PLANTE yia finis, ol man we oli agensem Baebol, oli talem se i no gat wan king we nem blong hem Belsasa. (Dan. 5:1) Oli gat tingting ya from we ol man blong digim graon oli no faenem sam samting blong pruvum se i gat wan king olsem. Be samting ya i jenis long 1854. ?Wanem i hapen?

Long yia ya, wan haeman blong Inglan, nem blong hem J. G. Teila, i faenem sam olfala haos long taon blong Uru bifo, we naoia i stap long saot Irak. Long wan bigfala taoa, hem i faenem sam ston we oli longfala olsem 10 sentimeta, mo oli katem ol raeting blong bifo long olgeta. Long wan ston, oli raetem wan prea blong askem se King blong Babilon we nem blong hem Nabonidas mo fasbon boe blong hem Belsasa, bambae tufala i gat wan longfala laef. Ston ya i pruvum long ol man we oli agensem Baebol se Belsasa i laef bifo.

Baebol i talem tu se Belsasa i wan king. Bakegen, ol man we oli agensem Baebol, oli no agri. Wan long olgeta, hemia wan saentis blong Inglan long ol yia 1800, nem blong hem Wiliam Talbot. Hem i tokbaot samfala we oli talem se “Bel-sar-ussur [Belsasa] i rul wetem papa blong hem, Nabonidas. Be i no gat wan pruf blong soemaot samting ya.”

Be long wan narafala ston, oli faenem ol raeting we i soemaot se samtaem King Nabonidas, we i papa blong Belsasa, i stap aot long Babilon blong plante yia. ?Wanem i hapen long taem ya? Buk ya Encyclopaedia Britannica i talem se: “Taem Nabonidas i aot long kantri, hem i putumap Belsasa blong i rul olsem king, mo blong lukaot long bighaf blong ami blong hem.” Taswe long taem ya, Belsasa i tekem ples blong papa blong hem, blong rulum Babilon olsem king. From samting ya, wan man blong digim graon mo stadi long ol lanwis, nem blong hem Alan Milad, i talem se i stret nomo we “Buk blong Daniel i singaot Belsasa se ‘king.’”

Be impoten samting we i pruvum long ol man blong God se buk blong Daniel i kamaot long God mo yumi save trastem, hemia se buk ya i stap long Baebol.—2 Tim. 3:16.