?From Wanem Ol Man Oli No Moa Gat Respek Long Famle?
I IMPOTEN BLONG GAT RESPEK LONG FAMLE
Taem hasban, waef, mo ol pikinini oli gat respek insaed long famle, bambae evriwan oli harem se oli sef mo oli gat pis.
-
Buk ya The Seven Principles for Making Marriage Work i talem se taem hasban mo waef i gat respek, bambae tufala i mekem “ol smosmol samting evri dei” blong soemaot se tufala i lavlavem tufala, be i no long ol spesel taem nomo.
-
Ol man blong mekem risej oli faenemaot se ol pikinini we oli lanem blong respektem narafala, bambae oli respektem olgeta wan, oli joen gud wetem ol perens blong olgeta, mo tingting blong olgeta i no trabol.
SAMTING WE YU SAVE MEKEM
Joen wetem famle blong mekem wan plan. Faswan samting, i gud evriwan oli kasemsave se “respek” i minim wanem. Nambatu, raetemdaon ol samting we wanwan memba blong famle i mas mekem mo ol samting we oli no mas mekem. Nambatri, tokbaot plan ya tugeta blong evriwan i save samting we oli mas mekem blong soemaot respek long ol narafala.
Soemaot gudfala eksampol. ?Yu yu stap tok nogud long ol famle blong yu taem oli mestem? ?Yu yu stap jikim olgeta from samting we oli talem? o ?Yu yu stap katem toktok blong olgeta o yu no lesin taem oli stap toktok?
Tingbaot: I impoten blong soemaot respek long hasban o waef mo ol pikinini blong yu, nating sipos yu harem se olgeta oli no respektem yu.
Soemaot respek nating se yu no agri wetem narafala. Taem yu stap talem tingting blong yu, i nogud yu yusum ol toktok olsem “oltaem yu” o “yu neva.” Eksampol, “oltaem yu talem se yu bisi” o “yu neva halpem mi.” Ol strong tok olsem i save mekem famle blong yu i harem nogud, mo i save mekem wan bigfala rao i kamaot.
SAMTING WE MIFALA I STAP MEKEM
Mifala ol Witnes blong Jehova, mifala i wokem ol video, ol atikol, ol buk, mo ol magasin we oli givhan long ol man blong soemaot respek insaed long famle. Ol samting ya oli fri nomo.
OLGETA WE OLI MARED: Ol advaes we oli stap kamaot oltaem long haf ya Advaes Long Famle i save givhan long hasban mo waef blong tufala i . . .
-
lesin gud long tufala
-
blokem fasin ya blong no wantem toktok
-
no moa raorao
(Go long jw.org mo lukaotem haf ya “Advaes Long Famle”)
OL PAPA MO MAMA: Ol advaes we oli stap kamaot oltaem long haf ya Advaes Long Famle i save givhan long papa mo mama blong tijim pikinini blong . . .
-
obei
-
mekem ol wok long haos
-
talem “plis” mo “tangkiu”
(Go long jw.org mo lukaotem ol haf ya “Lukaot Long Pikinini” mo “Lukaot Long Ol Yangfala”)
Mo tu, yu save ridim ol atikol ya “Sikis Lesen We Pikinini i Mas Lanem” we i stap long Wekap! N.2 2019, mo “12 Rod Blong Gat Wan Hapi Famle” we i stap long Wekap! N.2 2018 long pej 8-11. (Lukaotem long jw.org)
OL YANGFALA: Long jw.org long haf ya Ol Yangfala, i gat ol atikol, ol video, mo ol pepa blong fulumap we i save givhan long ol yangfala blong . . .
-
joen gud wetem papa mama mo ol brata mo sista blong olgeta
-
toktok wetem respek long papa mo mama long saed blong ol rul we tufala i putum
-
mekem se papa mo mama i trastem olgeta
(Go long jw.org mo lukaotem haf ya “Advaes Long Ol Yangfala”)
Websaet ya jw.org i fri nomo. Yu no nid blong kam wan memba blong yu save go long websaet ya, mo bambae oli no askem ol pesnel infomesen blong yu.
