?From Wanem Ol Advaes Blong Baebol Oli Wokgud Long Taem Blong Yumi?

“Olgeta tok blong Baebol oli kamaot long God fastaem . . . mo i stret gud blong stretem ol krangke fasin.”—2 TIMOTI 3:16.

LONG ol handred yia we i pas, Baebol i pulum ol man long plante kalja, blong oli jenisim fasin blong laef blong olgeta mo mekem i kam gud moa. Vas blong Baebol antap i eksplenem from wanem Baebol i wokgud long rod ya, hemia from we waes blong hem i kam long God. Baebol i talemaot ol tingting blong God long yumi, nating se ol man nomo oli raetem. Baebol i eksplenem se: ‘Taem tok blong profet i kamaot, ol profet oli talem, be tabu spirit i stap givim tok long olgeta, nao oli talemaot tok we i kamaot long God.’—2 Pita 1:21.

I gat tu rod we i mekem se Baebol i wan buk we i wokgud. Faswan samting, hem i givim wan stret tingting long saed blong wanem nao i mekem wan gudfala laef. Nambatu samting, hem i gat paoa blong pusum ol man blong mekem ol jenis we oli mas mekem blong kasem gudfala laef ya. Bambae yumi tokbaot tufala rod ya.

Luksave Ol Mak We Oli Wokgud

God i mekem promes ya we i stap long Baebol se: “Mi bambae mi tijim yu long rod we i stret blong yu yu folem. Bambae mi stap givim gudfala tingting [“fasin luksave,” NW] long yu, mo mi stap lukaot gud long yu.” (Ol Sam 32:8) I gud blong makem se God bambae i no givim advaes nomo, be bambae hem i givim fasin luksave tu, we hemia i wan fasin blong lukluk dip insaed no lukluk aninit long wan samting we i had blong luksave. Taem yumi gat fasin blong luksave wanem mak we i save givhan long yumi, samting ya bambae i blokem yumi blong no westem laef blong yumi long ol samting we i blong nating nomo.

Tingbaot mak blong plante man, hemia blong gat haenem mo plante samting long laef blong olgeta. Ol buk blong advaes oli givim plante advaes olsem wanem yu save winim narafala blong kasem haenem no olsem wanem blong kam rij. Be Baebol i talem se: “Fasin ya we ol man oli . . . jalus tumas long ol narafala man we oli stap raonabaot long olgeta, oli wantem tumas blong winim olgeta . . . i blong nating nomo. Hemia i olsem we man i stap resis olbaot nomo.” “Sipos yu laekem mane tumas, . . . be neva yu save talem se yu harem gud, mane blong yu i naf.” (Prija 4:4; 5:10) ?Olsem wanem? ?Advaes ya i save wokgud tede?

Blong yumi luksave olsem wanem advaes ya blong Baebol i wokgud, bambae yumi tokbaot stori blong wan man long Japan, nem blong hem Akinori. Akinori i mas wok strong mo i mas winim ol man raonabaot long hem blong i kasem setifiket blong hem long yunivesiti, mo biaen hem i go wok long wan bigfala kampani. I luk olsem se laef blong hem i stap rongud. Be ol samting ya oli no mekem hem i hapi olsem we hem i bin tingbaot. Hem i wari mo i taed tu, mo samting ya i mekem hem i sik. Ol fren blong hem long wok oli no mekem hem i harem gud nating. Tingting blong hem  i foldaon, hem i kam wan man we i dring bitim mak mo tu hem i gat tingting blong kilim hem wan i ded. Biaen hem i stadi Baebol wetem ol Witnes blong Jeova. Samting we hem i lanem i jenisim tingting blong hem long saed blong wanem samting we i impoten long laef. I no longtaem, wari blong hem we i mekem hem i sik, i stat blong lus. Fastaem, fasin praod mo tingting blong kasem haenem i pusum Akinori blong kasem ol mak blong hem. Be naoia hem i faenemaot olsem wanem tok blong ol proveb long Baebol i tru, se: “Sipos tingting blong man i stap kwaet oltaem, hemia bambae i mekem bodi blong hem i stap gud.”—Ol Proveb 14:30.

?Long tingting blong yu, wanem samting nao we i rili impoten blong man i traehad blong kasem long laef blong hem? ?Wanem samting bambae i mekem se yu rili hapi? Maet yu faenem glad sipos yu gat wan gudfala mared, no yu mekem pikinini blong yu i save gat wan gud stat long laef blong hem. Maet yu save fren wetem plante man. Plante long ol samting ya oli ol gudfala mak. I tru se Baebol i talem se hemia sam gudfala samting blong kasem, be ol samting ya oli no ol impoten risen from wanem yumi laef. Ol advaes blong Baebol oli wokgud mo oli mekem man i gat fasin luksave, taswe hem i soemaot stamba samting we man i mas mekem blong hem i save gat wan gudfala laef, taem hem i talem se: “Yu mas tinghevi long God, yu mas ona long hem, mo yu mas obei long ol tok blong hem, from we hemia nao samting we hem i mekem yumi from.” (Prija 12:13) Taem yumi no mekem samting ya, laef i no gat mining, yumi kam kros mo yumi no moa glad. Be Baebol i mekem yumi sua long wan samting se: “Man we i stap trastem Hae God, hem bambae i harem gud.”—Ol Proveb 16:20.

Olsem Wanem Baebol i Pulum Man Blong Jenis

Aposol Pol i raetem se: “Tok blong God i wan samting we i laef, mo i stap wok.” Hem i olsem wan naef blong faet we i sap tu saed, hem i save go dip insaed long tingting blong man mo ol samting we man i wantem long tingting blong hem. (Hibrus 4:12) Ol man oli ting se oli save olgeta wan be samting ya i no tru. Baebol i gat paoa mo i halpem ol man blong luksave prapa fasin blong olgeta, mo blong jenisim fasin blong laef blong olgeta. Ol man we hat blong olgeta i stret, bambae oli luksave se oli mas mekem sam jenis long laef blong olgeta. Traem tingbaot Kristin kongregesen long Korin bifo. I gat samfala we bifo oli man blong stil, oli drong bitim mak, oli stilim man no woman blong narafala, mo mekem sam narafala fasin olsem. Pol i talem se: ‘Bifo, sam long yufala oli olsem nomo. Be naoia . . . long paoa blong spirit blong God, God i wasemaot ol sin blong yufala finis blong mekem yufala i klin.’ (1 Korin 6:9-11) Tede tu, tabu spirit blong Jeova i gat paoa mo i stap wok, mo i save pulum ol man blong oli jenis.

Mario i laef long Yurop, hem i wan man blong mekem raf fasin, i smokem mo salem mariuana. Wan taem, taem wan polis i tekemaot ol drag blong hem, Mario i kam kros tumas nao i kilim polis ya mo i spolem trak blong hem. Mo tu, Mario i no gat wok mo i gat bigfala kaon. Hem i luksave se hem i no save winim problem ya hem wan, ale hem i agri blong stadi Baebol. Taem hem i gohed gud long stadi blong hem, Mario i jenisim fasin blong hem, i kam klin moa, hem i no moa yusum mo salem ol drag, mo i finis tu long ol raf fasin we hem i stap mekem bifo. Ol man we oli save ol fasin blong hem blong bifo oli sapraes tumas. Oli stap askem hem se, “?Mario, hemia i rili yu ya?”

?Wanem i pusum ol man olsem Akinori mo Mario blong jenisim fasin blong laef blong olgeta mo harem gud mo faenem trufala glad long laef? I klia we ol niufala save we oli faenem long saed blong God taem oli stadi long Baebol, hemia nao samting we i givhan long olgeta. God nomo i save givim ol tijing we i save wokgud, we yumi nidim blong gat wan gudfala laef naoia mo tu blong kasem laef blong olwe long fiuja. Taem yumi ridim Baebol, Jeova i toktok long yumi olsem wan Papa se: “Pikinini blong mi. Sipos yu lesin gud long mi, mo yu tinghevi long ol samting ya we mi stap talem long yu, bambae yu gat longfala laef. . . . Sipos yu stap folem waestok ya, bambae i no gat wan samting i save blokem yu, mo sipos yu resis, bambae yu no save foldaon. Oltaem, yu mas tingbaot ol samting ya we yu lanem finis. Olgeta oli stamba blong laef blong yu, mo yu mas lukaot gud long olgeta.” (Ol Proveb 4:10-13) !I tru tumas, advaes blong Man we i Wokem Yumi i wokgud moa bitim ol advaes we ol man i givim!

 [Bokis/Foto blong pija long pej 7]

Ol Advaes We Oli Wokgud Long Taem Blong Yumi

Baebol i givim ol rul we oli klia be long semtaem oli wokgud mo oli save lidim yumi long evri haf long laef blong yumi tede. Hemia sam eksampol:

• Gat Wan Gudfala Fasin Fren Wetem Narafala

“Yufala i mas mekem i gud long ol narafala man, olsem we yufala i wantem blong olgeta oli mekem long yufala.”—Matiu 7:12.

“Man we i daon moa long yufala evriwan, hem i hae moa long yufala.”—Luk 9:48.

“Yufala i mas rere blong tekem ol Kristin man blong ol narafala ples oli kam insaed long haos blong yufala.”—Rom 12:13.

• Winim Ol Nogud Fasin We Oli Save Spolem Yu

“Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.”—Ol Proveb 13:20.

“I nogud yu go joen wetem ol man we oli stap dring tumas.”—Ol Proveb 23:20.

“I nogud yu stap fren long ol man blong faerap, we oli save kros kwik.”—Ol Proveb 22:24.

• Wokem Wan Mared We i Save Stap Longtaem

“Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.”—Efesas 5:33.

“Yufala i mas putum niufala laef ya blong yufala olsem prapa klos blong yufala. Yufala i mas gat sore long ol man mo yufala i mas mekem i gud long olgeta. Tingting blong yufala i mas stap daon, mo yufala i mas kwaet man, mo tingting blong yufala i mas longfala. Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala.”—Kolosi 3:12, 13.

• Halpem Ol Pikinini

“Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.”—Ol Proveb 22:6.

“Ol papa mo mama. Bambae yufala i no mas mekem ol samting long ol pikinini blong yufala we i save mekem olgeta oli kros. . . . Yufala i mas stretem olgeta, mo yufala i mas tijim olgeta, olsem we Masta blong yumi i stap stretem yumi, i stap tijim yumi.”—Efesas 6:4.

• Blokem Ol Rao

“Sipos yu toktok gud long man we i kros, bambae yu save mekem tingting blong hem i kam kwaet, be sipos yu tok strong long hem, bambae yu mekem hem i kros moa.”—Ol Proveb 15:1.

“Oltaem yufala i mas rere blong ona long yufala.”—Rom 12:10.

Yumi save blokem ol raorao blong bisnes sipos yumi raetemdaon agrimen ya long pepa nating se hemia we i mekem bisnes wetem yu i wan fren blong yu. Hemia samting we Jeremaea, man blong wok blong God, i bin mekem: “Long taem ya, mi saenem wan pepa we i gat ol toktok blong graon i stap long hem, wetem narawan we i kopi blong hem, mo mi tekem ol man i kam blong oli witnes long nem blong mi, nao mi putum mak blong mi long faswan ya blong soemaot se i tru.”—Jeremaea 32:10.

• Wokem Wan Gudfala Tingting

“I gat ol gudfala fasin i stap we oli stret gud, mo we i stret nomo blong yumi presem ol man we oli mekem ol fasin ya. Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya.”—Filipae 4:8.

Baebol i tok agensem fasin ya blong putum tingting i stap oltaem long ol samting we oli save mekem yumi harem nogud mo i tok strong long olgeta we “oli stap tok konkon long saed blong laef blong olgeta.” Defren olgeta, Baebol i talem se: “From we tingting blong yufala i stap strong long God, oltaem yufala i mas harem gud.”—Jud 4, 16, NW; Rom 12:12.

Taem yumi mekem ol gudfala stamba rul ya i wok long laef blong yumi, samting ya i mekem yumi harem gud mo yumi gat pis naoia, mo tu i givhan long yumi blong mekem wanem we God i wantem mo kasem ol blesing blong hem. Baebol i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.

[Tok blong pija long pej 5]

Akinori taem hem i wan bisnesman (lefsaed) mo wetem waef blong hem, we tufala i glad blong serem trutok blong Baebol tede