1, 2. (1) ?Wanem tingting we ol man oli gat long presen ya we yumi fri blong jus? (2) ?Wanem samting we Baebol i tijim long saed blong presen ya? ?Wanem ol kwestin we bambae yumi tokbaot?

WAN WOMAN i mas mekem wan desisen, be hem i talem long fren blong hem se: “Yu no mekem mi tingting tumas, yu talem nomo samting we mi mas mekem. Hemia i moa isi.” Woman ya i fri blong jusum wanem we hem i wantem, hemia wan presen we God i givim long hem. Be hem i no wantem yusum presen ya, hem i wantem se fren blong hem i talem samting we hem i mas mekem. ?Olsem wanem long yu? ?Yu yu laekem blong mekem prapa desisen blong yu, no yu wantem se narafala i talem samting we yu mas mekem? ?Wanem tingting blong yu long presen ya?

² Ol man oli gat defdefren tingting long saed blong fasin ya we yumi fri blong jus. Samfala oli talem se ol man oli no fri blong jus, from we God i jusum finis ol samting we oli mas mekem. Sam narafala oli talem se bambae yumi fri sipos yumi fri blong mekem eni samting we yumi wantem. Be Baebol i tijim yumi se God i wokem yumi wetem fasin ya we yumi naf blong tingting gud mo yumi fri blong mekem prapa desisen blong yumi. (Ridim Josua 24:15.) Long Baebol, yumi save faenem ansa blong ol kwestin ya se: ?I gat  mak we yumi no mas bitim taem yumi yusum presen ya? ?Olsem wanem yumi save yusum presen ya taem yumi mekem desisen? ?Olsem wanem ol desisen blong yumi oli soemaot se yumi lavem Jehova? ?Mo olsem wanem yumi save soemaot se yumi respektem desisen blong ol narafala?

3. ?Jehova i yusum fasin fri blong hem olsem wanem?

³ Jehova i fri blong mekem eni samting we hem i wantem, mo taem yumi luk olsem wanem hem i yusum fasin ya, yumi save lanem sam samting from. Yumi save tingbaot ol man Isrel bifo. Jehova i jusum olgeta blong oli kam ‘ol spesel man blong hem.’ (Dutronome 7:6-8) Hem i mekem olsem from wan gudfala risen. Hem i wantem holemtaet promes we hem i bin mekem long Ebraham. (Jenesis 22:15-18) Mo tu, oltaem Jehova i gat lav mo stret fasin taem hem i yusum fasin fri blong hem. Yumi luksave samting ya long fasin we hem i stretem ol man Isrel taem oli no obei long hem. Taem oli sore from samting we oli mekem, Jehova i lavem mo i sore long olgeta. Hem i talem se: “Bambae mi tekem yufala i kambak long mi bakegen, nao bambae mi lavem yufala long olgeta tingting blong mi [“bambae mi jusum blong lavem yufala,” NW].” (Hosea 14:4) !Jehova i soemaot wan gudfala eksampol long yumi taem hem i yusum fasin fri blong hem blong halpem ol narafala!

4, 5. (1) ?Hu faswan man we i kasem presen ya? ?Mo hem i yusum olsem wanem? (2) ?Wanem kwestin we yumi wanwan i mas askem?

⁴ Jehova i jusum blong wokem ol enjel mo ol man wetem fasin ya we oli fri blong jus. Faswan samting we Jehova i wokem, hemia Jisas. God i wokem hem long pija blong hem, mo hem i fri blong jus. (Kolosi 1:15) ?Jisas i yusum fasin fri blong hem olsem wanem? Bifo we Jisas i kam long wol, hem i jusum blong holemstrong long God mo no joenem Setan taem hem i agensem God. Taem Jisas i kam long wol, hem i jusum blong blokem Setan taem hem i traem blong pulum hem. (Matiu 4:10) Biaen, long naet bifo we Jisas i ded, hem i talem long Papa blong hem se hem i wantem mekem samting we Papa blong hem i wantem. Hem i se: “Papa, sipos i stret long tingting blong yu, plis yu tekemaot ol samting ya we i stap mekem mi mi harem nogud. Be yu no mekem olsem we mi mi wantem, yu mekem olsem we yu nomo yu wantem.” (Luk 22:42) ?Olsem wanem? ?Yumi naf blong folem fasin blong Jisas mo yusum fasin fri blong yumi blong leftemap nem blong Jehova, mo mekem samting we hem i wantem?

⁵ Yes, yumi save folem fasin blong Jisas from we God i wokem yumi tu long pija blong hem. (Jenesis 1:26) Be yumi no olsem Jehova, yumi no fri blong mekem eni samting we yumi wantem. Baebol i eksplenem se Jehova i putum ol mak we yumi no mas bitim long fasin fri blong yumi, mo hem i wantem se yumi respektem ol mak ya. Eksampol, insaed long wan famle, ol waef oli mas putum olgeta oli stap daon long ol hasban blong olgeta, mo ol pikinini oli mas obei long papa mo mama blong olgeta. (Efesas 5:22;  6:1) ?Ol mak ya oli save gat paoa long yu olsem wanem taem yu yusum fasin fri blong yu? Yumi wanwan i mas askem kwestin ya from we fiuja blong yumi i dipen long ansa blong yumi.

6. Talem wan eksampol we i soem se i impoten we fasin fri blong yumi i gat ol mak we yumi no mas bitim.

⁶ Yumi fri blong jus, be i gat sam mak we yumi no mas bitim. ?Be hemia i min se yumi rili fri? !Yes! ?From wanem? From we ol mak ya oli save protektem yumi. Traem tingbaot. Maet yu draevem trak blong yu blong go long wan ples we i stap longwe. Be i nogat loa we ol draeva oli mas folem taem oli draevem trak, mo evriwan i save jusum sipos oli wantem ron spid no nogat, mo oli save draev long eni saed blong rod we oli wantem. ?Bambae yu harem se yu sef blong ron long rod ya? Ating nogat. Yumi nidim ol mak ya blong yumi save harem gud long ol samting we yumi jusum. Bambae yumi luk sam eksampol long Baebol we oli soemaot se ol mak we Jehova i putum, oli save mekem i gud long yumi.

7. (1) ?Wanem samting i defren long saed blong Adam mo ol anamol? (2) Tokbaot olsem wanem Adam i yusum gud fasin fri blong hem.

⁷ Taem Jehova i wokem fas man ya Adam, hem i givim sem presen ya we hem i givim long ol enjel, hemia se hem i fri blong jus. Be God i no givim presen ya long ol anamol. Yumi save tingbaot wan samting we i soemaot se Adam i yusum gud fasin fri blong hem. God i wokem ol anamol bifo long Adam. Be hem i givim wok ya blong putum nem blong ol anamol, long Adam. God i “tekem olgeta oli kam pas long man ya blong luk se man ya bambae i putum nem blong olgeta olsem wanem.” Afta we Adam i wajem gud ol anamol ya, hem i putum wan nem we i stret long olgeta. Jehova i no jenisim ol nem ya we Adam i jusum. Be “ol nem we man ya i putum wanwan long olgeta oli kam nem blong olgeta.”—Jenesis 2:19.

8. ?Olsem wanem Adam i no yusum gud fasin fri blong hem, mo wanem i kamaot from?

⁸ Jehova i givim wan wok long Adam, hemia blong mekem fulwol i kam wan paradaes, mo i talem long hem se: ‘I gud yutufala i gat plante pikinini, blong bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef long wol ya, stat long olgeta we oli bigbigfala, go kasem olgeta we oli smosmol.’ (Jenesis 1:28) Be Adam i jusum blong kakae frut ya we God i putum tabu long hem, mo hemia i soemaot se hem i no wantem save long mak ya we Jehova i putum. Adam i no yusum gud fasin fri blong hem, ale ol man oli stap safa blong plante taosen yia. (Rom 5:12) Taem yumi tingbaot bigfala trabol we i kamaot from desisen blong Adam, hemia i pulum yumi blong yusum gud fasin fri blong yumi mo no bitim ol mak we Jehova i putum.

9. ?Jehova i letem ol man Isrel oli jusum wanem? ?Mo oli promes blong mekem wanem?

⁹ Adam mo Iv i mekem se olgeta man oli kam sinman mo oli stap ded. Be, yumi gat raet yet blong yusum presen ya we yumi fri  blong jus. Yumi luk samting ya long fasin we Jehova i mekem long neson blong Isrel. Hem i letem olgeta oli jusum sipos oli wantem kam ol spesel man blong hem no nogat. (Eksodas 19:3-6) Olgeta oli jusum blong kam ol man blong hem mo blong akseptem ol mak we hem i putum, taswe oli talem se: “Bambae mifala i mekem olgeta samting we Hae God i talem.” (Eksodas 19:8) Sore tumas, biaen oli jusum blong brekem promes we oli mekem. Yumi save lanem wan impoten samting long eksampol blong olgeta. Yumi mas tinghae oltaem long presen ya, mo yumi gohed blong stap klosap long Jehova mo obei long ol loa blong hem.—1 Korin 10:11.

10. ?Wanem sam eksampol long Hibrus japta 11 we i pruvum se ol sinman tu oli save yusumgud fasin fri blong olgeta? (Yu luk pija long stat blong stadi.)

¹⁰ Long Hibrus japta 11, yumi save faenem nem blong 16 man mo woman we oli jusum blong respektem ol mak we Jehova i putum. From samting ya, oli kasem plante blesing mo oli gat wan gudfala hop. Eksampol, Noa i gat strong bilif mo i jusum blong folem ol save we God i givim long hem blong wokem wan sip, blong i save sevem ol famle blong hem mo olgeta we bambae oli kamaot biaen long hem. (Hibrus 11:7) Mo tu, Ebraham mo Sera i glad nomo blong obei long God mo muv i go long ples we hem i promes blong givim long tufala. Taem tufala i stap wokbaot long longfala rod ya, tufala i “gat janis blong gobak” long Uru. Be tufala i no mekem olsem, tufala i putum tingting blong tufala long promes blong God long saed blong fiuja, hemia ‘wan ples we i gud moa.’ (Hibrus 11:8, 13, 15, 16) Moses i lego ol sas samting blong Ijip mo “i no wantem blong i stap hapi long fasin blong sin we i blong smoltaem nomo, hem i glad moa blong go joen long ol man blong God blong harem nogud wetem olgeta.” (Hibrus 11:24-26) I gud yumi folem bilif blong olgeta ya, yumi tinghae long presen ya we yumi fri blong jus, mo yumi yusum blong mekem ol samting we God i wantem.

11. (1) ?Yumi save kasem wanem blesing taem yumi yusum fasin fri blong yumi? (2) ?Wanem i pulum yumi blong yusumgud fasin fri blong yumi?

¹¹ Maet yumi luk se i moa isi blong wan narafala i mekem ol desisen blong yumi. Be sipos yumi mekem olsem, bambae yumi mestem bigfala blesing ya blong yusum presen we Jehova i givim long yumi. Baebol i tokbaot blesing ya long Dutronome 30:19, 20. (Ridim.) Long vas 19, yumi ridim se God i wantem we ol man Isrel oli mekem wan desisen. Mo long vas 20, yumi lanem se Jehova i givim janis long olgeta blong oli soemaot lav we oli gat long hem. Yumi tu yumi save jusum blong mekem wosip long Jehova. !Mo yumi gat janis blong yusum gud fasin fri blong yumi blong ona long Jehova mo soemaot se yumi lavem hem!

12. ?Yumi neva mas mekem wanem long presen we Jehova i givim?

¹² Traem tingbaot sipos yu givim wan sas presen long fren blong yu, be hem i sakem presen ya long doti, no i yusum blong spolem narafala. ?Bambae yu harem olsem wanem? I sua se bambae yu harem nogud. Naoia, traem tingbaot se Jehova i harem olsem wanem taem hem i luk ol man oli stap yusum fasin fri blong olgeta long fasin we i no stret, no oli yusum blong spolem ol narafala. Yes, hem tu i harem nogud. Baebol i talemaot se long “ol las dei,” ol man bambae oli “no man blong talem tangkiu.” (2 Timoti 3:1, 2) ?Taswe, yumi mas mekem wanem blong talem tangkiu long Jehova from presen we hem i givim? ?Mo yumi mas mekem wanem blong yumi no yusum presen ya long fasin we i no stret?

13. ?Yumi save mekem wanem blong no yusum presen ya long fasin we i no stret?

 ¹³ Yumi evriwan i fri blong jusum ol fren, ol klos, ol stael blong hea blong yumi, mo ol samting we yumi wantem mekem blong pleplei mo spel. Be samtaem yumi save yusum fasin fri ya olsem wan eskius, blong mekem ol samting we God i no laekem mo folem fasin blong ol man long wol. (Ridim 1 Pita 2:16.) Yumi no mas yusum fasin fri blong yumi blong mekem ol samting we oli no stret, be yumi yusum olsem wan janis blong mekem ol samting blong “leftemap nem blong God.”—1 Korin 10:31; Galesia 5:13.

14. ?From wanem yumi mas trastem Jehova, taem yumi yusum fasin fri blong yumi?

¹⁴ Jehova i talem se: ‘Mi mi Jehova, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.’ (Aesea 48:17) Yumi mas trastem Jehova mo akseptem ol mak we hem i putum, olsem nao yumi save mekem ol gudfala desisen. Yumi mas gat tingting daon mo tingbaot se “i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jeremaea 10:23) Adam mo ol man Isrel oli jusum blong sakemaot ol mak we Jehova i putum, mo oli folem prapa save blong olgeta. Rabis eksampol blong olgeta i tijim yumi se yumi no mas trastem save blong yumi, be yumi ‘mas trastem Jehova long olgeta tingting’ blong yumi.—Ol Proveb 3:5.

15. ?Yumi lanem wanem long Galesia 6:5?

¹⁵ Yumi mas respektem raet we ol narafala tu oli gat blong mekem prapa desisen blong olgeta. ?From wanem? From we yumi evriwan i kasem presen ya we yumi fri blong jus, taswe i no evritaem we tu Kristin i save  mekem sem desisen. Hemia i tru long saed blong ol samting we yumi mekem mo wosip blong yumi. I gud yumi tingbaot tok we i stap long Galesia 6:5. (Ridim.) Taem yumi kasem save se olgeta Kristin wanwan oli mas mekem prapa desisen blong olgeta, bambae yumi respektem raet we narafala i gat blong jus.

16, 17. (1) ?Ol Kristin long Korin oli gat wanem problem? (2) ?Olsem wanem Pol i givhan long olgeta? ?Wanem tijing we yumi kasem from?

¹⁶ Bambae yumi luk wan eksampol long Baebol, we i soemaot se from wanem yumi mas respektem raet blong ol brata blong yumi blong jus. Long kongregesen blong Korin, ol Kristin oli stap raorao from ol mit we ol man oli bin yusum blong mekem sakrefaes long ol aedol, mo biaen oli salem long maket. Sam Kristin oli harem se tingting blong olgeta i no stikim olgeta taem oli kakae mit ya, from we long olgeta, aedol i nating nomo. Be olgeta we bifo oli stap mekem wosip long ol aedol, oli harem se sipos oli kakae mit ya, hemia i olsem we oli mekem wosip long ol aedol ya. (1 Korin 8:4, 7) Hemia wan bigfala samting we i save mekem kongregesen i seraot. ?Pol i givhan olsem wanem long ol Kristin blong oli stretem problem ya?

¹⁷ Fastaem, Pol i mekem olgeta evriwan oli tingbaot se kakae i no save mekem oli fren gud wetem God. (1 Korin 8:8) Biaen, hem i givim woning long olgeta se oli no mas letem raet blong olgeta blong “jusum” samting, i spolem tingting blong olgeta we oli no strong. (1 Korin 8:9) Afta, hem i talem long olgeta we tingting blong olgeta i stikim olgeta, se oli no mas jajem olgeta ya we oli jusum blong kakae ol mit ya. (1 Korin 10:25, 29, 30) Taswe, taem yumi wantem mekem wan impoten desisen long saed blong wosip blong yumi, yumi wanwan i mas mekem prapa desisen blong yumi. From samting ya, i gud yumi respektem raet blong ol brata blong yumi, taem oli mekem ol desisen long ol bigfala samting mo long ol smosmol samting tu.—1 Korin 10:32, 33.

18. ?Bambae yu mekem wanem blong soemaot se yu tinghae long presen ya?

¹⁸ Jehova i givim presen ya we yumi fri blong jus, mo presen ya i mekem se yumi fri. (2 Korin 3:17) Yumi lukaotgud long presen ya, from we i givim janis long yumi blong mekem ol desisen we oli soemaot se yumi lavem Jehova. Taswe, i gud yumi gohed blong jusum ol samting we oli leftemap nem blong hem. Mo taem ol narafala oli jusum wan narafala rod blong yusum presen ya, i gud yumi respektem raet blong olgeta.