Long 1985, mi mi gat 10 yia. Long taem ya, sam pikinini blong Kambodia oli kam long skul blong mifala long Columbus, Amerika. Wan long ol boe we i kam, i save sam wod long Inglis. Ale, hem i droem sam pija blong tokbaot stori blong sam rabis samting we oli stap hapen long kantri blong hem. Hem i talem se ol man oli mekem ol narafala oli harem nogud bitim mak long bodi blong olgeta, mo oli kilim ol man oli ded. Mo hem i tokbaot stori blong ol man we oli mas ronwe blong sevem laef blong olgeta. Long naet, mi mi krae taem mi stap tingbaot ol pikinini ya. Mi wantem tumas blong tokbaot promes blong God long saed blong Paradaes mo laef bakegen long ded. Be mi no save mekem olsem, from we olgeta oli no save lanwis blong mi. Nating se mi mi wan smol boe nomo, be mi jusum blong lanem lanwis blong Kambodia, olsem nao mi save tokbaot Jehova long ol fren blong mi long skul. Long taem ya, mi no luksave se desisen ya bambae i givhan long mi long fiuja.

I no isi blong lanem lanwis blong Kambodia. Tu taem finis mi wantem lego, be Jehova i givhan long mi. Hem i yusum papa mo mama blong mi blong leftemap tingting blong mi. Sam yia biaen, tija blong mi mo ol fren blong mi long skul, oli stat blong fosem mi blong mi agri long wan wok we mane blong hem i gud. Be mi mi wantem kam wan paenia. Taswe, mi jusum blong tekem sam kos long hae skul, we oli save givhan long mi blong faenem wan haftaem wok. Plante taem afta skul, mi stap joen wetem sam paenia blong go prij. Mo tu mi tijim ol studen blong oli stap lanem Inglis. Hemia wan wok we bambae i givhan long mi plante yia biaen.

Taem mi gat 16 yia, mi harem se i gat wan smol grup blong ol pablisa long Kalifonia, we oli toktok lanwis blong Kambodia. Mi mi go visitim grup ya mo mi lanem blong ridim lanwis blong Kambodia. Afta we mi finis skul, mi kam wan paenia mo mi gohed blong prij long ol man Kambodia we oli stap klosap long haos blong mifala. Taem mi gat 18 yia, mi gat tingting blong go stap long Kambodia. Kambodia i wan ples we i no sef blong stap long hem. Be mi save se bighaf blong ol 10 milian man we oli stap long Kambodia, oli neva harem gud nius blong Kingdom. Long taem ya, i gat wan kongregesen nomo long ful kantri ya mo i gat 13 pablisa. Taem mi gat 19 yia, mi go long Kambodia, jes blong lukluk nomo. Be tu yia biaen, mi jusum blong go stap long Kambodia. Mi faenem wan haftaem wok, hemia blong transletem lanwis mo tijim Inglis long ol man. Wok ya i givhan long mi blong mi gohed blong prij. Sam yia biaen, mi mitim gudfala woman blong mi, we hem tu i gat sem tingting olsem mi. Mitufala i glad tumas blong givhan long plante man Kambodia blong oli givim laef blong olgeta i go long Jehova.

Jehova i givim samting we mi mi wantem tumas. (Sam 37:4) Wok blong prij i nambawan i bitim ol narafala wok long wol ya. Long ol 16 yia we mi stap long Kambodia, mi luk smol grup ya blong 13 pablisa i gru i kam 12 kongregesen mo 4 grup blong ol Witnes blong Jehova.—Jason Blackwell i talem stori ya.