LAEF tede i no olsem God i wantem. Hem i wantem se wol i fulap long ol man we oli wantem stap aninit long rul blong hem, letem hem i lidim olgeta, mo soemaot ol gudfala fasin olsem hem. Hem i wantem se ol man oli harem gud blong stap wanples wetem ol famle blong olgeta, faenemaot ol niufala samting, mo mekem fulwol i kam paradaes.

• “Hem i stap mekem ol faet i finis long olgeta ples long wol.”—Ol Sam 46:9.

• “Stret taem i kam blong yu . . . spolem ol man ya we oli stap spolem wol.” —Revelesen 11:18.

• “Bambae i no moa gat man . . . we i save talem se hem i sik” —Aesea 33:24.

• “Ol samting we olgeta oli hadwok long hem, bambae oli save harem gud long hem longtaem.”—Aesea 65:22.

?Olsem wanem ol profet tok ya bambae oli kamtru? God i putumap Pikinini blong hem Jisas, i kam King blong wan gavman long heven, we bambae i rulum wol. Baebol i singaot gavman ya se Kingdom blong God. (Daniel 2:44) Baebol i tokbaot Jisas se: ‘God bambae i givim jea blong king long hem, mo bambae hem i rul.’—Luk 1:32, 33.

Taem Jisas i stap long wol, hem i mekem plante merikel blong soemaot se taem we hem i rulum wol, bambae hem i mekem laef blong ol man i kam gud moa.

• Taem hem i tekemaot ol sik, hem i soemaot olsem wanem bambae hem i finisim sik blong ol man. —Matiu 9:35.

• Taem hem i mekem solwota i kwaet, hem i soemaot se hem i save kontrolem win mo ol narafala samting olsem, blong protektem ol man. —Mak 4:36-39.

• Taem hem i givim kakae long plante taosen man, hem i soemaot se hem i naf blong givim evri samting we ol man oli nidim blong laef.—Mak 6:41-44.

• Taem hem i mekem wota i kam waen long wan lafet blong mared, hem i soemaot se bambae hem i givhan long ol man blong oli harem gud long laef.—Jon 2:7-11.

?Olsem wanem yu save kasem laef ya we God i wantem givim long olgeta we oli lavem hem? I gat wan “rod” we yu mas folem. Baebol i talem se hemia ‘rod we i lidim man i go long laef, mo smol man nomo oli faenem.’—Matiu 7:14.

?Wanem rod ya blong laef? Hemia olgeta samting we God i talem long yumi blong mekem. Hem i se:  “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.” (Aesea 48:17) Sipos yu folem rod ya, bambae yu kasem laef we i beswan.

Jisas i talem se: “Mi nao rod ya, mo mi nao trutok ya, mo mi nao laef ya.” (Jon 14:6) Sipos yu bilif long ol trutok we Jisas i tijim mo yu folem eksampol blong hem, bambae yu kam klosap long God mo mekem laef blong yu i kam gud moa.

?Olsem wanem yu save faenem rod blong laef? I gat plante skul, be Jisas i givim woning se: “I no evri man we oli stap singaot mi se ‘Masta, Masta,’ we bambae oli go insaed long Kingdom blong heven. Olgeta nomo we oli stap mekem samting we Papa blong mi long heven i wantem, bambae oli go.” (Matiu 7:21) Hem i talem tu se: “Bambae yufala i luksave olgeta long frut blong laef blong olgeta.” (Matiu 7:16) Baebol i save givhan long yu blong yu luksave trufala skul, mo olsem wanem hem i defren long ol giaman skul.—Jon 17:17.

?Olsem wanem yu save folem rod blong laef? Yu mas save gud Man we i Stamba blong laef: ?Hem i hu? ?Wanem nem blong hem? ?Wanem ol fasin blong hem? ?Hem i stap mekem wanem naoia? ?Hem i wantem se yu mekem wanem? *

God i wantem se yu mekem moa i bitim we yu wok, kakae, pleplei, mo lukaot long ol pikinini blong yu. Yu yu naf blong kasem save long hem mo kam fren blong hem. Yu soemaot se yu lavem hem taem yu mekem samting we hem i wantem. Jisas i talem se: “Laef ya we i no save finis, hemia se man i gohed blong save yu we yu nomo yu tru God.”—Jon 17:3.

Blong mekem trufala God i glad, maet yu mas mekem sam jenis long laef blong yu. Ating hemia i had. Be sipos yu folem rod ya, bambae yu harem gud. Yu nomo yu mas tekem fas step. Blong kasem ansa long ol impoten kwestin long saed blong God, ol Witnes blong Jehova oli glad blong mekem wan fri Baebol stadi wetem yu, long taem mo ples we i stret long yu. Yu save askem stadi ya long websaet ya www.mr1310.com.