?God Hem i Hu?

?WANEM ansa blong yu long kwestin ya? Klosap olgeta man oli bilif se God i stap, mo oli fraet long hem mo mekem wosip long hem. Be plante man oli gat smol save nomo long saed blong hem. Sipos yu yu bilif long God, ?bambae yu givim wanem ansa long ol kwestin ya?

1. ?God i gat prapa fasin blong hem mo ol defren filing?

2. ?God i gat wan prapa nem blong hem?

3. ?Jisas, hem i God ya we i gat Olgeta Paoa?

4. ?God i stap tingbaot mi?

5. ?God i glad long enikaen fasin blong wosip?

Sipos yu askem ol kwestin ya long ol narafala man, ating bambae yu sek long ol defdefren ansa we oli givim. Taswe yumi no sapraes se i gat plante giaman tingting mo narakaen tingting we oli kam antap long saed blong God.

Ol Ansa Oli Impoten

Klosap long wan wel, Jisas Kraes i storian long wan woman we i strong long skul blong hem. Jisas i makem long tingting blong woman ya se i impoten blong save trutok long saed blong God. Woman Sameria ya i luksave se Jisas i wan profet. Be wan samting i mekem tingting blong hem i fasfas. Skul blong Jisas i defren long skul  blong hem. Taem hem i talemaot tingting ya long Jisas, Jisas i talem klia long hem se: ‘Yu yu stap mekem wosip long God, we yu no save hem.’ (Jon 4:19-22) Ol tok ya i soemaot tingting blong Jisas se plante man we oli strong long skul blong olgeta, oli no save God.

?Olsem wanem? ?Jisas i wantem minim se i no gat wan man we i naf blong save God? Nogat. Biaen, Jisas i talem long woman ya se: “Ol man blong mekem trufala wosip, bambae oli wosip long Papa long spirit mo trutok, from we, tru, Papa i stap lukaot ol man olsemia, blong oli mekem wosip long hem.” (Jon 4:23, NW) ?Yu yu wan long olgeta ya we oli wosipim God “long spirit mo trutok”?

I impoten tumas we yu savegud ansa blong kwestin ya. ?From wanem? Long wan prea blong Jisas, hem i soemaot se yumi nidim stret save, i se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:3, Nyutesteman wetem Ol Sam long Bislama [NTB]) !Yes, blong kasem laef we i no save finis long fiuja, yu mas save trutok long saed blong God!

?I gat rod blong save trutok long saed blong God? !Yes, i gat! ?Olsem wanem blong faenem trutok ya? Jisas i talem long saed blong hem wan se: “Rod ya, mi ya. Trutok ya, mi ya. Laef ya, mi ya. I no gat man i save kam long Papa blong mi, sipos mi mi no tekem hem.” (Jon 14:6, NTB) Hem i talem tu se: “I no gat man we i save Papa blong mi, mi wetem ol man we mi mi jusumaot olgeta blong soemaot hem long olgeta, mifala nomo i save hem.”—Luk 10:22.

Taswe, rod blong save God, hemia tru long ol tijing blong Jisas Kraes, Pikinini blong God. Jisas i mekem promes ya se: “Sipos yufala i folem ol tijing blong mi, yufala i rili ol disaepol blong mi. Nao bambae yufala i save trutok, mo trutok ya bambae i mekem yufala i fri.”—Jon 8:31, 32, The Holy Bible—New International Version.

Ale, ?Jisas i givim wanem ansa long ol faefala kwestin ya antap?

[Tok blong pija long pej 4]

?Yu yu stap mekem wosip long wan God we yu no rili save hem?