?Tingting We Yu Yu Gat Long Narafala i Olsem Tingting Blong Jeova?

“Ol haf blong bodi blong yumi oli no save seraot. Evri haf blong bodi oli mas lukaot gud blong givhan long ol narafala haf blong hem.”—1 KOR. 12:25.

1. ?Yu yu harem olsem wanem taem yu kam insaed long paradaes long saed blong spirit?

TAEM yumi jes stat blong joen wetem ol man blong Jeova mo yumi lego rabis wol ya, yumi glad tumas blong haremgud long lav mo fasin kea we oli gat. Yes, oli defren olgeta long ol man we oli stap aninit long paoa blong Setan, tingting blong ol man ya i doti, oli no laekem narafala mo oli man blong rao. Yumi kam insaed long paradaes ya long saed blong spirit we ol man blong hem oli gat pis mo oli joengud tugeta.—Aes. 48:17, 18; 60:18; 65:25.

2. (a) ?Wanem nao i save gat paoa long tingting we yumi gat long ol brata sista? (b) ?Naoia i stret taem blong yumi mekem wanem?

² Be from we yumi sinman, sloslo maet yumi lusum gudfala tingting we yumi gat long ol brata sista blong yumi. Sin we yumi kasem long Adam mo Iv i save mekem se yumi lukluk moa ol slak fasin blong ol brata sista i bitim we yumi luk ol gudfala fasin blong Jeova we oli stap soemaot. Yes, yumi no moa tingbaot olgeta olsem Jeova i stap tingbaot olgeta. Sipos samting ya i stap hapen long yumi, naoia i stret taem blong jekemap tingting blong yumi, mo traehad blong mekem i laenap wetem tingting blong Jeova.—Eks. 33:13.

Tingting We Jeova i Gat Long Ol Brata Sista

3. ?Baebol i tokbaot Kristin kongregesen olsem wanem samting?

³ Olsem yumi ridim long 1 Korin 12:2-26, aposol  Pol i tokbaot kongregesen blong ol Kristin we tabu spirit i makemaot olgeta se oli olsem wan bodi we i gat “plante haf” blong hem. Ol haf blong bodi blong yumi oli no sem mak, oli mekem ol defdefren wok. Long sem fasin, ol memba blong kongregesen oli no sem mak, evriwan i gat ol defren fasin blong hem mo ol defren wok we oli naf blong mekem. Nating se evriwan i defren, Jeova i glad long olgeta evriwan. Hem i lavem olgeta wanwan mo evriwan i sas long tingting blong hem. Taswe, Pol i givim advaes ya long yumi ol memba blong kongregesen se yumi “mas lukaot gud blong givhan long ol narafala haf” blong yumi. Maet samting ya i had blong mekem from we fasin blong narafala i defren long fasin blong yumi.

4. ?From wanem maet yumi nidim blong jenisim tingting we yumi gat long saed blong ol brata blong yumi?

⁴ Maet oltaem yumi stap luk ol slak fasin blong ol brata sista blong yumi. Sipos yumi mekem samting ya, i olsem we yumi stap luk wan smol haf nomo blong wan pija. Be Jeova i no stap luk wan smol haf nomo, hem i lukluk i go moa. Yes hem i luk ful pija. Maet yumi stap luk nomo samting we yumi no laekem long fasin blong wan brata, be Jeova i lukluk olgeta fasin blong brata ya, hem i luk ol gudfala fasin tu we brata ya i gat. Moa we yumi traehad blong gat fasin olsem Jeova, moa we bambae yumi givhan blong mekem lav i gru long kongregesen mo blong mekem kongregesen i joengud.—Efes. 4:1-3; 5:1, 2.

5. ?From wanem i no stret we yumi jajem narafala?

⁵ Jisas i savegud we yumi ol sinman yumi gat fasin blong jajem narafala. Taswe hem i givim advaes ya se: “Bambae yufala i no jajem narafala man, i nogud God i jajem yufala.” (Mat. 7:1) Long lanwis we oli raetem vas ya, oli raetem we Jisas i talem se “yufala i mas stop blong jajem narafala man.” Yes, Jisas i savegud se plante long ol man we hem i stap toktok long olgeta, oli gat fasin ya finis blong jajem narafala. ?Olsem wanem? ?Yumi gat fasin ya? Sipos yumi stap mekem samting ya, yumi mas wokhad blong jenis, blong God i no jajem yumi. ?Yumi hu blong jajem wan man we Jeova nao i putumap hem blong mekem wan wok, no blong talem se i no stret we hem i pat blong kongregesen? I tru, maet wan brata i gat sam slak fasin, be sipos Jeova i letem brata ya i gohed blong mekem wok blong Hem, i no stret we yumi no wantem joen wetem brata blong yumi. (Jon 6:44) ?Olsem wanem? ?Yumi rili bilif we Jeova nao i stap lidim ogenaesesen blong hem? ?Sipos i gat sam samting we oli no stret, yumi trastem Jeova blong stretem samting ya long taem we hem i luk se i stret?—Ridim Rom 14:1-4.

6. ?Taem Jeova i lukluk ol man blong hem, hem i tingbaot wanem samting?

⁶ Wan nambawan samting long saed blong Jeova hemia se taem hem i luk wan Kristin man, hem i luksave se man ya bambae i wanem kaen man taem hem i stretgud olgeta long niufala wol. Mo tu, Jeova i save ol jenis we wan Kristin i mekem finis blong folem samting we hem i lanem long Baebol. From we Jeova i stap mekem olsem, hem i no nid blong tingbaot ol wanwan slak fasin blong yumi. Yumi ridim long Ol Sam 103:12 se: “Ol sin ya blong yumi, hem i stap tekemaot olgeta i go longwe we longwe long yumi, olsem we saed long is i stap longwe long saed long wes.” !Yumi glad tumas we hem i mekem olsem!—Sam 130:3.

7. ?Tingting we Jeova i gat long Deved i tijim wanem long yumi?

⁷ I gat pruf long Baebol blong soemaot se Jeova i gat nambawan fasin ya blong putum tingting blong hem i stap long ol gudfala fasin blong wan man. God i tokbaot Deved, i talem se: “Hem i man blong wok blong mi, we oltaem tingting blong hem i stap  strong long mi. Hem i stap obei long ol tok blong mi, mo i stap mekem ol samting nomo we i stret long fes blong mi.” (1 King 14:8) I tru yumi save se Deved i mekem sam samting we oli no stret. Be nating, Jeova i jusum blong luk ol gudfala fasin blong Deved from we hem i save se Deved i gat wan hat we i stret.—1 Kron. 29:17.

Tingbaot Ol Brata Blong Yu Olsem Jeova i Tingbaot Olgeta

8, 9. (a) ?Olsem wanem yumi save kam moa olsem Jeova? (b) ?Wanem eksampol i save givhan long yumi blong kasem save long saed ya, mo yumi lanem wanem long eksampol ya?

⁸ Jeova i save luk wanem i stap long hat blong man, be yumi no save mekem samting ya. Hemia wan gudfala risen from wanem yumi no mas jajem narafala. Yumi no naf blong save fulwan ol tingting we i pusum narafala blong mekem samting. Yumi mas traehad blong mekem olsem Jeova mo no putum tingting blong yumi i stap long ol slak fasin blong narafala, from we wan dei ol slak fasin ya bambae oli lus. ?Yumi save putum gudfala mak ya blong folem fasin blong Jeova blong no putum tingting blong yumi i stap long ol slak fasin blong narafala? Samting ya bambae i givhan long yumi blong gat pis wetem ol brata sista blong yumi.—Efes. 4:23, 24.

⁹ Tingbaot wan olfala haos we i brobrok—ol gata we oli goraon long ruf oli kamkamaot, glas windo oli brok, mo wota i spolem siling insaed long haos. Plante man we oli luk haos ya oli talem se i moa gud blong karemaot haos ya fulwan; hem i no luk naes nating. Ale wan narafala man i kam, i lukluk haos ya, be hem i luk samting we i defren olgeta. Hem i no putum tingting blong hem i stap long ol samting we oli nogud long haos ya, be hem i luk se fandesen blong haos ya i strong, ol wud mo pos blong hem oli strong yet mo hem i ting se i gat rod blong fiksimap haos ya. Ale hem i pem haos ya mo i fiksimap ol samting ya we oli brobrok mo i mekem haos ya i luk naes tumas. Naoia taem ol man oli pas long rod oli talem se haos ya i naes tumas. ?Olsem wanem? ?Yu yu save gat fasin olsem man ya we i wokhad blong fiksimap haos we i brobrok? Bitim we yu putum tingting blong yu i stap long ol slak fasin blong ol brata sista blong yu, i gud yu traem luksave gudfala fasin blong olgeta mo tingbaot se oli save kamgud moa yet taem oli gohed blong kam klosap moa long Jeova. Sipos yumi mekem olsem, bambae yumi lanem blong lavem ol brata sista blong yumi olsem we Jeova i lavem olgeta from we bambae yumi luk ol fasin blong olgeta we oli olsem ol fasin blong Jeova.—Ridim Hibrus 6:10.

10. ?Olsem wanem advaes blong Filipae 2:3, 4 i halpem yumi?

¹⁰ Advaes we aposol Pol i givim i save givhan long fasin fren we yumi gat wetem olgeta long kongregesen. Hem i talem se: “I nogud wan long yufala i tok flas, no i mekem wan samting blong leftemap hem nomo. Yufala i mas mekem tingting blong yufala i stap daon, mo yufala i mas luk ol narafala man olsem we oli gud moa long yufala. Mo yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo.” (Fil. 2:3, 4) Tingting daon bambae i halpem yumi blong gat stret tingting long narafala. Mo taem yumi intres long narafala mo yumi traehad blong luk ol gudfala fasin we hem i gat, samting ya tu bambae i givhan long yumi blong tingbaot hem olsem we Jeova i stap tingbaot hem.

11. ?Wanem jenis i mekem ol kongregesen oli jenis?

¹¹ Long taem blong yumi, ol jenis raonabaot long wol oli mekem se ol man oli muv plante. Naoia long sam bigfala taon i gat plante man blong ol defdefren kantri. Long ol man we oli muv long ples blong yumi, i gat sam we oli intres long trutok blong Baebol, mo oli joen wetem yumi blong wosipim Jeova. Olgeta ya oli “kamaot long olgeta kala, mo long olgeta kantri, mo long olgeta laen, mo long olgeta lanwis.” (Rev. 7:9) From samting ya nao, plante kongregesen i gat ol man blong ol defdefren ples blong wol oli stap long olgeta.

12. ?Oltaem yumi mas gat wanem tingting long saed blong narafala, mo from wanem samtaem samting ya i had blong mekem?

¹² Maet long kongregesen blong yumi, yumi nidim blong traehad moa blong gat stret tingting long saed blong narafala. Samting ya i mekem yumi tingbaot advaes blong aposol Pita we i talem se ‘yumi mas lavem ol brata blong yumi long fasin we i stret gud’ mo ‘yumi mas lavlavem yumi long olgeta tingting blong yumi, long fasin we i no save jenis.’ (1 Pita 1:22) Long wan grup blong ol man olsem kongregesen we i gat ol man blong ol defdefren ples blong wol long hem, samtaem i had blong lanem blong gat trufala lav. Maet kalja blong narafala brata sista i defren bigwan long kalja blong yumi. Maet sam narafala samting tu oli defren, olsem level blong edukesen blong olgeta, mane we oli gat mo ol kastom we oli gruap wetem. ?Olsem wanem? ?Samtaem yu  faenem i had blong kasem save long tingting mo fasin blong sam narafala brata sista we kalja blong olgeta i defren? Maet olgeta tu oli tingting olsem long saed blong yu. Be nating se i olsem, yumi evriwan i kasem advaes ya we i talem se: “Yufala i mas lavem olgeta evriwan long kampani blong ol brata.”—1 Pita 2:17, NW.

13. ?Wanem sam samting we maet yumi nidim blong jenisim long tingting blong yumi?

¹³ Maet yumi nidim blong mekem sam jenis long tingting blong yumi we oli halpem yumi blong mekem lav blong yumi i kam bigwan moa blong yumi save lavem olgeta brata blong yumi. (Ridim 2 Korin 6:12, 13.) ?Yu sek se samtaem yu yu talem toktok olsem “Mi mi laekem olgeta man be . . . ” mo biaen yu talemaot sam nogud fasin we yu luk se plante man blong wan kantri no laen i gat? Ol filing olsem oli soemaot we yumi nidim blong rutumaot sam nogud tingting we yumi gat yet long hat blong yumi. Yumi save askem long yumi wan se, ‘?Oltaem mi stap traehad blong save moa ol man we kalja blong olgeta i defren long kalja blong mi?’ Fasin blong jekemap yumi wan olsem i save halpem yumi blong joengud mo lavem ful famle blong ol brata sista long fulwol.

14, 15. (a) Talem eksampol blong sam man we oli jenisim tingting blong olgeta long saed blong narafala. (b) ?Olsem wanem yumi save folem fasin blong olgeta?

¹⁴ Baebol i tokbaot eksampol blong sam man we oli bin stretem tingting blong olgeta long saed ya, wan long ol man ya hemia aposol Pita. Pita i wan man Jiu, taswe hem i no stap joen wetem ol man blong ol narafala laen long haos blong olgeta. !Tingbaot filing blong hem taem Konilias, wan man we i no laen blong Isrel mo i no sakomsaes, i singaot Pita blong kam visitim hem long haos blong hem! Pita i luksave se God i wantem we ol man blong olgeta kantri oli joen long Kristin kongregesen, taswe hem i jenisim tingting blong hem. (Wok 10:9-35) Sol we i kam aposol Pol, hem tu i nidim blong mekem sam jenis mo rutumaot tingting ya blong no laekem narafala from we oli defren. Hem i talem se hem i no laekem nating ol Kristin, ‘oltaem hem i stap ronem [kongregesen] blong God, we hem i no gat sore nating.’ Be taem Jisas i stretem Pol, Pol i mekem sam bigfala jenis mo hem i lesin long advaes blong olgeta we hem nao i bin mekem i nogud long olgeta.—Gal. 1:13-20.

¹⁵ Wetem help blong tabu spirit blong Jeova yumi sua fulwan we yumi save jenisim tingting blong yumi. Sipos yumi luk se i gat sam nogud tingting we oli stap haed long yumi yet, olsem ol tingting we i daonem man blong narafala laen no kantri, i gud yumi wok strong blong rutumaot ol tingting ya mo yumi ‘traehad blong holem pis, blong yumi save joen gud oltaem’ olsem we tabu spirit i pulum yumi blong mekem. (Efes. 4:3-6) Baebol i leftemap tingting blong yumi blong “lavem ol man, from we fasin ya blong lavem man, hem i save joenemgud olgeta samting, blong oli kam wan.”—Kol. 3:14.

Gat Tingting Blong Jeova Long Wok Blong Prij

16. ?Wanem samting we Jeova i wantem long saed blong ol man?

¹⁶ Aposol Pol i raetem se: “God i stap mekem i sem  mak nomo long olgeta man.” (Rom 2:11) Jeova i plan blong ol man blong olgeta kantri oli joen blong wosipim hem. (Ridim 1 Timoti 2:3, 4.) Blong mekem plan blong hem i kamtru, Jeova i mekem rod blong “gud nius ya we i blong stap oltaem” i save go kasem ol man blong “evri kala, mo kantri, mo laen, mo lanwis.” (Rev. 14:6) Jisas i talem se: “Garen ya, hemia wol ya.” (Mat. 13:38) ?Olsem wanem samting ya i gat paoa long yu mo famle blong yu?

17. ?Olsem wanem yumi save givhan long ol defdefren kaen man?

¹⁷ I no yumi evriwan we yumi save go long ol defdefren ples farawe long wol blong talemaot mesej blong Kingdom long narafala. Be maet yumi save talemaot mesej ya long ol man blong ol defren ples long wol we oli stap long teritori blong yumi. ?Olsem wanem? ?Yumi stap rere oltaem blong tekem eni janis blong witnes long ol defdefren kaen man? ?No yumi stap gohed blong prij long ol semfala man nomo we yumi prij long olgeta plante yia finis? I gud yumi putum wan mak blong traehad blong prij long ol narafala we oli no gat janis yet blong savegud mesej blong Kingdom.—Rom 15:20, 21.

18. ?Jisas i soemaot se hem i gat wanem filing long ol man?

¹⁸ Strong filing i pusum Jisas blong wantem halpem ol man. Hem i no prij long wan ples nomo. Baebol i talem se hem i “pas long ol taon mo ol vilej.” Mo “taem hem i luk ol man we oli plante tumas, hem i sore tumas long olgeta,” mo i soemaot se hem i wantem halpem olgeta.—Mat. 9:35-37.

19, 20. ?Wanem sam rod blong soemaot we yumi gat fasin blong kea long ol defdefren kaen man olsem Jeova mo Jisas i mekem?

¹⁹ ?Wanem sam rod we yu yu save soemaot tingting we i olsem tingting blong Jisas? Samfala oli mekem wan spesel traehad blong prij long sam haf blong teritori blong olgeta we oli no prij long hem longtaem. Maet hemia long eria we ol bisnes oli stap long hem, ol ples blong spel no blong tekem transpot, mo long fored blong ol stori haos we oli lok. Sam narafala oli mekem traehad blong lanem wan niufala lanwis blong oli save prij long ol man we naoia oli muv long eria blong olgeta, no maet long ol man blong lanwis ya we oli no prij long olgeta longtaem. Sipos yumi lanem olsem wanem blong talem halo long ol man long lanwis blong olgeta, samting ya i save soemaot long olgeta we yumi intres long olgeta. ?Sipos yu no naf naoia blong lanem wan narafala lanwis, yu save leftemap tingting blong olgeta we oli stap mekem olsem? I sua se yumi no wantem mekem tingting blong olgeta i foldaon mo yumi no wantem ting se oli gat nogud tingting we i pusum olgeta blong traehad blong prij long ol man blong wan narafala kantri. Evri laef i sas long lukluk blong God, mo yumi wantem gat semfala tingting ya.—Kol. 3:10, 11.

²⁰ Sipos tingting we yumi gat long narafala i olsem tingting blong Jeova bambae yumi prij long olgeta man, nomata se laef blong olgeta i olsem wanem. Maet samfala oli no gat ples blong slip, oli doti, no i klia se laef blong olgeta i no stret folem ol rul blong God. Sipos sam man oli no kaen long yumi, yumi no mas ting se olgeta man blong kantri ya no laen ya oli olsem. Samfala oli bin mekem i nogud long Pol, be hem i no letem samting ya i blokem hem blong i no moa prij long ol narafala man blong ples ya. (Wok 14:5-7, 19-22) Hem i gat strong tingting se bambae i gat sam man we oli glad blong lesin long hem.

21. ?Sipos yu yu gat tingting we Jeova i gat long narafala, olsem wanem samting ya i save givhan long yu?

²¹ Naoia i kliagud long yumi, se yumi nidim blong gat tingting we Jeova i gat long brata sista blong yumi long kongregesen blong yumi, ful kampani blong ol brata sista long ful wol, mo ol man long wok blong prij. Moa we yumi traehad blong soemaot tingting blong Jeova, moa we bambae yumi gat pis wetem narafala mo yumi joengud wetem olgeta. Mo tu, bambae yumi naf blong halpem narafala blong lavem Jeova, we Hem i God ya we i “no save saed” wetem wan man moa i bitim wan narafala, hem i soemaot we hem i kea long olgeta man, “from we hem nomo i mekem olgeta evriwan.”—Job 34:19.

?Yu Yu Save Ansa?

• ?Yumi traehad blong no gat wanem tingting long ol brata sista blong yumi?

• ?Olsem wanem blong gat tingting blong Jeova long ol brata sista blong yumi?

• ?Wanem sam lesen we yu yu lanem long saed blong tingting we yumi mas gat long ol brata sista blong yumi blong ol defdefren ples?

• ?Taem yumi stap long wok blong prij, olsem wanem yumi save tingbaot ol man olsem Jeova i tingbaot olgeta?

[Kwestin]

[Tok blong pija long pej 26]

?Yu yu save mekem wanem blong save moa ol man blong ol narafala kalja?

[Tok blong pija long pej 28]

?Olsem wanem yu save kasem moa man wetem gud nius?