“Agensem Setan” Olsem Jisas i Bin Mekem

“Yufala i mas agensem Devel [Setan], mo hem bambae i ronwe long yufala.”—JEM. 4:7, NW.

1. ?Jisas i save wanem long saed blong fasin agens we bambae hem i kasem taem hem i kam long wol?

JISAS KRAES i save se Devel Setan bambae i agensem hem. Samting ya i klia long toktok we God i talem long snek long garen blong Iden mo long ol rabis enjel we olgeta tu oli rebel agens long God, hem i se: “Bambae mi mi mekem we yu mo woman ya [ogenaesesen blong Jeova long heven], yutufala i enemi blong yutufala, mo sid blong yu mo sid blong hem bambae tufala i enemi blong tufala. Hem [Jisas Kraes] bambae i smasem hed blong yu, mo yu bambae yu givim kil long bak blong leg blong hem daon.” (Jen. 3:14, 15, NW; Rev. 12:9) Kil we Jisas i kasem long bak blong leg blong hem daon i minim samting we i hapen taem hem i stap long wol, hemia se ol man oli kilim hem i ded. Be kil ya we i kasem Jisas i wan samting blong smol taem nomo from we Jeova i mekem hem i laef bakegen olsem wan spirit man long heven. Defren olgeta, taem Jisas i smasem hed blong Setan, samting ya bambae i kilim Setan i ded blong olwe.—Ridim Ol Wok 2:31, 32; Hibrus 2:14.

2. ?From wanem Jeova i suagud se Jisas bambae i agensem Setan mo winim hem?

² Jeova i sua fulwan se taem Jisas i kam long wol, bambae hem i finisim olgeta wok we Jeova i givim long hem mo bambae hem i agensem Setan. ?From wanem Jeova i save suagud long samting ya? From we Jeova i wokem Jisas longtaem bifo we hem i kam long wol, Jeova i luk fasin blong Jisas, mo hem i save we “nambawan man blong wok” blong hem mo ‘fasbon long ol samting we hem i wokem,’ i gat fasin blong obei mo stap tru long Hem. (Prov. 8:22-31, NW; Kol. 1:15, NW) From samting ya, taem Jeova i sanem Jisas i kam long wol mo i letem Setan i traem Jisas gogo Jisas i ded, God i sua fulwan se stret  Pikinini blong hem bambae i winim ol traem blong Setan.—Jon 3:16.

Jeova i Stap Protektem Ol Man Blong Hem

3. ?Setan i gat wanem tingting long ol man we oli mekem wok blong Jeova?

³ Jisas i tokbaot Setan se hem i “stap rulum wol ya,” mo Jisas i givim woning long ol disaepol blong hem se bambae ol man oli mekem i nogud long olgeta, olsem we oli mekem long hem. (Jon 12:31; 15:20) Ol man long wol ya we oli stap long paoa blong Devel Setan, oli no laekem nating ol trufala Kristin from we oli mekem wok blong Jeova mo oli ol man blong talemaot stret fasin. (Mat. 24:9; 1 Jon 5:19) Olgeta we Setan i stap traehad moa blong mekem i nogud long olgeta, hemia ol Kristin we tabu spirit i makemaot olgeta, we bambae oli go rul wetem Kraes long Kingdom blong hem long heven. Setan i stap traehad blong mekem i nogud tu long ol Witnes blong Jeova we oli gat promes blong laef olwe long wan paradaes long wol. Tok blong God i givim woning long yumi i se: “Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.”—1 Pita 5:8.

4. ?Wanem samting i pruvum se ol man blong God oli agensem Setan long taem blong yumi mo oli winim hem?

⁴ Wetem help blong Jeova God, ogenaesesen ya we yumi joen long hem, hem i stap agensem Devel Setan fulwan. Long ol 100 yia we oli pas, i gat sam lida blong sam kantri we oli mekem i strong tumas long ol man, mo oli traehad blong finisim olgeta Witnes blong Jeova. Be namba blong ol Witnes i stap gohed blong kam antap, mo naoia klosap i kasem 7,000,000 man we oli stap long bitim 100,000 kongregesen raonabaot long wol. !Ol rabis lida ya we oli mekem i nogud long ol man blong Jeova, olgeta nao oli lus!

5. ?Olsem wanem toktok blong Aesea 54:17 i kamtru long ol man blong Jeova?

⁵ God i toktok long kongregesen blong ol man Isrel bifo, we i olsem “woman” blong hem, mo hem i promes se: “Eni tul blong faet we bambae ol man oli stanemap agensem yu bambae oli no save win, mo ol tok we ol man bambae oli talemaot agensem yu long jajmen bambae yu winim olgeta. Hemia samting we ol man blong Jeova bambae oli kasem, mo stret fasin blong olgeta i kamaot long mi.” (Aes. 54:11, 17, NW) Long “ol las dei” ya, promes ya i kamtru long ol man blong Jeova raonabaot long wol. (2 Tim. 3:1-5, 13, NW) Yumi gohed blong agensem Setan, mo nomata wanem tul blong faet we Setan i traem yusum blong finisim ol man blong God bambae hem i no save win, from we Jeova i stap wetem yumi.—Sam 118:6, 7.

6. ?Profet tok blong Daniel i talem se long fiuja wanem bambae i hapen long rul blong Setan?

⁶ En blong rabis wol ya blong Setan i stap kam hareap, mo taem en ya i kam, evri haf blong rul blong Setan bambae i lus olgeta. Tabu spirit i pusum Daniel blong raetemdaon profet tok ya se: “Long taem blong ol king ya, God blong heven bambae i stanemap wan kingdom we neva i save foldaon. Mo bambae kingdom ya i no save go long han blong narafala man. Bambae hem i smasem mo i finisim olgeta narafala kingdom, mo hem nomo bambae i stanap olwe.” (Dan. 2:44, NW) Taem samting ya i hapen, bambae rul blong Setan mo rul blong ol sinman,  tufala tugeta i lus. Evri samting we i joen long rul blong Setan bambae i lus blong olwe, mo Kingdom blong God bambae i rul long olgeta ples long wol. Bambae i no moa gat man we i agensem rul blong hem.—Ridim 2 Pita 3:7, 13.

7. ?Olsem wanem yumi save se ol wanwan man blong Jeova oli save agensem Setan mo winim hem?

⁷ Yumi sua fulwan se bambae Jeova i gohed blong protektem mo blesem ogenaesesen blong hem. (Ridim Ol Sam 125:1, 2.) ?Be olsem wanem long yumi wanwan? Baebol i talem se yumi tu yumi save agensem mo winim ol traem blong Setan, olsem Jisas i bin mekem. Tru ya, profet tok we Kraes i talemaot long aposol Jon i soemaot we “wan bigfala kampani” (NW) blong ol man we oli gat hop ya blong laef long wol, bambae oli pastru long taem we wol blong Setan i lus, nating se Setan i agensem olgeta. Baebol i talem se olgeta oli singaot bigwan, oli talem se: “God blong yumi, hem i King, i stap sidaon long bigfala jea blong hem. Hem wetem Smol Sipsip ya [Jisas Kraes], tufala ya nao i wokem rod blong sevem mifala.” (Rev. 7:9-14) Baebol i tokbaot ol tabu Kristin se oli winim Setan, mo ol fren blong olgeta hemia “ol narafala sipsip,” olgeta tu oli agensem hem mo winim hem. (Jon 10:16; Rev. 12:10, 11) Be blong mekem samting ya, yumi mas traehad bigwan mo yumi mas prea wetem fulhat blong yumi long Jeova blong hem i ‘blokem Setan blong i no kam spolem yumi.’—Mat. 6:13.

Man We i Agensem Setan Long Fasin We i Stretgud Olgeta

8. ?Long Baebol, wanem faswan traem we Setan i mekem long Jisas long draeples?

⁸ Devel Setan i traehad blong pulum Jisas blong lego Jeova. Long draeples, Setan i yusum ol traem we oli blong pulum Jisas blong no obei long Jeova. Be eksampol we Jisas i givim blong agensem Setan i stretgud olgeta. Jisas i no kakae blong 40 dei mo 40 naet, taswe ating hem i wantem tumas blong kakae. Ale Setan i talem long hem se: “Sipos yu yu Pikinini blong God, yu talem long ol ston ya blong oli kam bred.” Be Jisas i no yusum paoa ya we God i givim long hem, blong mekem i gud long hem wan. Defren olgeta, hem i talem se: “Baebol i talem se, ‘Man i no save laef long kakae nomo. Evri tok we God i talem, hemia nao samting blong mekem man i laef.’”—Mat. 4:1-4; Dut. 8:3.

9. ?From wanem yumi mas blokem ol traem blong Setan we oli blong pulum yumi blong kasem ol samting we yumi wantem long saed blong bodi, long fasin we i no stret?

⁹ Tede, Setan i stap pulum ol man blong Jeova blong oli kasem, long fasin we i no stret, ol samting we oli wantem long saed blong bodi. From samting ya, tingting blong yumi i mas strong blong blokem ol traem we oli pulum yumi blong mekem rabis fasin long saed blong seks, nating se ol doti fasin olsem oli plante long wol ya. Tok blong God i talem klia se: “Yufala i save finis. Ol man we oli stap mekem i no stret, bambae oli no save go insaed long niufala wol ya we God i king long hem. Yufala i mas tingting gud long samting ya. Yufala i mas save se man we i stap ronem woman, mo man we i stap prea long ol narafala god, . . . man we i stap slip wetem woman blong narafala man mo woman we i stap mekem i krangke wetem narafala man, mo man we i stap slip wetem man, mo woman we i stap slip wetem woman, . . . bambae oli no save go insaed samtaem long niufala wol ya we God i king long hem.” (1 Kor. 6:9, 10) Taswe, i klia se ol man we oli stap mekem ol rabis fasin long saed blong seks mo we oli no wantem jenisim fasin blong olgeta, bambae oli no save laef long niufala wol blong God.

10. ?Folem wanem we Matiu 4:5, 6 i talem, wanem wan narafala traem we Setan i yusum blong pulum Jisas blong lego Jeova?

¹⁰ Long saed blong wan traem we Jisas i kasem long draeples, Baebol i talem se: “Setan i tekem Jisas i go long Jerusalem, i putum hem long wan hae ples, antap long haos blong God, nao i talem long hem se, ‘Sipos yu yu Pikinini blong God, yu jam i godaon long graon, from we Baebol i tokbaot God, i talem se, “Hem bambae i talem long ol enjel blong hem, blong oli stap lukaot long yu. Nao bambae oli holem yu antap, blong yu no bangem leg blong yu long ston.”’” (Mat. 4:5, 6) Setan i givim tingting se sipos Jisas i mekem samting ya bambae hem i soemaot long olgeta man we hem i Mesaea. Be tingting ya i giaman nomo. Hemia wan samting we i no stret blong Jisas i mekem, from i soemaot flas fasin we i no save mekem God i glad, mo bambae God i no save givhan long hem. Bakegen, Jisas i holemstrong long Jeova mo hem i ansa long Setan wetem wan vas blong Baebol. Hem i se: “Baebol i talem tu se, ‘Yu no save traem Hae God we i God blong yu.’”—Mat. 4:7; Dut. 6:16, NW.

11. ?Maet Setan i yusum wanem blong traem yumi, mo biaen wanem i save kasem yumi?

 ¹¹ Maet Setan i yusum sam defdefren rod blong traem pulum yumi blong kasem haenem mo paoa. Mo maet hem i traem pulum yumi blong folem ol stael blong wol long klos mo hea, no blong yumi joen long sam pleplei we oli no stret. ?Be sipos yumi no lesin long advaes blong Baebol mo yumi folem fasin blong wol, yu ting se ol enjel bambae oli blokem ol nogud frut we oli kamaot from fasin blong yumi? Nating se King Deved i tanem tingting blong hem from ol sin we hem i mekem wetem Batseba, hem i kasem ol nogud frut blong samting we hem i mekem. (2 Saml. 12:9-12) Yes, i nogud yumi traem Jeova long fasin we i no stret, maet yumi mekem samting ya taem yumi wantem tumas ol samting blong wol.—Ridim Jemes 4:4; 1 Jon 2:15-17.

12. ?Matiu 4:8, 9 i tokbaot wanem traem, mo olsem wanem Pikinini blong God i ansa long Setan?

¹² Wan narafala traem we Devel Setan i yusum long draeples, hemia blong pulum Jisas blong wantem kasem paoa long politik. Setan i soemaot long Jisas olgeta kingdom long wol wetem olgeta gudgudfala samting we oli gat, mo hem i talem se: “Sipos yu bodaon long mi, yu mekem wosip long mi, bambae mi mi givim olgeta samting ya i go long yu.” (Mat. 4:8, 9) !Hemia rabis fasin stret! Setan i traem kasem wosip we i blong Jeova mo hem i traem pulum Jisas blong i no stap tru long Jeova. Enjel ya we i bin mekem wok blong God bifo, i tingting tumas long wosip we hem i wantem kasem mo hem i mekem sin, ale i kam Devel Setan, enjel ya we i rabis olgeta. (Jem. 1:14, 15) Be fasin blong Jisas i defren olgeta. Hem i gat strong tingting blong stap tru long Papa blong hem we i stap long heven. Taswe hem i talem toktok ya se: “!Setan! !Yu gowe long mi! Baebol i talem se, ‘Yu mas mekem wosip long Hae God we i God blong yu, mo bambae yu mas mekem wok blong hem nomo.’” Yes Jisas i strong blong agensem Setan bakegen mo fasin blong hem i soemaot samting ya klia nomo. !Pikinini blong God i no wantem joen nating long wol blong Setan mo neva bambae hem i wosipim rabis enjel ya!—Mat. 4:10; Dut. 6:13; 10:20.

‘Agensem Setan, Mo Hem Bambae i Ronwe Long Yu’

13, 14. (a) ?Taem Setan i soemaot olgeta kingdom blong wol long Jisas, Setan i stap givim janis long Jisas blong kasem wanem? (b) ?Olsem wanem Setan i traem spolem ol gudfala fasin blong yumi?

¹³ Taem Setan i soemaot olgeta kingdom blong wol long Jisas, hem i stap givim janis long Jisas blong kasem paoa we neva wan narafala man long wol i bin gat samtaem. Setan i wantem tumas se Jisas i laekem samting we hem i luk mo bambae i ting se hem i save kam wan lida blong politik we i nambawan long wol. I tru se tede Setan i no traem givim ol kingdom long yumi. Be hem i yusum ol samting we yumi lukluk, harem, mo tingbaot, blong traem pulum yumi blong wantem samting we i no stret.

¹⁴ Wol ya i stap long paoa blong Setan, mo ol samting we i kamaot long televisin, niuspepa, ol buk mo long radio, hemia tu i stap long paoa blong Setan. Taswe, yumi no sapraes se samting we wol ya i stap givim long ol man blong oli lukluk, lesin long hem, mo ridim, hem i fulap long rabis fasin long saed blong seks mo raf fasin. Long televisin, radio mo long ol buk, wol ya i traehad blong pulum yumi blong wantem pem plante samting we yumi no nidim. Olsem nao Devel Setan i stap traem yumi. Taem yumi lukluk ol samting ya, yumi harem nius blong olgeta mo yumi tingting long olgeta, yumi save laekem tumas blong gat ol samting ya. Be taem yumi strong blong no lukluk, lesin mo ridim ol samting we i agensem ol rul blong Baebol, i olsem we yumi stap talem se: “!Setan! !Yu gowe long mi!” Taem yumi mekem olsem, yumi folem eksampol blong Jisas mo yumi soemaot klia long fasin blong yumi se yumi strong blong agensem rabis wol blong Setan. Wan narafala rod we i soemaot se yumi no joen long wol blong Setan, hemia taem yumi no fraet blong talemaot long wok, long skul, long ol man raonabaot, mo long ol famle se yumi ol Witnes blong Jeova mo yumi biaen long Kraes.—Ridim Mak 8:38.

15. ?From wanem yumi mas wekap oltaem blong yumi save agensem Setan?

¹⁵ Setan i traem Jisas tri taem be i no save pulum hem blong lego God, biaen “Setan i gowe long Jisas.” (Mat. 4:11) Be samting ya i no min se Setan i stop blong traem Jisas, from we Baebol i talem se: “Nao taem Setan i finisim ol rod ya blong traem Jisas, hem i gowe long Jisas blong bambae i kambak long hem samtaem.” (Luk 4:13) Taem yumi winim  wan traem blong Setan, i gud yumi talem tangkiu long Jeova. Be tu, yumi mas gohed blong askem help blong God, from we Setan bambae i kambak blong traem yumi long wan narafala taem we i stret long hem, mo maet hemia long wan taem we yumi no tingbaot. From samting ya, oltaem yumi mas wekap, mo yumi mas rere blong holemstrong long tabu wok we yumi mekem long Jeova nomata wanem traem we yumi kasem.

16. ?Bigfala paoa ya we Jeova i givim long yumi, hem i wanem? ?Mo from wanem yumi mas prea from paoa ya?

¹⁶ Blong givhan long yumi blong agensem Devel Setan, yumi mas prea long God blong askem paoa we i bigwan moa i bitim eni narafala paoa long heven mo wol, hemia tabu spirit blong God. Mo God bambae i givim paoa ya long yumi. Tabu spirit bambae i halpem yumi blong mekem ol samting we yumi no naf blong mekem long prapa paoa blong yumi. Jisas i mekem tingting blong ol man blong hem i sua se God bambae i givim tabu spirit long olgeta, hem i se: “Nating we yufala i [sinman mo from samting ya yufala i] man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim tabu spirit long ol man we oli askem long hem.” (Luk 11:13) Yumi mas gohed blong prea long Jeova from tabu spirit blong hem. Wetem help blong paoa ya we i bigwan tumas mo wetem strong tingting we yumi gat blong agensem Devel Setan, bambae yumi save winim ol traem blong hem. Yumi mas prea oltaem wetem fulhat blong yumi, mo yumi nidim tu blong putum olgeta klos blong faet we oli protektem fasin fren blong yumi wetem Jeova, nao bambae yumi save ‘stanap strong agens long ol giaman trik blong Setan.’—Efes. 6:11-18.

17. ?Wanem samting we Jisas i glad long hem nao hem i naf blong agensem Setan?

¹⁷ Wan narafala samting i halpem Jisas blong agensem Setan, mo samting ya i save halpem yumi tu. Baebol i talem se: “Blong kasem glad we i stap long fored blong hem, [Jisas] i stanap strong, nating se oli nilim hem long pos, mo hem i no tingbaot sem we hem i kasem. Nao hem i go sidaon long raetsaed blong bigfala jea blong God long heven.” (Hib. 12:2, NW) Yumi tu yumi save gat glad olsem taem yumi holemstrong long hae rul blong Jeova, yumi tinghae long nem blong hem, mo yumi putum tingting blong yumi i stap strong long blesing blong laef we i no save finis. !Tingbaot glad we bambae yumi kasem taem Setan mo ol rabis wok blong hem oli lus blong olwe, mo ‘ol kwaet man oli tekem wol ya i blong olgeta mo oli glad tumas from we pis i fulap’! (Sam 37:11, NW) Yes, yumi mas gohed blong agensem Devel Setan, olsem Jisas i bin mekem.—Ridim Jemes 4:7, 8.

?Bambae Yu Yu Ansa Olsem Wanem?

• ?Wanem i pruvum se Jeova i stap protektem ol man blong hem?

• ?Olsem wanem Jisas i givim wan gudfala eksampol blong agensem Setan?

• ?Wanem sam defren rod blong agensem Setan?

[Kwestin]

[Tok blong pija long pej 26]

Sipos yumi wantem tumas ol samting blong wol ya yumi kam enemi blong God

[Tok blong pija long pej 29]

Jisas i no wantem olgeta kingdom blong wol we Setan i traem givim long hem