?Samtaem yu harem se yu no naf blong givhan long wan we i stap krae from famle blong hem we i ded? Plante taem yumi no save wanem blong talem mo mekem, ale yumi no mekem wan samting nating. Be i gat plante gudfala samting we yu save mekem blong givhan long hem.

Plante taem man we i stap krae from dedman i nidim nomo we yumi stap wetem hem mo yumi soemaot se yumi sore. Long plante kantri, man i putum han blong hem i goraon long narafala, no i holem han blong hem, blong soemaot se hem i sore. Sipos man we i krae from dedman i wantem toktok, i gud yu lesin long hem mo yu soemaot sore. Plante taem i moa gud yu mekem wan samting we hem i no naf blong mekem, olsem kukum kakae, lukaot long pikinini, no mekem rere blong berem dedman sipos hem i wantem. Ol samting we yu mekem, oli save givhan moa long man we i krae, i bitim ol tok sore.

Afta we taem i pas, maet yu tokbaot sam gudfala fasin blong man ya we i ded, mo sam gudfala samting we hem i mekem long laef blong hem. Ol stori olsem oli save mekem man we i harem nogud i laf smol. Pam, we man blong hem Yan i ded sikis yia finis, i talem se: “Samtaem ol man oli talem sam gudfala samting we Yan i mekem, we mi mi no save long olgeta. Samting ya i mekem mi mi harem gud tumas.”

 Sam man blong stadi oli talem se plante man we oli stap harem nogud from man we i ded, oli kasem plante help, be i blong smoltaem nomo. Taem ol fren blong olgeta oli bisi bakegen long ol samting long laef blong olgeta, oli no moa givhan long olgeta. Taswe i gud yu gohed oltaem blong toktok wetem man we famle blong hem i ded. a Plante man we oli harem nogud from wan famle we i ded, oli glad tumas taem yumi mekem olsem, from we oli gat janis blong talemaot ol tingting we oli stap mekem olgeta oli harem nogud.

Yu traem tingbaot Kaori, wan yangfala woman blong Japan. Hem i harem nogud tumas from we mama blong hem i ded, mo 15 manis biaen sista blong hem tu i ded. Hem i glad tumas we ol fren blong hem oli gohed nomo blong givhan long hem. Wan long olgeta, nem blong hem Ritsuko, i olfala moa long Kaori. Nating se i olsem, hem i askem long Kaori sipos i save kam fren blong hem. Kaori i talem se: “Blong talem stret, mi mi no glad long samting ya. Mi no wantem se wan narafala woman i tekem ples blong mama blong mi, mo mi no ting se i gat wan woman we i gud olsem mama blong mi. Be Mama Ritsuko i mekem i gud tumas long mi, nao mi laekem hem tumas. Evri wik, mitufala i go prij tugeta, mo mitufala i go long miting tugeta. Hem i singaot mi mi go dring ti wetem hem, hem i karem kakae i kam long mi, mo plante taem hem i raetem leta long mi. Gudfala fasin blong Mama Ritsuko i givhan bigwan long mi.”

Naoia, mama blong Kaori i ded 12 yia finis. Mo Kaori wetem man blong hem, tufala i wok fultaem blong tijim ol man long Baebol. Kaori i talem se: “Mama Ritsuko i stap gohed yet blong tingbaot mi. Taem mi gobak long ples blong mi, mi go luk hem, mo mi harem gud blong storian wetem hem bakegen.”

Wan Witnes blong Jehova long Saepras, nem blong hem Poli, hem tu i harem gud taem ol fren blong hem oli gohed nomo blong tingbaot hem taem man blong hem i ded. Man blong Poli we nem blong hem, Sojos, i kaen tumas, mo i soemaot gudfala eksampol long ol Kristin man we oli lukaot long ol sipsip blong God. Oltaem hem i singaot ol yangfala we oli no gat papa mo mama, mo ol wido, oli kam long haos blong hem, blong kakae mo storian. (Jemes 1:27) Sore tumas, taem Sojos i gat 53 yia nomo, hem i ded from kansa blong bren. Poli i talem se: “Mi lusum gudfala man blong mi, we i lukaot gud long mi long ol 33 yia we mitufala i mared.”

Afta we oli berem Sojos, Poli i muf i go long Kanada wetem lasbon boe blong hem Daniel, we i gat 15 yia. Tufala i joen wetem kongregesen blong ol Witnes blong Jehova long ples ya. Poli i talem se: “Ol fren long kongregesen ya oli no save long ol trabol we mitufala i kasem. Be oli storian wetem mitufala, oli talem ol gudfala toktok we i leftemap tingting, mo oli mekem plante samting blong givhan long mitufala. !Fasin blong olgeta i gud tumas, antap moa, long taem ya we boe blong mi i nidim tumas papa blong hem! Olgeta we oli lukaot long kongregesen oli stap tingbaot Daniel. Wan long olgeta i singaot Daniel oltaem, taem hem i go joen wetem ol fren blong hem, mo taem oli go plei futbol.” Naoia, Poli wetem boe blong hem, tufala i stap gohed gud.

Yes, i gat plante rod blong givhan long olgeta we oli krae from dedman mo leftemap tingting blong olgeta. Mo tu, Baebol i mekem nambawan promes blong wan gudfala samting we bambae i hapen long fiuja.