Kam Klosap Long God

God i Tingbaot Ol Samting We Yumi No Naf Blong Mekem

Levitikas 5:2-11

WAN woman we i traehad blong mekem God i glad, i talem se: “Mi mi traem bes blong mi, be mi neva harem se hemia i naf.” ?Olsem wanem? ?Jeova God i agri long beswan traehad we ol man blong hem oli mekem? ?Hem i tingbaot we maet oli no gat naf save blong mekem sam samting, no maet sam samting long laef blong olgeta i blokem olgeta? Blong ansa long tufala kwestin ya, i gud yumi traem tingbaot wanem we loa blong Moses i talem long saed blong ol presen we man i givim i go long God, we yumi faenem long buk blong Levitikas 5:2-11.

Aninit long Loa ya, God i askem ol defren kaen sakrefaes, no presen, we man i mas givim, blong soemaot we hem i sore from sin we hem i mekem. Levitikas 5:2-11 i stap tokbaot wan kaen sin we man i save mekem we hem i no minim blong mekem, we i olsem wan aksiden, nao i mekem hem i sek. Taem man ya i luksave se samting we hem i mekem i rong, hem i mas talemaot sin blong hem, mo hem i mas givim “wan woman sipsip no wan woman nani,” olsem presen no sakrefaes blong tekemaot sin blong hem. (Vas 5, 6) ?Be olsem wanem sipos man ya i pua, mo i no gat wan sipsip no nani blong givim? ?Loa ya i talem se hem i mas yusum sipsip no nani blong wan narafala man fastaem, we biaen i gat kaon blong pembak? ?Bambae man ya i mas letem sin ya i stap fastaem, blong i save wok gogo i kasem wan anamol?

Makemgud samting we Jeova i talem long saed blong loa ya, we i soem se hem i kaengud mo i tingbaot narafala. Hem i se: “Sipos man olsem i puaman, we i no save tekem wan sipsip no wan nani blong givim i kam long mi, bambae i save tekem tu sotleg no tu nawimba . . . blong mekem sakrefaes blong tekemaot sin ya.” (Vas 7) Tok ya “sipos man olsem i puaman,” oli save tanem i kam tu, “sipos han blong hem i no naf blong kasem.” Sipos wan man Isrel i pua tumas, nao i no naf blong givim wan sipsip, be God i glad blong tekem samting we man ya i naf blong givim, olsem tu sotleg no tu nawimba.

?Olsem wanem sipos man ya i no naf tu blong givim tu pijin? Loa ya i gohed se: “Bambae [man ya] i save tekem wan kilo flaoa we i beswan blong mekem sakrefaes blong tekemaot sin blong hem.” (Vas 11) Long saed blong olgeta we oli pua tumas, Jeova i jusum blong letem olgeta oli givim presen we i no gat blad long hem, blong tekemaot sin blong olgeta. * Long Isrel bifo, maet sam man oli puaman, be samting ya i no blokem olgeta blong oli no save kasem fogiv from ol sin blong olgeta, mo blong oli gat pis wetem God.

?Yumi lanem wanem long saed blong Jeova, from loa ya we hem i putum long saed blong ol presen we oli mas givim blong tekemaot sin blong olgeta? Hem i God ya we i gat sore, mo i tingbaot man, taswe hem i save samting we ol man blong wosipim hem oli naf blong mekem mo samting we oli no naf blong mekem. (Ol Sam 103:14) Hem i wantem se yumi kam klosap long hem, mo yumi wokem wan gudfala fasin fren wetem hem, nating we yumi gat ol trabol we i kamaot from yumi stap kam olfala, yumi sik, wok insaed long famle, no narafala wok bakegen. Yumi haremgud blong save se Jeova God i glad long yumi, taem yumi mekem evri samting we yumi naf blong mekem.

[Futnot]