?From Wanem Ol Man Oli No Moa Gat Respek Long Ol Narafala?
I IMPOTEN BLONG RESPEKTEM OL NARAFALA
Taem yumi respektem ol narafala, hemia i mekem se oli no kros mo yumi joen gud moa wetem olgeta.
-
Wan waestok blong Baebol i talem se: “Ansa we i kaen, i mekem man i no moa kros, be toktok we i no kaen, i mekem man i kros moa.” (Ol Proveb 15:1) Ol toktok mo aksen we i no soemaot respek i olsem bensin we man i kafsaedem long wan faea, we i save mekem se wan problem i kam mowas.
-
Jisas i talem se: “Taem man i tok, hem i stap talemaot ol samting we hat blong hem i fulap long hem.” (Matiu 12:34) Taem yumi talem ol nogud tok long olgeta we oli kamaot long ol defren kantri, defren aelan, mo we laef blong olgeta i defren long yumi, hemia i soemaot se yumi gat nogud tingting long olgeta.
I no longtaem i pas, oli askem kwestin long bitim 32,000 man long 28 kantri, mo 65 pesen blong olgeta oli talem se tede fasin blong no respektem narafala i kam antap bigwan.
SAMTING WE YU SAVE MEKEM
Respektem evriwan long wok o long skul, nating sipos yu no agri long tingting blong olgeta. Traem faenemaot samting we yufala i save agri long hem. Hemia bambae i halpem yu blong no jajem olgeta.
Mekem i gud long ol narafala olsem we yu wantem se oli mekem long yu. Sipos yu kaen mo yu mekem i gud long ol narafala, bambae olgeta tu oli mekem i sem mak long yu.
Fogivim narafala. Taem ol narafala oli talem o mekem sam samting we i no soemaot respek, yu no mas hariap blong kros.
SAMTING WE MIFALA I STAP MEKEM
Mifala ol Witnes blong Jehova, mifala i respektem ol man mo mifala i givhan long ol narafala long komuniti tu blong oli gat respek.
Mifala i serem ol advaes blong Baebol we i fri nomo long olgeta man. Be mifala i no fosem ol man blong oli folem bilif mo tingting blong mifala. Mifala i traehad blong folem advaes ya blong Baebol we i se yumi mas toktok “long kwaet fasin mo bigfala respek.”—1 Pita 3:15; 2 Timoti 2:24.
Mifala i lavem olgeta man, taswe mifala i invaetem ol man blong ol defdefren kantri, aelan, mo lanwis, blong oli kam long ol miting blong mifala. Mifala i traehad blong gat stret tingting long ol narafala mo “respektem olgeta man.”—1 Pita 2:17, New International Version.
Mifala i respektem gavman nomata wanem ples mifala i laef long hem. (Rom 13:1) Mifala i obei long ol loa mo pem ol takis. Mo nating se mifala i no joen long politik, be mifala i respektem raet we ol narafala oli gat blong mekem ol defdefren desisen long saed blong politik.