BITIM 3,000 yia bifo, Job i luksave se ol pijin oli tijim yumi long plante samting. Oli soemaot se God i waes tumas taem hem i wokem olgeta. Mo ol man oli yusum fasin blong ol pijin ya tu olsem pijatok mo eksampol. Plante taem, Baebol i tokbaot ol pijin blong tijim yumi long fasin blong yumi blong fren gud wetem God, mo blong tijim yumi long sam impoten lesen long laef. Hemia sam eksampol.

Ol man long Jerusalem oli savegud pijin ya swalo, from we oltaem oli stap mekem nes blong olgeta long saed blong wol, aninit long ruf blong haos. Sam oli mekem nes blong olgeta long haos tempol blong Solomon. Ol swalo we evri yia oli stap mekem nes blong olgeta long haos tempol, oli luk se ples ya i sef mo i no gat samting i save spolem pikinini blong olgeta.

Evri sikis manis, taem pikinini blong Kora we i raetem Ol Sam 84, i kam wok wan wik long haos tempol, hem i luk nes blong ol pijin ya. Hem i wantem tumas blong stap oltaem long haos blong Jehova olsem ol pijin ya, nao hem i talem se: “Hae God. Yu yu gat olgeta paoa. !Mi mi laekem haos blong yu tumas! !Mi wantem tumas blong go stap long hem! Hae God, mi wantem tumas blong stap oltaem long haos blong yu. . . . Hae God, yu yu gat olgeta paoa. Yu yu King blong mi, yu yu God blong mi. Ol smosmol pijin ya we oli smol tumas, be oli stap mekem nes blong olgeta long haos blong yu, mo oli stap lukaot long ol pikinini blong olgeta klosap long olta blong yu.” (Ol Sam 84:1-3) ?Olsem wanem? ?Yu wetem ol pikinini blong yu, yufala i gat sem tingting ya blong joen oltaem wetem ol man blong God long ol miting?​—Ol Sam 26:8, 12.

Profet Jeremaea i raetem se: ‘Pijin ya stok i savegud stret taem’ blong hem. Profet ya i savegud we evri yia ol stok oli stap pastru long Promes Lan, taem oli stap ronwe long koltaem. Taem ol tri oli putum flaoa, bitim 300,000 waet stok oli flae long Afrika, oli krosem Jodan Vali blong go long not blong Yurop. Wan samting long bodi blong olgeta, i mekem oli haremsave se hot taem i kam, mo oli mas gobak long ples we oli bon long hem, blong oli putum eg blong olgeta. Olsem ol narafala pijin we oli stap flae i go long ol narafala ples, olgeta oli save gud “stret taem blong oli ronwe long koltaem.”​—Jeremaea 8:7.

Wan buk (Collins Atlas of Bird Migration) i talem se: “Samting we yumi sapraes long hem, hemia se ol pijin oli haremsave wetaem oli mas aot, mo wetaem oli mas kambak.” Jehova God i givim waes long ol pijin, blong oli haremsave stret taem blong ronwe long koltaem. Be hem i mekem ol man oli naf blong luksave ol defdefren saen we oli stap hapen long ol defdefren taem. (Luk 12:54-56) Ol man oli no sem mak long ol stok. Save blong God nao i givhan long olgeta blong oli luksave mining blong ol samting we oli stap hapen tede. Ol man Isrel long taem blong Jeremaea oli no luksave nating ol saen ya. God i eksplenem risen blong samting ya, i se: “Oli tanem baksaed long ol tok blong mi finis. . . .  Waes ya blong olgeta i nogud, i no save givhan long olgeta nating.”—Jeremaea 8:9.

Tede i gat plante pruf we i soemaot se yumi stap laef long wan taem we Baebol i kolem se ‘ol las dei.’ (2 Timoti 3:1-5) ?Olsem wanem? ?Bambae yu yu folem fasin blong stok blong luksave taem we yumi laef long hem naoia?

Baebol i tokbaot igel plante taem, mo ol man long Promes Lan oli stap luk hem oltaem. Baebol i talem se ol igel oli mekem nes blong olgeta antap long ol klif, mo long ples ya ‘ae blong olgeta i stap lukluk i go longwe’ blong “faenem sam samting we oli save go kilim blong kakae.” (Job 39:27-29) Ae blong olgeta i wok gud tumas, taswe nating we wan rabet i stap 1 kilometa longwe, be oli naf blong luk.

Ol igel oli save lukluk i ‘go longwe,’ long sem fasin Jehovah i naf blong lukluk i go long fiuja. From samting ya, Jehova God i talem se: “Bifo olgeta, long stat blong olgeta samting, mi mi talemaot fastaem ol samting we biaen oli hapen. Bifo finis, mi mi talemaot ol samting we biaen oli kamtru.” (Aesea 46:10) Sipos yumi lesin long ol advaes blong Jehova, waes blong hem bambae i mekem i gud long yumi.​—Aesea 48:17, 18.

Baebol i tokbaot olgeta we oli trastem God se oli olsem ol igel, i se: “Olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta i stap mekem olgeta oli strong bakegen. Bambae oli girap olsem we oli gat wing olsem bigfala pijin ya igel.” (Aesea 40:31) Taem i gat hot win i kamaot long graon i go antap, wan igel i save folem blong go antap. Taem igel ya i stap insaed long hot win ya, hem i openem tufala wing blong hem mo i goraon long win ya nomo, nao hem i save go antap we antap. Igel i dipen long hot win ya blong karem hem i go longwe mo go antap, be hem i no dipen long wing blong hem mo paoa blong hem. Long sem fasin, olgeta we oli trastem Jehova oli mas lukluk i go long hem nomo, from we hem i promes blong givim “paoa ya we i bigwan tumas” long olgeta.​—2 Korin 4:7, 8.

Smoltaem bifo we Jisas i ded, hem i stap lukluk i go long Jerusalem, nao i talem se: “!Oo, ol man Jerusalem, ol man Jerusalem! !Sore tumas long yufala! Yufala i stap kilim ol profet oli ded, mo yufala i stap stonem ol man blong karem tok blong God oli ded. Plante taem, mi mi wantem putum han blong mi i goraon long yufala, olsem we faol i pulum ol pikinini blong hem oli kam haed aninit long wing blong hem, be yufala i no glad.”​—Matiu 23:37.

Wan samting we ol pijin oli strong blong mekem, hemia blong protektem ol pikinini blong olgeta. Ol pijin we oli mekem nes blong olgeta long graon, olsem ol faol, oli mas lukaotgud from ol denja. Taem mama faol i luk pijin blong faol i stap flae antap, kwiktaem nomo hem i givim woning long ol pikinini blong hem, nao kwiktaem nomo oli resis i kam haed aninit long wing blong hem. Mo tu, taem i gat hot san mo bigfala ren, oli kam haed aninit long wing blong mama blong olgeta. Long sem fasin, Jisas tu i wantem protektem mo lukaotgud long ol man Jerusalem, blong oli fren gud wetem God. Tede, Jisas i wantem protektem yumi long ol baden mo wari blong laef, taswe hem i singaot yumi blong yumi kam long hem.​—Matiu 11:28, 29.

I tru tumas, yumi save lanem plante samting from ol pijin. Taem yu stap luklukgud fasin blong olgeta, i gud yu traem tingbaot sam vas we i yusum olgeta olsem eksampol. I gud pijin ya swalo i givhan long yu blong laekem haos blong Jehova. I gud yu trastem God blong i givim hop long yu, nao yu save girap olsem we yu gat wing blong igel. I gud yu kam long Jisas blong kasem ol trutok we i save protektem yu, olsem wan mama faol i mekem long ol pikinini blong hem. Mo i gud pijin ya stok i mekem yu tingbaot blong stap wekap mo luksave ol saen blong ol samting we oli stap hapen long taem blong yumi tede.