Kam Klosap Long God

Wan God We i Laekem Stret Fasin

Hibrus 10:26-31

?WAN man i bin mekem i no stret long yu, no i bin kilim yu nao yu harem nogud tumas? ?Maet man ya i no kasem panis from samting we hem i mekem, mo i soem se hem i no sore nating? I no gat plante samting we i had blong winim olsem hemia. Antap long samting ya, man we yu yu wantem se hem i lavem yu, naoia i stap mekem i nogud long yu mo i no moa kea long yu. Maet yu yu stap tingting se, ‘?From wanem God i letem samting ya i hapen long mi olsem?’ * Samting we i tru se, Jeova i no laekem nating olgeta fasin we oli no stret we ol man oli mekem. Tok blong Baebol i mekem yumi sua se God bambae i panisim olgeta we oli gohed strong blong mekem sin. Yumi save tingbaot tok we aposol Pol i raetem long Hibrus 10:26-31.

Pol i raetem se: “Be yumi ya we yumi kasem save long trutok finis, sipos yumi girap, yumi stap gohed blong mekem sin, bambae i no moa gat wan sakrefaes i stap we i save tekemaot ol sin ya blong yumi.” (Vas 26) Ol man we oli jusum blong mekem sin, oli gat fol moa from fasin blong olgeta. ?From wanem? Faswan samting se, oli no mekem sin wan taem nomo, long taem we oli slak—hemia kaen mastik we yumi evriwan i mekem sam samtaem from we yumi sinman. Oli mekem sin oltaem nomo, olsem se hemia i wan fasin blong laef blong olgeta. Namba tu samting se, oli jusum nomo blong mekem sin. Rabis fasin ya i stap dip insaed long hat blong olgeta. Namba tri samting se, sin we oli mekem i no kamaot from we oli no gat save. Oli kasem finis ol “stret save blong trutok” (NW), long saed blong ol samting we God i wantem.

?Wanem tingting blong God long ol man we oli no wantem tanem tingting blong olgeta from ol rabis sin we oli stap mekem? Pol i talem se: “Bambae i no moa gat wan sakrefaes i stap we i save tekemaot ol sin ya.” Sakrefaes blong Jisas—presen we God i givim long ol man—i tekemaot ol sin we yumi mekem from we yumi sinman. (1 Jon 2:1, 2) Be olgeta we oli no tanem tingting blong olgeta from ol sin we oli mekem, oli soem we oli no tinghae nating long sas presen ya. Long lukluk blong God, oli ‘stap tingting nogud long Pikinini blong hem mo oli luk blad blong Jisas olsem we i no wan tabu samting.’ (Vas 29) Rod we oli folem i soemaot se oli no tinghae long Jisas mo oli luk blad blong hem olsem wan “samting we i no tabu” mo we i no naf blong pemaot ol sinman. Ol man olsem oli no gat tangkiu, mo sakrefaes blong Jisas i no save givhan long olgeta.

?Wanem bambae i hapen long ol rabis man? God we i laekem stret fasin i promes se: “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.” (Vas 30) Olgeta we oli mekem sin blong spolem ol narafala, oli mas lukaotgud. Olgeta we oli jusum blong no obei long loa blong God bambae oli kasem panis. Plante taem, oli kasem trabol from rabis fasin blong olgeta. (Galesia 6:7) Maet oli no kasem trabol naoia, be bambae oli mas talemaot olgeta fasin we oli stap mekem long fes blong God, taem hem i kam blong spolem ol rabis man. (Ol Proveb 2:21, 22) Pol i givim woning se: ‘Sipos yumi pas long han blong God blong hem i jajem yumi, hemia i wan samting blong fraet we i nogud olgeta.’—Vas 31.

Taem yumi lanem se Jeova God i no laekem nating ol man we oli jusum blong mekem sin, samting ya i mekem yumi haremgud mo i leftemap tingting blong yumi, speseli olgeta ya we ol man oli stap mekem i strong tumas long olgeta. God i no laekem nating ol fasin we oli no stret, taswe yumi save trastem hem mo wet se bambae hem i stretem fulwan ol rabis samting we ol man ya oli mekem.

[Futnot]