Ol Loa Blong God Oli Blong Mekem i Gud Long Yumi

“Mi mi laekem Loa blong yu tumas.”—OL SAM 119:97.

1. ?Wanem bigfala tingting we ol man oli gat long fasin blong obei long ol loa blong God?

 I NO gat plante man tede we oli obei long ol loa blong God. Oli no luksave from wanem oli mas obei mo mekem wok blong wan haeman we oli no save luk hem. Tingting blong ol man tede, i jenis bigwan. Oli bilif se samting we yu yu ting se i stret, i stret we yu folem, mo narafala man i no save talem wan samting from. Oli no luksave wetaem wan samting i stret mo wetaem wan samting i no stret. Mo i gat plante samting we oli no sua se i gud no i nogud. (Ol Proveb 17:15; Aesea 5:20) Wan stadi we oli mekem i no longtaem i soemaot tingting we naoia i kam antap long plante kantri we skul i no moa impoten long tingting blong ol man. Stadi ya i soemaot se “plante man Amerika oli wantem se olgeta nomo bambae oli jusum wanem samting we i stret, i gud mo i save mekem olgeta oli haremgud long laef blong olgeta.” Oli no wantem “wan God we i bos long olgeta. Oli no wantem ol rul we oli strong. Oli no wantem ol bos we oli talem long olgeta wanem we i stret blong mekem, no narafala samting olsem.” Wan man we i stadi long fasin blong laef blong man, i makem se tede “ol man oli bilif se wanwan man nomo oli mas makemaot wanem we oli ting se hemia nao laef we i stret mo i klin.” Hem i gohed i se: “Sipos wan haeman i wantem bos long ol man, hem i mas jenisim mo stretem ol loa blong hem blong mekem oli laenap wetem wanem we ol man ya oli laekem.”

2. ?Olsem wanem faswan taem we Baebol i tokbaot loa i soemaot se hemia rod blong mekem we God i agri long yumi mo i blesem yumi?

² From we plante man oli no moa tinghae long ol loa blong Jeova, i impoten blong meksua se yumi wan yumi stap bilif yet se ol rul blong God oli rili save mekem i gud long yumi. Blong mekem olsem, i gud yumi tingbaot faswan taem ya we Baebol i tokbaot loa. Long Jenesis 26:5, yumi ridim ol tok ya blong God se: “[Ebraham] i stap obei long mi, i stap holem ol loa blong mi mo ol tok blong mi.” Long taem ya, Jeova i no raetemdaon loa blong hem yet, hem i mekem samting ya longtaem biaen nomo, long taem blong ol smol bubu blong Ebraham. ?Wanem blesing we God i givim long Ebraham from we hem i obei long ol loa blong Hem? Jeova God i mekem promes ya se: “From laen blong yu, olgeta nesen long wol bambae oli blesem olgeta nomo.” (Jenesis 22:18, NW ) Taswe i klia se, God i save blesem mo agri long wan man, taem man ya i obei long loa blong Hem.

3. (a) ?Wanem filing we wan man blong raetem Sam i gat long loa blong Jeova? (b) ?Wanem ol kwestin we yumi mas tingbaot?

³ Wan man blong raetem ol Sam—we maet hem i pikinini blong king, we biaen i mas tekem ples blong king—i talemaot filing blong hem long saed blong loa we yumi no stap harem plante taem. !Hem i talemaot long God se: “Mi mi laekem Loa blong yu tumas!” (Ol Sam 119:97) Be toktok ya i no kamaot from ol filing nomo we oli kam antap. Hem i wan tok we i kamaot from we man ya i laekem tumas blong mekem ol samting we God i wantem olsem we i stap long loa blong hem. Jisas Kraes, Pikinini blong God we i stretgud olgeta, i gat semfala tingting olsemia. Wan profet tok i talemaot wanem tingting we bambae Jisas i gat, i se: “God blong mi. Mi ya, mi kam. . . . Mi mi wantem tumas blong mekem ol samting we yu yu wantem. Oltaem mi mi holem [loa] blong yu long tingting blong mi.” (Ol Sam 40:8; Hibrus 10:9) ?Olsem wanem long yumi? ?Yumi glad blong mekem ol samting olsem we God i wantem?  ?Yumi rili bilif se ol loa blong Jeova oli save givhan long yumi mo mekem i gud long yumi? ?Yumi tinghae long fasin blong obei long ol loa blong God taem yumi mekem wosip, taem yumi gohed long laef evri dei, taem yumi tekem ol disisen, mo taem yumi joen wetem ol narafala? Blong laekem loa blong God, i gud blong kasem save fastaem se from wanem God i gat raet blong wokem ol loa mo talem long yumi blong folem olgeta.

Jeova i Gat Raet Blong Givim Loa

4. ?From wanem Jeova i gat raet, bitim ol narafala man, blong givim loa?

⁴ Jeova i wokem olgeta samting, taswe hem i gat raet blong givim loa long yumi i bitim eni man long heven mo wol. (Revelesen 4:11) Profet Aesea i talem se: “Jeova i givim loa long yumi.” (Aesea 33:22, NW ) Hem nao i stanemap ol loa we oli bos long ol laef samting mo ol samting we oli no gat laef, hemia long heven mo long wol. (Job 38:4-38; 39:1-12; Ol Sam 104:5-19) God i wokem man, taswe man i stap aninit long ol loa we Jeova i putum long saed blong laef blong hem mo bodi blong hem. Mo nating se man i fri blong jusum samting we hem i wantem, mo i naf blong tingting hem wan, hem i save hapi nomo sipos hem i obei long ol loa blong God long saed blong stret fasin mo wosip.—Rom 12:1; 1 Korin 2:14-16.

5. ?Olsem wanem rul blong Galesia 6:7 i kamtru long saed blong ol loa blong God?

⁵ Yumi save finis se yumi no save brekem ol loa we Jeova i putum long saed blong laef mo bodi blong yumi. (Jeremaea 33:20, 21) Sipos wan man i go agensem ol loa ya, olsem loa blong graviti, * bambae hem i karekil wantaem nomo. Long sem fasin, man i no save sakem ol loa we God i putum long saed blong stret fasin, mo i no save tingting se sipos hem i bitim no brekem ol loa ya bambae hem i fri long panis. Nogat. Man we i brekem loa blong stret fasin bambae i kakae frut blong hem, nating se frut ya i no kamaot wantaem nomo olsem taem man i brekem ol loa long saed blong laef. “I no gat man i save giaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae.”—Galesia 6:7; 1 Timoti 5:24.

Loa Blong Jeova i Kavremap Wanem Samting

6. ?Ol loa blong God oli kavremap wanem samting?

⁶ Wan nambawan eksampol long saed blong loa we i kamaot long God, hemia Loa blong Moses. (Rom 7:12) Biaen, Jeova God i karemaot Loa blong Moses mo i putum “loa blong Kraes” long ples blong hem. * (Galesia 6:2; 1 Korin 9:21) Yumi ol Kristin, yumi stap aninit long stret ‘loa ya we i mekem man i fri.’ Yumi kasem save se God i no lidim yumi long sam haf blong laef nomo, olsem bilif mo ol lafet we yumi mas mekem long wosip blong yumi. Ol rul blong hem oli kavremap olgeta haf blong laef blong yumi, olsem laef insaed long famle, ol wok blong mekem bisnes, fasin we man i mas mekem long woman, fasin we ol Kristin oli mas soemaot long olgeta wanwan, mo olsem wanem blong joen long trufala wosip.—Jemes 1:25, 27.

7. Givim sam eksampol blong ol loa blong God we oli impoten.

⁷ Tingbaot wan eksampol. Baebol i talem se: “Ol man we oli mekem nogud long saed blong seks, mo ol man we oli stap prea long ol narafala god, mo ol man we oli stilim woman blong narafala man, mo ol woman we oli stilim man blong narafala woman, mo ol man we oli gat fasin blong woman, mo ol man we oli stap slip wetem man, mo ol stil man, mo olgeta we oli griri, mo ol man blong drong, mo ol man we oli stap spolem nem blong narafala man, mo ol man we oli stap mekem kruked bisnes blong stilim mane, olgeta man ya bambae oli no save kasem kingdom blong God.” (1 Korin 6:9, 10, NW ) Yes, i no stret blong talem se fasin blong mekem nogud long saed blong seks mo stilim woman blong narafala man oli “wan pleplei nomo blong harem gud.” I nogud blong ting se fasin blong man we i slip wetem man mo woman wetem woman, hem i wan “narafala fasin blong laef” nomo. Nogat. Ol fasin ya oli agensem ol loa blong Jeova. Fasin blong stil, giaman, mo spolem nem blong narafala, olgeta fasin ya tu oli agensem loa blong God. (Ol Sam 101:5; Kolosi 3:9; 1 Pita 4:15) Jemes i talem se fasin blong tok flas hem i rong, mo Pol i givim advaes se yumi no mas talem ol tok we i save mekem man i harem nogud mo ol tok plei we i nogud. (Efesas 5:4; Jemes 4:16) Long tingting blong ol Kristin, olgeta rul ya blong stret fasin oli haf blong loa blong God we i stret gud olgeta.—Ol Sam 19:7.

8. (a) ?Ol loa blong Jeova oli olsem wanem? (b) ?Wanem bigfala tingting we i stap biaen long Hibru wod ya we yumi tanem i kam “loa”?

⁸ Ol bigbigfala loa we oli stap long Tok blong Jeova oli soemaot se loa blong hem i no wan lis blong ol toktok nomo we man i mas folem sipos i no wantem kasem panis, nogat. Ol loa ya oli olsem wan fandesen we  man i save stanap long hem blong kasem wan laef we i skelgud mo i karem gudfala frut. Ol gudfala loa ya oli save karem blesing i kam long evri haf blong laef blong hem. Loa blong God i mekem i gud long man, i leftemap ol gudfala fasin, mo i tijim man. (Ol Sam 119:72) Tok ya we man blong raetem Sam i yusum, we yumi tanem i kam “loa,” long lanwis Hibru hem i toh·rahʹ. Wan man we i gat skolasip long saed blong Baebol i talem se: “Wod ya i kamaot long wan veb we i minim samting we i soem rod, i lidim man, i givhan long man blong kasem wan mak, no i tekem man i go fored. Taswe wod ya i save . . . minim wan rul we i lidim laef blong yumi.” Long tingting blong man ya blong raetem Sam, loa ya hem i wan presen we God i givim. I gud sipos yumi tu, yumi tinghae long loa ya mo letem hem i lidim laef blong yumi.

9, 10. (a) ?From wanem yumi nidim narafala we yumi save trastem blong i lidim yumi? (b) ?Wanem rod ya nomo blong gat wan laef we i hapi mo i karem frut?

⁹ Olgeta laef samting oli nidim samting blong lidim olgeta, mo hem i mas wan samting we oli save trastem. Jisas wetem ol narafala enjel tu oli nidim samting ya, nating se oli hae moa long ol man. (Ol Sam 8:5; Jon 5:30; 6:38; Hibrus 2:7; Revelesen 22:8, 9) !Sipos ol spirit man ya we oli stret gud olgeta oli nidim God blong i lidim olgeta, ating yumi ol sinman yumi nidim samting ya moa! Laef blong ol man long wol ya, mo prapa laef blong yumi wanwan i pruvum se tok blong profet Jeremaea i tru nomo, we i se: “O Jeova, mi mi save gud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.”—Jeremaea 10:23, NW.

¹⁰ Sipos yumi wantem gat wan laef we i hapi mo we i karem gudfala frut, yumi mas lukluk i go long God blong i lidim yumi. King Solomon i luksave se i denja tumas blong wantem laef folem ol rul blong yumi nomo, we yumi no letem God i lidim yumi, hem i se: “I gat rod i stap we man i ting se i stret gud, be hem i rod blong ded nomo.”—Ol Proveb 14:12.

?From Wanem Yumi Mas Tinghae Long Loa Blong Jeova?

11. ?From wanem yumi mas wokem wan strong tingting blong kasem save long loa blong God?

¹¹ I gud yumi wokem wan strong tingting blong wantem kasem save ol loa blong Jeova. Man blong raetem Sam i talemaot filing olsem, taem hem i se: “Plis yu openem ae blong mi blong mi save luk ol gudgudfala samting long Loa blong yu.” (Ol Sam 119:18) Moa we yumi gat save long God mo ol fasin blong hem, moa we bambae yumi agri wetem ol tok ya blong Aesea se: “Mi, Jeova, mi mi God blong yufala, God ya we i stap tijim yufala blong karem gudfala frut long laef blong yufala. Mi mi stap mekem yufala i wokbaot long rod we i stret. !Mi mi wantem tumas we yufala i lesin gud long ol oda blong mi!” (Aesea 48:17, 18, NW ) Jeova i wantem tumas we ol man blong hem oli stap longwe long ol trabol mo we oli harem gud long laef. Taswe, hem i talem se oli mas lesin long ol oda blong hem. Bambae yumi tokbaot sam bigfala risen from wanem yumi mas tinghae long loa blong God.

12. ?Wanem save we Jeova i gat long saed blong yumi we i mekem se hem i beswan man blong givim Loa?

¹² Loa blong God i kamaot long Bigman ya we i save yumi moa i winim eni narafala man. Jeova i wokem yumi, taswe i stret nomo blong ting se hem i save gud  yumi. (Ol Sam 139:1, 2; Ol Wok 17:24-28) Ol gudfala fren blong yumi, ol famle, mo stret papa mama blong yumi, oli no save gud yumi olsem we Jeova i save yumi. !Tru ya, God i save yumi moa i winim we yumi save yumi wan! Bigman ya we i wokem yumi, hem i save evri samting we yumi nidim long saed blong spirit, long saed blong filing, tingting, mo bodi. Taem hem i soem intres long yumi, i klia nomo se hem i klosap moa long yumi i winim ol narafala man from we hem i save gud prapa fasin blong yumi, wanem ol samting we yumi wantem, mo wanem we yumi traehad blong mekem. Jeova i save se i gat sam samting we yumi no naf blong mekem, be tu, hem i save se yumi naf blong mekem plante gudfala samting. Man blong raetem Sam i talem se: “Hem i savegud we hem i mekem yumi long graon. Oltaem hem i stap tingbaot we yumi kamaot long asis nomo.” (Ol Sam 103:14) Taswe, yumi save harem se yumi sef long saed blong spirit taem yumi wokbaot folem ol loa blong hem mo taem yumi letem hem i lidim yumi.—Ol Proveb 3:19-26.

13. ?From wanem yumi sua se Jeova i rili kea long yumi?

¹³ Loa blong God i kamaot long Bigman ya we i lavem yumi. God i wantem tumas we yumi stap gud olwe. Tingbaot bigfala samting we hem i lusum taem hem i givim Pikinini blong hem olsem wan ransom we i “pem rod blong plante man oli go fri.” (Matiu 20:28) Mo tu, Jeova i promes se bambae hem “i no save letem wan samting i traem yumi, we i strong tumas long yumi.” (1 Korin 10:13) Baebol i mekem yumi sua se ‘oltaem hem i stap tingbaot yumi.’ (1 Pita 5:7) Jeova i lavem mo i intres bigwan long ol man mekem se hem i wantem givim sam rul we oli save lidim man blong harem gud. I no gat wan narafala man we i wantem mekem olsem. Jeova i save wanem samting i gud long yumi mo hem i save wanem i save mekem yumi hapi mo wanem i save mekem yumi krae. Yumi sinman mo yumi mekem mastik, be sipos yumi traehad blong wokem ol fasin we oli stret, bambae Jeova i mekem plante samting blong soem se hem i lavem yumi, mo biaen bambae hem i givim laef mo plante blesing tu long yumi.—Esikel 33:11.

14. ?Wanem bigfala samting we i mekem se loa blong God i defren long ol tingting blong man?

¹⁴ Loa blong God i no stap jenis olbaot, mo hemia i mekem yumi harem sef. Laef long taem blong yumi i raf olsem solwota we i muvmuf plante. Be Jeova i olsem bigfala ston blong yumi, i no gat wan samting i save muvum hem, hem i stap oltaem nomo. (Ol Sam 90:2) Hem i tokbaot hem wan i se: “Mi mi Hae God, mo mi no save jenis samtaem.” (Malakae 3:6) Yumi save trastem fulwan ol rul blong God we oli stap long Baebol. Ol rul ya oli no olsem ol tingting blong man we oli stap jenis oltaem. (Jemes 1:17) Eksampol, ol man blong save, we oli stadi long fasin mo tingting blong man, fastaem oli bin talem se i nogud blong stretem pikinini. Be biaen, sam long olgeta oli jenisim tingting blong olgeta mo oli talem se advaes we oli bin givim i rong. Ol tingting blong wol mo ol rul we oli folem long saed ya oli jenis tumas, i olsem we win i stap saksakem olgeta i go olbaot. Be, Tok blong Jeova i no jenis. Blong plante handred yia, Baebol i givim advaes long saed blong fasin blong stretem pikinini wetem lav. Aposol Pol i raetem se: “Mo yufala ol papa, yufala i no mas mekem ol pikinini blong yufala oli harem nogud gogo oli kam kros. Be yufala i mas gohed blong stretem olgeta, mo blong trenem tingting blong olgeta olsem we Jeova i wantem.” (Efesas 6:4, NW ) !Yumi glad tumas blong save se yumi save trastem ol rul blong Jeova; bambae oli no save jenis!

Blesing i Blong Olgeta We Oli Obei Long Loa Blong God

15, 16. (a) ?Wanem frut i save kamaot sipos yumi folem ol rul blong Jeova? (b) ?Olsem wanem ol loa blong God oli save lidim yumi insaed long mared?

¹⁵ God i tok tru long profet Aesea, i se: “Tok blong mi bambae . . . i mekem evri samting we mi mi sanem hem blong i mekem.” (Aesea 55:11) Taswe yumi sua se taem yumi traehad blong folem ol rul we oli stap long Tok blong hem, bambae yumi win long laef, bambae yumi mekem gudfala wok, mo bambae yumi faenem glad.

¹⁶ Tingbaot olsem wanem ol loa blong God oli save lidim yumi blong gat wan gudfala mared. Pol i raetem se: “Mared i wan fasin we yufala evriwan i mas tinghae long hem. Yufala we i mared, yufala i mas lukaot gud  long mared blong yufala, blong i stap klin gud oltaem. God bambae i jajem boe mo gel we tufala i slip wanples, mo bambae i jajem man we i slip wetem woman we i no woman blong hem, mo woman we i slip wetem man we i no man blong hem.” (Hibrus 13:4) Hasban mo waef, tufala i mas soem ona mo lav long tufala: “Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.” (Efesas 5:33) Fas Korin 13:4-8 (NW ) i tokbaot wanem kaen lav ya we yumi nidim, hem i se: “Man we i gat lav, tingting blong hem i longfala, mo hem i kaengud. Man we i gat lav, hem i no save jalus, hem i no save tok flas, mo tingting blong hem i no antap tumas. Hem i no save mekem ol fasin we man i sek nogud long hem, mo i no save tingbaot hem nomo. Hem i no save kros kwik, mo i no save stap kros longtaem. Hem i no save harem gud long ol fasin we i no stret. Hem i harem gud long trutok nomo. Man we i gat lav, hem i stap stanap strong long olgeta samting, hem i bilivim olgeta samting, hem i hop long olgeta samting, mo tingting blong hem i longfala long olgeta trabol. Fasin lav i neva save lus.” Mared we i stanap long lav olsemia bambae i neva save kam nogud.

17. ?Wanem sam blesing we oli kamaot from we yumi folem ol rul blong Jeova long saed blong dring?

¹⁷ Wan narafala pruf se ol rul blong Jeova oli mekem i gud long man, hemia se Jeova i no laekem nating fasin blong drong. Tru ya, hem i no laekem tu, fasin blong “dring plante waen.” (1 Timoti 3:3, 8, NW; Rom 13:13) Plante man we oli no folem rul blong God long saed ya oli kasem ol bigfala sik we oli kamaot from we oli dring tumas mo tu, fasin ya i save mekem sik we maet oli gat finis i kam moa nogud. Samfala oli no folem advaes blong Baebol se yumi no mas bitim mak long dring, nao oli stat folem fasin ya blong dring plante from we oli se hemia i “halpem olgeta blong spel long tingting.” Be plante problem oli kamaot from fasin blong dring bitim mak. Fasin ya i mekem  we narafala i no moa gat respek long man ya we i dring, famle i no moa joengud mo i seraot, man ya we i dring i westem mane, mo i save lusum wok blong hem tu. (Ol Proveb 23:19-21, 29-35) ?Yu yu agri se ol rul we Jeova i givim long saed blong dring oli blong blokem yumi long trabol?

18. ?Ol loa blong God oli save halpem man long saed blong mane? Eksplenem.

¹⁸ Ol rul blong God oli givhan long man blong waesgud long ol bisnes blong mane tu. Baebol i talem se ol Kristin oli mas man we oli mekem i stret oltaem nomo mo oli mas wokhad. (Luk 16:10; Efesas 4:28; Kolosi 3:23) From we ol Kristin oli folem advaes ya, plante long olgeta oli kasem ol gudfala posisen long wok no oli no lusum wok blong olgeta taem masta i putumaot ol narafala. Ol Kristin oli kasem blesing tu from we oli no westem mane long ol nogud fasin mo ol samting olsem plelaki, smok, mo tekem drag. Ating yu save tingbaot sam narafala eksampol we oli soemaot se ol rul blong God oli mekem se yumi no westem mane.

19, 20. ?From wanem i waes blong agri mo folem ol loa blong God?

¹⁹ From we yumi sinman, i isi nomo blong gowe long ol loa mo rul blong God. Tingbaot ol man Isrel long taem ya we oli stap long Bigfala hil blong Sinae. God i talem long olgeta se: “Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol.” Ale, oli ansa se: “Bambae mifala i mekem olgeta samting we Hae God i talem.” !Be rod we oli folem biaen, i defren olgeta long ol loa blong God! (Eksodas 19:5, 8; Ol Sam 106:12-43) I gud yumi no mekem olsem olgeta ya, be yumi agri mo folem ol rul blong God.

²⁰ Yumi waes mo yumi hapi taem yumi folem gud ol nambawan loa we Jeova i givim blong lidim laef blong yumi. (Ol Sam 19:7-11) Be blong folemgud ol loa ya oltaem, yumi mas kasem save tu se ol rul blong God oli impoten tumas. Hemia nao samting we bambae yumi tokbaot long nekis stadi.

[Ol Futnot]

?Yu Yu Rimemba?

• ?From wanem yumi save sua se ol loa blong God oli blong mekem i gud long yumi?

• ?From wanem risen yumi mas tinghae long ol loa blong Jeova?

• ?Ol loa blong God oli mekem i gud long yumi long wanem samting?

[Kwestin]

[Tok blong pija long pej 13]

Ebraham i kasem bigfala blesing from we hem i obei long loa blong Jeova

[Tok blong pija long pej 15]

Ol wari long bisi laef blong yumi tede, oli pulum plante man blong oli gowe long loa blong God

[Tok blong pija long pej 17]

Loa blong God i stap olwe mo i no save jenis