok blong witnes, i talemaot bakegen se: “!Babilon i kam nogud olgeta! . . . Ol aedol ya we ol man Babilon oli stap mekem wosip long olgeta, oli folfoldaon finis, oli brobrok olbaot long graon.” (Aesea 21:9) Afta long Faswan Bigfala Faet blong Wol, Bigfala Babilon nao, we i minim olgeta giaman skul long wol, i lusum paoa blong hem. (Revelesen 14:8; Jeremaea 50:1-3) !Yumi no sapraes se bigfala faet ya, i stat insaed long Krisendom! Ol lida blong skul long ol kantri we oli joen long faet ya, oli pulum ol beswan yangfala blong olgeta blong joen long faet ya. !Hemia wan bigfala sem long olgeta ya! Long 1919, Bigfala Babilon i no save blokem ol Baebol Studen, hemia nem blong ol Witnes blong Jeova long taem ya, blong lego fasin ya blong stap slak long wok blong olgeta. Oli no naf blong blokem olgeta ya blong statem bigfala wok ya blong prij long ful wol. Wok ya i stap gohed kam kasem naoia.(Matiu 24:14) Hemia wan saen we i soemaot se Bigfala Babilon i foldaon. Mo samting ya i sem mak long taem we ol man Isrel oli fri long Babilon, long ol yia sikis handred B.K.T, from we fasin fri blong olgeta i pruvum se Babilon blong bifo i foldaon.

14. ?Wanem magasin we wajman blong Jeova i yusum bigwan, mo olsem wanem Jeova i blesem wok blong yusum magasin ya?

¹⁴ Grup ya we i olsem wajman ya, i mekem wok blong hem oltaem wetem strong tingting mo filing blong mekem samting we i stret. Long Julae 1879, ol Baebol Studen oli stat blong prentem magasin ya, we long taem ya oli kolem Zion’s Watch Tower and Herald of Christ’s Presence. Evri kopi we oli kamaot stat long 1879 kasem Desemba 15, 1938, oli karem ol tok ya long faswan pej blong olgeta  se: “‘Wajman, ?Naet Klosap i Finis?’—Aesea 21:11.” * I bitim 120 yia nao, Wajtaoa i stap gohed yet blong wajem ol samting we oli stap hapen long wol mo luk olsem wanem ol samting ya oli laenap wetem ol profet tok blong Baebol. (2 Timoti 3:1-5, 13) Grup ya we i olsem wajman blong God mo “ol narafala sipsip” we oli wok wetem olgeta, oli yusum magasin ya bigwan. Tru long magasin ya oli talemaot strong long ol man se i no longtaem Hae rul blong Jeova God bambae i win tru long Kingdom blong Kraes. (Jon 10:16) ?Jeova i blesem wok blong magasin ya we i olsem witnes blong hem? I stat long faswan Wajtaoa, we oli bin prentem 6,000 kopi blong hem long 1879, namba ya i kam antap bitim 22,000,000 kopi long 132 lanwis we oli stap seremaot long ful wol—121 blong ol lanwis ya oli stap kamaot long sem taem. !Long olgeta magasin blong skul we man i seremaot long wol, i stret nomo we Wajtaoa nao i goaot moa, from we hem i stap leftemap nem blong trufala God, Jeova!

Kam Klin Sloslou

15. ?Olsem wanem trufala wosip i kam klin sloslou, i stat bifo long 1914 finis?

¹⁵ Samwe long 40 yia bifo long taem we Kraes i statem rul blong hem long heven long 1914, ol Baebol Studen oli kam fri long plante tijing blong Krisendom. Long ol tijing ya we oli no kamaot long Baebol, i gat baptaes blong ol bebi, sol we i no save ded samtaem, pegatri, helfaea, mo God we i olsem wan Triniti. Be blong sakemaot olgeta rong tingting i nidim moa taem. Eksampel, long ol yia 1920, plante long ol Baebol studen oli stap werem wan baj long klos blong olgeta we i gat pija blong wan kros mo hat blong king long hem. Mo tu oli stap mekem lafet blong Krismas mo sam narafala hiten lafet bakegen. Be, blong mekem wosip i klin, oli mas sakemaot evri samting we i joen wetem wosip blong ol aedol. Tok blong God, Baebol nomo, i mas stap olsem stamba blong bilif mo fasin blong laef blong wan Kristin. (Aesea 8:19, 20; Rom 15:4) I rong blong ademap sam samting long Tok blong God no blong karemaot eni samting we i stap long hem.—Dutronome 4:2; Revelesen 22:18, 19.

16, 17. (a) ?Wanem rong tingting we grup we i olsem wajman i bin gat blong sam yia? (b)?Wanem stret mining blong “olta” mo “bigfala ston” long “Ijip”?

¹⁶ I gat wan eksampel blong makem se rul ya i impoten tumas. Long 1886, C.T. Russell i raetem wan buk we oli kolem The Divine Plan of the Ages. Insaed long buk ya i gat wan pija we i soem olsem wanem ol defren yia long histri blong man oli laenap wetem Bigfala Piramid blong Ijip. Oli bin tingting se piramid ya, we Fero Khufu i bildim, hem i bigfala ston ya we Aesea 19:19, 20 i tokbaot se: “Long taem ya, bambae i gat wan olta blong Hae God i stap long kantri ya, mo long mak blong graon blong kantri ya wetem graon blong kantri blong yumi, bambae oli stanemap wan bigfala ston, we taem oli stanemap, bambae oli prea long hem long nem blong Hae God, blong mekem i tabu, i blong hem. Bambae tufala samting ya i wan saen blong soemaot we Hae God i stap long kantri ya [Ijip].” ?Olsem wanem oli save ting se piramid ya i laenap wetem tok blong Baebol? Wan eksampel, long tingting blong olgeta long taem ya, longfala blong sam rum we oli stap insaed long Bigfala Piramid ya oli soemaot wetaem “bigfala trabol” we Matiu 24:21 i tokbaot, bambae i stat. !Sam Baebol Studen oli spenem fulap taem blong faenemaot saes blong ol defren haf blong piramid ya blong kasem save long ol samting, olsem dei we bambae oli go antap long heven!

¹⁷ Blong sam yia, ol Baebol Studen oli tinghae long Bigfala Piramid ya we oli talem se i olsem wan Baebol long Ston. Be Wajtaoa blong Novemba 15 mo blong Desemba 1, 1928, (long Inglis) oli soemaot klia se Jeova i no nidim wan ston we ol hiten fero oli bildim blong pruvum se witnes we Baebol i givim i tru. Antap long samting ya, insaed long piramid ya i gat fulap saen blong talemaot fiuja tru long ol sta, we hemia wok blong ol rabis spirit. Ol Baebol Studen oli luksave se profet tok blong  Aesea i mas gat wan mining long saed blong spirit. Olsem long Revelesen 11:8, “Ijip” i minim wol blong Setan. “Olta blong Hae God” i mekem yumi tingbaot ol sakrefaes we God i glad long olgeta, we ol tabu Kristin oli mekem taem oli stap olsem ol strenja long wol ya. (Rom 12:1; Hibrus 13:15, 16) Bigfala ston we i stap long “mak blong graon blong kantri ya [Ijip]” i minim kongregesen blong ol tabu Kristin. Kongregesen ya i olsem ‘bigfala pos blong mekem trutok i stap strong, mo i sapotem trutok’ mo i stanap olsem wan witnes long “Ijip,” wol ya we bambae i no longtaem oli mas aot long hem.—1 Timoti 3:15, NW.

18. (a) ?Olsem wanem Jeova i gohed blong givim klia save long ol trufala Baebol Studen? (b) Sipos wan Kristin i faenem se i had blong kasem save long wan niufala mining blong wan vas long Baebol, ?i waes blong hem i gat wanem tingting?

¹⁸ Taem ol yia oli pas, Jeova i gohed blong mekem trutok i kam klia, mo hem i mekem yumi kasem save moa long saed blong profet tok blong hem. (Ol Proveb 4:18) Long ol yia we oli jes pas, tingting blong yumi i harem gud from we yumi lukluk bakegen mo kasem save dip moa long ol samting olsem, mining blong ol rabis man we oli laef naoia we bambae oli no save lus evriwan gogo en i kam, parabol blong ol sipsip mo ol nani, rabis samting ya mo wetaem hem i stanap long wan tabu ples, niufala kontrak, taem we bodi blong Jisas i jenis, mo vison blong tempel long buk blong Esikel. Samtaem maet i no isi blong kasem save long ol niufala save ya, be long stret taem blong hem bambae risen blong ol samting ya i kam klia. Sipos wan Kristin i no kasem save fulwan long wan niufala tingting long saed blong wan vas, i gud hem i gat tingting daon mo hem i talem bakegen ol tok blong profet Maeka we i se: “Bambae mi stap wet long hem [God], from we hem nao bambae i kam sevem mi.”—Maeka 7:7.

19. ?Olsem wanem ol tabu Kristin we oli stap yet long wol mo ol narafala sipsip we oli kampani wetem olgeta, oli soem strong tingting long taem blong las dei?

¹⁹ Tingbaot wajman ya, we i “singaot, i talem se: ‘!Masta! Oltaem mi stap waj long ples ya. Long dei mo long naet, mi mi no spel nating.’” (Aesea 21:8) Olgeta tabu Kristin we oli stap yet long wol,  oli soem se oli no fraet blong tok agens long fasin blong ol giaman skul mo blong soem rod long ol man blong kam fri. (Revelesen 18:2-5) Oli wok olsem “slef we i stret mo waes,” blong givim ol Baebol, magasin, mo ol narafala buk long plante defren lanwis—“kakae long stret taem blong hem.” (Matiu 24:45 NW.) Oli lidim wok blong hivimap “bigfala hip blong ol man, we . . . oli kamaot long olgeta kala, mo long olgeta kantri, mo long olgeta laen, mo long olgeta lanwis.” Olgeta ya tu oli kam klin tru long blad blong Jisas we i olsem ransom, mo oli soemaot se oli no fraet blong mekem wosip long God “long dei mo long naet.” (Revelesen 7:9, 14, 15) Long yia we i pas, ?wanem frut i kamaot from wok blong ol tabu Witnes blong Jeova we oli laef yet long wol, mo ol fren blong olgeta, bigfala kampani blong ol man? Bambae nekis stadi blong yumi i tokbaot samting ya.

[Ol futnot]

?Yu Yu Tingbaot?

• ?Hu ya ol witnes we Jeova i bin stanemap long ol yia we oli pas?

• ?Bigfala Babilon i stat olsem wanem?

• Long ol yia 607 B.K.T. mo bakegen long 70 K.T., ?from wanem Jeova i letem ol man oli spolem Jerusalem, bigfala taon blong nesen ya we i olsem witnes blong hem?

• ?Wanem tingting we grup we i wok olsem wajman blong Jeova mo ol fren blong olgeta oli soemaot?

[Kwestin]

[Tok blong pija long pej 7]

“!Masta! Oltaem mi mi stap waj long ples ya”

[Tok blong pija long pej 10]

Grup we i wok olsem wajman blong Jeova i tinghevi long wok we oli stap mekem