I no isi blong faenem wan gudfala presen blong givim long wan man. Antap long hemia, man we i kasem presen nao bae i jes luk sipos presen ya i gud o i nogud. Mo tu, maet wan man i luk se wan presen i gud, be i no min se wan narawan bae i gat sem tingting long presen ya.

Eksampol, wan yangfala i harem se wan mobaelfon we i jes kamaot, bae i wan gudfala presen. Be maet wan bigman bae i harem gud moa sipos hem i kasem wan presen we famle blong hem i pasem long hem. Long sam kalja, presen we ol yangfala mo olfala oli laekem, hemia mane, from we oli save yusum mane ya blong pem wanem we oli wantem.

Nating se i had, sam man we oli tingting gud oli tingbaot sam rod blong givim wan gudfala presen. I tru se i no isi blong faenem wan gudfala presen, be yumi save tingbaot sam rod we oli save givhan long yumi blong givim wan gudfala presen. Bambae yumi tokbaot fo rod blong givim wan presen we i mekem man we i kasem i glad.

Samting we man i wantem. Wan man Belfas, not blong Ireland, i talem se baskel blong resis we hem i kasem taem hem i gat 10 o 11 yia, i wan beswan presen we hem i kasem. ?From? Hem i se: “From we mi wantem tumas.” Stori ya i soem se, sipos yumi givim samting we man i wantem, bae hem i glad tumas long presen ya. Taswe, i gud blong tingbaot man we yu wantem givim presen long hem. Tingbaot samting we hem i wantem, from we hemia nao samting we bae hem i glad tumas long hem. Eksampol, ol olfala oli glad blong spenem taem wetem ol famle. Maet oli wantem luk ol pikinini mo ol smol bubu blong olgeta oltaem. Taswe, sipos famle i go spel tugeta wetem ol olfala blong olgeta, ating bae ol olfala ya oli glad moa i bitim we oli glad long wan narafala presen we oli kasem.

Wan nara rod blong givim wan presen we man i wantem, hemia blong lesin gud. Baebol i talem se: “Evri man i mas rere oltaem blong lesin, i no mas hareap blong toktok.” (Jemes 1:19) Taswe, taem yu  stap storian wetem ol fren o famle blong yu, i gud yu lesin gud long wanem we oli laekem o oli no laekem. Long rod ya, bae yu save givim wan gudfala presen we bae oli glad long hem.

Samting we man i nidim. Man i save glad tumas long wan presen we i stret long nid blong hem, nating se presen ya i smol, mo i no sas. ?Be olsem wanem blong save samting we man i nidim?

Wan isi rod blong save samting we wan man i nidim, hemia blong askem stret long hem se, hem i nidim wanem o i wantem wanem. Be plante man oli no glad blong mekem olsem, from we oli laekem moa blong mekem sapraes long man. Mo tu, i gud blong tingbaot se sam man oli fri blong talemaot long yu wanem we oli laekem o wanem we oli no laekem, be plante taem, oli no save talemaot stret long yu samting we oli nidim.

I gud blong savegud tu laef blong man. ?Hem i yangfala, i olfala, i singel, i mared, i divos, i wido, i wok, o i ritae long wok? Long rod ya yu save givim wan presen we i stret long nid blong man we yu wantem givim presen long hem.

Blong save nid blong man we bae yu givim presen long hem, i gud yu storian wetem ol narafala we sem samting i hapen long laef blong olgeta. Maet bae oli save talemaot long yu wanem we oli nidim we plante man oli no save long hem. Sipos yu mekem olsem, bae yu givim wan presen we i stret long nid blong man ya.

Stret taem blong givim presen. Baebol i talem se: “Sipos man i save givim gudfala tok long stret taem blong hem, bambae hem i save harem gud.” (Ol Proveb 15:23) Vas ya i soem se, tok we yumi talem long stret taem i save mekem i gud long ol man, i save mekem hem i harem gud. Hemia i sem mak tu long ol aksen blong yumi. Sipos yumi givim presen long stret taem, yumi save mekem man we i kasem presen i harem glad tumas.

Wan fren bae i mared. Wan yangfala bae i graduet long skul. Bae wan hasban mo waef i gat wan bebi. Hemia sam long ol taem blong givim presen. Samfala oli luk se i gud blong mekem lis blong ol spesel dei olsem, we bae i kamaot long ol yia we i kam. Long rod ya, oli save mekem plan se bae oli givim wan presen we i stret long spesel dei ya. *

I no nid blong givim presen long wan spesel dei nomo. Man i save glad sipos i givim presen enitaem. Be i gud blong lukaot gud tu taem yu wantem givim presen. Eksampol, sipos wan man i givim wan presen long wan woman we i no gat gudfala risen blong givim presen olsem, maet woman ya i save ting se presen we man ya i givim i wan saen we i soem se man ya i wantem save hem moa. Maet samting ya i tru, be samtaem ol presen olsem oli save mekem man i konfius. Samting ya i pulum yumi blong tingbaot wan narafala impoten samting, hemia samting we i pusum man blong i givim presen.

Samting we i pusum man blong i givim presen. Olsem eksampol we yumi tokbaot finis, i gud blong tingbaot se man we bae yu givim presen long hem, i no mas konfius long presen we yu givim. Taswe, man we i givim presen i mas tingting gud long samting we i pusum hem blong givim presen. Plante man oli ting se, samting we i pusum olgeta blong givim presen hemia blong soem ona long man. Be samfala oli givim presen long wan spesel dei jes from we oli harem se oli mas mekem, o narafala i fosem olgeta blong givim presen. Sam narafala oli givim presen from we oli wantem se narafala i mekemgud long olgeta o i givimbak wan samting long olgeta.

?Yu save mekem wanem blong meksua se tingting we i pusum yu blong givim presen i stret? Baebol i talem se: “Long olgeta samting we yufala i mekem, yufala i mas mekem wetem lav.” (1 Korin 16:14) Sipos samting we i pusum yu blong givim presen hemia se yu gat lav mo yu tingbaot narafala, bae man we yu givim presen long hem i glad tumas, mo yu tu bae yu glad tumas long presen we yu givim long glad hat blong yu. Taem yu givim wan presen we i kamaot long hat, yu mekem tu se Papa blong yu long heven, Jehova, i glad. Aposol Pol i talem gudfala toktok long ol Kristin long Korin we oli glad blong givhan  mo givim samting long ol Kristin blong Judia. Hem i talem tu se: “God i lavem man we i glad blong givim samting.”—2 Korin 9:7.

Sipos yu folem ol rod ya we yumi tokbaot finis, hemia bae i givhan bigwan blong mekem se presen we yu givim long ol narafala i save mekem oli glad. Jehova i folem ol rod ya mo sam narafala rod tu taem hem i givim wan presen we i gud moa long ol narafala presen. Mifala i invaetem yu blong ridim nekis haf blong luk se presen ya hem i wanem.