1, 2. ?Ol vison long saed blong ogenaesesen blong Jehova long heven mo long wol, i pulum yumi blong mekem wanem?

YUMI glad tumas taem yumi tingbaot se yumi joen long wan bigfala ogenaesesen long fulwol. Ol vison we yumi ridim long Esikel japta 1 mo Daniel japta 7, oli gud tumas. Oli tokbaot olsem wanem Jehova i stap wok blong mekem stamba tingting blong hem i kamtru. Jisas i stap lidim ogenaesesen blong Jehova we i stap long wol. Hem i lidim ogenaesesen ya blong i mekem wok blong prij i gohed, i tijim mo i leftemap tingting blong olgeta we oli mekem wok ya, mo i givhan long ol narafala blong oli kam man blong Jehova. Ol samting ya oli pulum yumi blong yumi trastem ogenaesesen blong Jehova.—Mat. 24:45.

² ?Yu yu bisi long wok blong God olsem we ogenaesesen blong Jehova i mekem? Maet yu harem se yu no moa gat strong tingting blong prij olsem bifo. Hemia samting we i hapen long ol Kristin long fas handred yia. Aposol Pol i mekem olgeta oli tingbaot strong tingting we Jisas i gat. Pol i talem long olgeta se, eksampol blong Jisas bambae i givhan long olgeta blong oli ‘no lego bilif mo oli stap strong.’ (Hib. 12:3) Long las stadi, yumi tokbaot ol nambawan wok we ogenaesesen blong Jehova i stap mekem tede. Ogenaesesen blong Jehova i stap givhan long yumi blong yumi holemstrong mo yumi no kam slak long wok blong God. Hemia i sem mak long eksampol blong Jisas we i leftemap tingting blong ol Kristin long fas handred yia.

3. ?Yumi mas mekem wanem blong yumi no kam slak? ?Bambae yumi tokbaot wanem long stadi ya?

³ Sipos yumi no wantem “kam slak” blong mekem wok blong God, yumi mas mekem sam samting i bitim we yumi tingbaot nomo eksampol blong ogenaesesen blong God. Pol i talem se yumi mas gohed blong “mekem ol gudfala fasin.” (Gal. 6:9) Bambae yumi tokbaot faef samting we yumi mas mekem, blong yumi gat  strong tingting oltaem, mo blong yumi folem samting we ogenaesesen blong Jehova i talem. Biaen, yumi save luk sipos yumi mo famle blong yumi, i nidim blong mekem sam long ol samting ya.

4. ?From wanem yumi save talem se ol miting oli impoten bifo mo tede tu?

⁴ Ol miting oli impoten bifo mo tede tu, mo ol man blong Jehova oli tinghae long olgeta. Long heven tu, Jehova i joen wetem ol enjel blong hem. (1 King 22:19; Job 1:6; 2:1; Dan. 7:10) Long ol taem bifo, God i talem long ol man Isrel blong oli kam wanples, blong “oli save harem” tok blong God, nao oli save “lanem” samting from. (Dut. 31:10-12) Long ol fas handred yia, ol man Jiu oli joen tugeta long ol haos blong prea blong ridim ol Tok blong Baebol. (Luk 4:16; Wok 15:21) Ol miting oli impoten long taem we Kristin kongregesen i stanap, mo oli impoten yet tede. Ol tru Kristin oli ‘givgivhan long olgeta blong mekem oli strong blong lavem ol man, mo blong mekem ol gudfala fasin.’ Yumi mas gohed blong “leftemap tingting blong yumi,” from we yumi laef long ol las dei.—Hib. 10:24, 25.

5. ?Yumi save mekem wanem blong leftemap tingting blong yumi long ol miting?

⁵ Wan gudfala rod blong leftemap tingting blong yumi, hemia taem yumi ansa long ol miting. Yumi save ansa stret long paragraf, yumi tokbaot wan vas, no yumi tokbaot wan stori we i soemaot olsem wanem ol rul blong Baebol oli givhan long yumi. (Sam 22:22; 40:9) Taem yumi harem ansa blong wan olfala no wan yangfala, samting ya i leftemap tingting blong yumi bigwan. Hemia i tru tumas, nating se yumi stap longtaem long trutok, no nogat.

6. ?Ol miting blong yumi oli givhan long yumi olsem wanem?

⁶ Ol miting mo ol asembli oli givhan long yumi blong prij, nating se ol man oli agensem yumi, mo oli no wantem lesin long yumi. (Wok 4:23, 31) Taem yumi lesin long ol tok mo ol narafala haf we oli stanap long Baebol, samting ya i mekem bilif blong yumi i strong. (Wok 15:32; Rom 1:11, 12) Yumi harem gud tumas taem yumi joen wetem ol brata mo sista blong yumi, mo samting ya i leftemap tingting blong yumi. (Sam 94:12, 13) Tijing Komiti blong Hed Kampani i mekem ol program blong ol miting blong ol Witnes blong Jehova. !Yumi glad tumas from ol gudfala save ya we yumi stap kasem long ol miting blong yumi evri wik!

7, 8. (1) ?Wanem impoten risen we i pulum yumi blong go long ol miting? (2) ?Ol miting oli givhan long yu olsem wanem?

⁷ Wan impoten risen we i pulum yumi blong go long ol miting, hemia blong wosipim Jehova, be i no blong kasem blesing nomo. (Ridim Ol Sam 95:6.) !I gud tumas we yumi save sing blong presem God ya blong yumi, Jehova! (Kol. 3:16) Yumi presem Jehova tu, taem yumi ansa long ol miting. I stret nomo we yumi mekem ol samting ya blong wosipim hem. (Rev. 4:11) Taswe i impoten tumas we yumi stap long olgeta miting.—Hib. 10:25.

⁸ Ol miting oli wan presen we Jehova i givim. Oli givhan long yumi blong yumi stanap strong kasem en blong rabis wol ya. Taswe sipos yumi tingbaot ol miting se i wan presen, bambae yumi traehad blong go long olgeta miting, nating se yumi bisi. (Fil. 1:10) Yumi no mas mestem ol miting, sipos i no gat wan gudfala risen.

9. ?Wanem i soemaot se wok blong prij i impoten?

⁹ Blong folem ogenaesesen blong Jehova, yumi mas prij wetem strong tingting. Taem Jisas i stap long wol ya, hem i statem  wok blong prij. (Mat. 28:19, 20) Stat long taem ya, wok blong prij mo blong pulum ol man oli kam disaepol, oli ol impoten wok blong ogenaesesen blong Jehova. I gat plante stori we oli soemaot se ol enjel oli stap sapotem yumi long wok blong prij, mo oli givhan long yumi blong faenem olgeta we oli wantem save trutok. (Wok 13:48; Rev. 14:6, 7) Mo bigfala samting we ogenaesesen blong Jehova i stap mekem, hemia blong sapotem wok blong prij. ?Yu yu luk wok ya se i wan impoten wok long laef blong yu?

10. (1) ?Wan brata i mekem wanem blong i laekem trutok moa? (2) ?Wok blong prij i givhan long yu olsem wanem blong yu laekem trutok moa?

¹⁰ Taem yumi prij wetem strong tingting, bambae yumi laekem trutok moa. Hemia nao samting we i hapen long wan brata we i mekem wok blong elda longtaem finis, mo i paenia. Nem blong hem Mitchel. Hem i talem se: “Mi laekem talemaot trutok long ol man. Mi tingbaot ol haf we oli stap long niufala Wajtaoa mo Wekap!, mo mi sapraes blong luk waes, save, mo olsem wanem ol haf ya oli stret long enikaen man. Ale, mi go prij from we mi wantem luk se ol man bambae oli harem olsem wanem taem oli ridim ol haf ya. Mo mi wantem luk olsem wanem mi save pulum tingting blong olgeta blong oli lesin.” Mitchel i talem se wok blong prij i givhan long hem, blong hem i putum ol samting we oli moa impoten, i stap long fasples long laef blong hem, mo blong lukaotgud se i no gat wan samting i tekem ples blong ol impoten samting ya. Yumi tu yumi save stanap strong long ol las  dei ya, sipos yumi stap bisi blong mekem wok blong God.—Ridim 1 Korin 15:58.

11. ?From wanem yumi mas ridim mo tingting dip long ol buk mo ol magasin blong yumi?

¹¹ Jehova i yusum ol buk blong yumi blong givim paoa long yumi. Ating yu tingbaot wan taem we yu bin ridim wan buk no wan magasin, nao yu talem se: ‘!Hemia nao stret samting we mi lukaotem! !I olsem se Jehova i raetem tok ya blong mi nomo!’ Yes, yu yu harem olsem from we Jehova i yusum ol buk mo ol magasin blong tijim mo lidim yumi. Jehova i talem se: “Mi bambae mi tijim yu long rod we i stret blong yu yu folem.” (Sam 32:8) ?Olsem wanem? ?Yumi traehad blong ridim ol buk mo ol magasin we yumi stap kasem mo yumi tingting dip long olgeta? Sipos yumi mekem olsem, samting ya bambae i givhan long yumi blong stanap strong, mo mekem wok blong God wetem strong tingting, long ol las dei ya we laef i had tumas.—Ridim Ol Sam 1:1-3; 35:28; 119:97.

12. ?Wanem i save givhan long yumi blong tinghae long ol buk blong yumi?

¹² Bambae yumi tinghae moa long ol buk blong yumi, sipos yumi tingbaot hadwok we ol Kristin brata mo sista oli mekem, blong wokem ol buk ya. I nidim blong mekem sam dip stadi blong faenem ol save, raetemdaon, ridim bakegen, talem ol pijatok, mo tanem olgeta buk we yumi printim, no we yumi putum long Websaet blong yumi. Komiti blong Raetem Ol Buk blong Hed Kampani nao i lukaot long wok ya. Biaen, ol hed ofis we oli printim ol buk, oli sanem ol buk ya i go long ol kongregesen we oli lukaot long olgeta. ?From wanem oli mekem ol wok ya? Hemia blong mekem se ol man blong Jehova oli kasem ol advaes blong lidim olgeta, mo blong givhan long olgeta blong oli holemstrong long God. (Aes. 65:13) I gud yumi traehad blong kasem gudfala samting long ol buk we ogenaesesen blong Jehova i stap givim.—Sam 119:27.

13, 14. ?Hu long heven i sapotem ogenaesesen blong Jehova? ?Yumi save mekem sem mak olsem wanem?

¹³ Long wan vison, Jon i luk Jisas i stap ron long wan waet hos blong i go faet long ol man we oli agensem Jehova. (Rev. 19:11-15) Mo hem i luk ol tabu Kristin we oli laef bakegen finis long heven wetem ol gudfala enjel blong Jehova, oli stap ron long hos mo oli biaenem Jisas. Hemia i soemaot se oli sapotem Jisas olsem Lida blong olgeta. (Rev. 2:26, 27) Eksampol blong olgeta i tijim yumi se yumi mas sapotem olgeta we oli stap lidim yumi long ogenaesesen blong Jehova.

¹⁴ Long sem fasin, bigfala kampani i sapotem fulwan, wok we ol brata blong Kraes we oli stap yet long wol, oli stap mekem. (Ridim Sekaraea 8:23.) ?Yu mas mekem wanem blong soemaot se yu sapotem ogenaesesen blong Jehova? Wan rod hemia blong obei long olgeta we oli lidim yumi. (Hib. 13:7, 17) ?Olsem wanem long ol tok we yumi talem long saed blong ol elda blong yumi? ?Oli givhan long ol narafala blong oli respektem ol elda mo wok blong olgeta? ?Olsem wanem long ol pikinini blong yumi? ?Yumi tijim olgeta blong oli respektem ol elda mo oli lesin long ol advaes we oli givim? Wan narafala samting blong tingbaot se, ?famle blong yumi i mekem plan finis, blong hamas mane we yumi save givim blong sapotem wok blong prij? (Prov. 3:9; 1 Kor. 16:2; 2 Kor. 8:12) Mo tu, ?yumi stap givhan blong klinim mo fiksimap Haos Kingdom? Taem Jehova i luk we yumi sapotem ogenaesesen blong hem olsem, hem i givim tabu spirit long yumi. Mo spirit ya i givim paoa long yumi blong stanap strong long ol las dei ya.—Aes. 40:29-31.

15. ?From wanem yumi mas traehad blong mekem samting we i stret oltaem?

¹⁵ Sipos yumi wantem stanap strong mo letem ogenaesesen blong Jehova i lidim yumi, yumi mas laef long fasin we Jehova i glad long yumi. (Efes. 5:10, 11) Setan, rabis wol blong hem, mo sin we i stap long yumi, oli mekem i hadwok long yumi blong yumi mekem samting we i stret. Sam brata mo sista blong yumi oli mas faet strong evri dei, blong oli save fren gud oltaem wetem Jehova. Taswe yumi mas traehad blong mekem samting we i stret oltaem. Jehova i laekem yumi from we yumi traehad olsem. Mo taem yumi laef long fasin we Jehova i glad long yumi, yumi kasem save from wanem yumi laef mo yumi harem gud. Mo yumi save sua se Jehova i glad long yumi.—1 Kor. 9:24-27.

16, 17. (1) ?Yumi mas mekem wanem sipos yumi mekem wan bigfala sin? (2) ?Eksampol blong Annie i tijim yumi long wanem?

¹⁶ ?Be yu mas mekem wanem sipos yu mekem wan bigfala sin? Yu no mas traem blong haedem sin ya. Yu mas kwik blong go luk ol elda blong oli givhan long yu. Yu traem tingbaot Deved. Hem i harem nogud tumas taem hem i traem blong haedem sin blong hem. Hem i talem se: “Mi mi slak we mi slak, from we evri dei nomo, mi stap krae kasem tudak.” (Sam 32:3) Sipos yumi traem blong haedem ol bigfala sin, bambae yumi no moa glad mo yumi no moa fren wetem Jehova. Be sipos yumi talemaot ol sin ya, God “bambae i gat sore” long yumi.—Prov. 28:13.

¹⁷ Yu traem tingbaot eksampol blong Annie. * Taem hem i yangfala mo hem i mekem wok blong paenia, hem i stat blong mekem sam nogud samting. From samting ya, tingting blong hem i stikim hem. Hem i talem se: “Mi mi harem nogud mo tingting blong mi i foldaon oltaem.” Wan dei, hem i stap lesin long wan tok long Haos Kingdom. Brata we i givim tok, i tokbaot vas blong Jemes 5:14, 15. Afta we Annie i lesin long tok ya, hem i luksave se hem i mas go luk ol elda blong oli givhan long hem. ?Ale, hem i mekem wanem? Hem i folem advaes blong vas ya, mo i go luk ol elda. I no isi nating long Annie blong mekem olsem. Be hem i talem se, i olsem we hem i sik, nao Jehova i givim meresin we hem i nidim. Hem i eksplenem se: “I no isi blong mi solemdaon meresin ya, be biaen mi kam gud bakegen.” Naoia Annie i wok strong bakegen long wok blong Jehova, we tingting blong hem i klin.

18. ?Yumi mas traehad blong mekem wanem?

¹⁸ !I rili wan blesing blong joen long ogenaesesen blong Jehova long ol las dei ya! Oltaem, yumi mas rimemba samting ya. I gud we yumi wetem famle blong yumi, yumi traehad blong stap long evri miting, yumi gat strong tingting blong prij long ol teritori blong yumi, mo yumi kasem gudfala samting from ol buk blong yumi. Yumi sapotem olgeta we oli stap lidim yumi, mo yumi laef long fasin we Jehova i glad long yumi. Sipos yumi mekem ol samting ya, bambae yumi folem ogenaesesen blong Jehova, mo bambae yumi no save kam slak.