?Ol Prea Blong Yu Oli Soemaot Wanem Long Saed Blong Yu?
?Ol Prea Blong Yu Oli Soemaot Wanem Long Saed Blong Yu?
“Yu we yu stap harem prea, ol man blong olgeta laen bambae oli kam long yu.”—SAM 65:2, NW.
1, 2. ?From wanem ol man blong Jeova oli sua fulwan se hem i save harem prea blong olgeta?
JEOVA i lesin oltaem long ol man blong hem we oli prea blong askem samting long hem. Yumi save sua se hem i stap harem yumi. Sipos ol milian Witnes blong Jeova oli prea long Jeova long semtaem nomo, be bambae hem i save harem prea blong olgeta evriwan.
2 Deved, wan man we i raetem Ol Sam, i sua fulwan se God i stap harem ol krae blong hem, taswe hem i singsing se: “Yu we yu stap harem prea, ol man blong olgeta laen bambae oli kam long yu.” (Sam 65:2, NW) Jeova i ansa long ol prea blong Deved from we Deved i wan man we i stap tru long hem. I gud yumi askem se: ‘?Olsem wanem? ?Ol prea we mi mi mekem blong askem help long Jeova oli soem se mi trastem Jeova, mo se wosip we i klin i wan samting we i impoten tumas long mi? ?Ol prea blong mi oli soemaot wanem long saed blong mi?’
Prea Long Jeova Wetem Tingting Daon
3, 4. (a) ?Tingting mo fasin blong yumi i mas olsem wanem taem yumi prea long God? (b) ?Yumi mas mekem wanem sipos ‘samting we i mekem tingting blong yumi i trabol’ hemia wan bigfala sin we yumi mekem?
3 Sipos yumi wantem se God i ansarem prea blong yumi, yumi mas gat tingting daon taem yumi prea. (Sam 138:6) Yumi mas askem long Jeova blong i skelem yumi, olsem we Deved i mekem taem hem i talem se: “God, plis yu lukluk gud long mi, blong yu savegud ol tingting blong mi. Plis yu skelem laef blong mi, blong yu faenemaot ol samting we mi stap tingting long hem. Mo sipos i gat sam samting nogud long laef blong mi [“we oli stap mekem tingting blong mi i trabol,” NW], plis i gud yu traem faenemaot, nao yu lidim mi long rod ya we i no save lus.” (Sam 139:23, 24) Ale, yumi mas prea, mo antap long samting ya, yumi mas rere blong letem God i skelem yumi mo obei long ol advaes long Tok blong hem. Jeova i save lidim yumi long “rod ya we i no save lus,” mo i save halpem yumi blong folem wan fasin blong laef we i save lidim yumi blong kasem laef we i no save finis.
4 ?Olsem wanem sipos ‘samting we i mekem tingting blong yumi i trabol’ hemia wan bigfala sin we yumi mekem? (Ridim Ol Sam 32:1-5.) Taem yumi traem blong blokem tingting we i stap stikim yumi, samting ya i save mekem yumi slak olgeta olsem tri we bigsan i bonem, nao i drae olgeta. Taem Deved i mekem wan bigfala sin, hem i no moa glad mo maet hem i sik tu. !Be taem hem i talemaot sin blong hem long God, samting ya i mekem hem i harem gud tumas! Traem tingbaot glad blong Deved taem hem i haremsave se ‘Jeova i tekemaot sin blong hem’ mo i fogivim hem. Taem yumi talemaot sin blong yumi long God, samting ya i mekem yumi harem gud. Mo help blong ol Kristin elda i save givhan tu blong mekem wan we i slak from sin blong hem, i frengud bakegen wetem Jeova.—Prov. 28:13; Jem. 5:13-16.
Askem Help Long God Mo Talem Tangkiu Long Hem
5. ?Yumi mas mekem wanem taem yumi wari tumas?
5 Sipos yumi stap wari tumas long wan samting, i gud yumi folem advaes blong Pol se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.” (Fil. 4:6) Taem ya we i impoten moa blong askem Jeova blong halpem mo lidim yumi, hemia long taem blong denja no taem ol man oli agensem yumi.
6, 7. ?Wanem ol risen blong talem tangkiu long God taem yumi prea?
6 Sipos yumi prea nomo taem yumi nidim samting, ?hemia i soemaot se fasin fren blong yumi wetem Jeova i olsem wanem? Pol i talem se yumi mas askem samting long God mo yumi mas “talem tangkiu tu long hem.” Yumi gat plante risen blong toktok long Jeova wetem filing olsem Deved se: “Yu yu hae we yu hae, mo yu gat olgeta paoa. Nem blong yu i hae, mo yu yu gud tumas. Yu yu king we yu rul long paoa blong yu. Olgeta samting long heven mo long wol oli blong yu nomo. Yu yu king we yu hae we yu hae olgeta, mo yu rul long olgeta ples. . . . God blong mifala, naoia mifala i talem tangkiu long yu, mo mifala i presem hae nem blong yu.”—1 Kron. 29:11-13.
7 Jisas i talem tangkiu long God from kakae mo from bred mo waen we oli yusum long Lodsapa. (Mat. 15:36; Mak 14:22, 23) Yumi mas mekem sem mak, be i no hemia nomo. Yumi mas ‘talem tangkiu long Hae God [Jeova] from ol bigbigfala samting we hem i stap mekem blong givhan long olgeta man,” mo from ‘ol tingting blong hem we oli stret,’ mo from Tok blong hem, no ol save blong hem we oli stap long Baebol.—Sam 107:15; 119:62, 105.
Prea From Narafala
8, 9. ?From wanem yumi mas prea from ol narafala Kristin?
8 I tru we yumi prea long saed blong yumi wan, be yumi mas prea tu from ol narafala Kristin, wetem ol Kristin we yumi no save nem blong olgeta. Nating se aposol Pol i no save nem blong olgeta Kristin we oli stap long Kolosi, hem i raetem se: “Oltaem, taem mitufala i stap prea from yufala, mitufala i stap talem tangkiu long God ya we i Papa blong Jisas Kraes, Masta blong yumi, from we mitufala i harem nius finis, we yufala i bilif strong long Jisas Kraes, mo yufala i lavem tumas ol man blong God.” (Kol. 1:3, 4) Pol i prea tu from ol Kristin we oli stap long Tesalonaeka. (2 Tes. 1:11, 12) Ol prea olsem oli soemaot plante samting long saed blong yumi mo tingting we yumi gat long ol Kristin brata mo sista blong yumi.
9 Taem yumi prea from ol tabu Kristin mo from “ol narafala sipsip” we oli wok wetem olgeta, hemia i soemaot se yumi kea long ogenaesesen blong God. (Jon 10:16) Pol i askem long ol Kristin brata sista blong oli prea from hem se ‘God bambae i givim tok long hem, blong hem i save talemaot gud nius blong Kraes, we fastaem i stap haed.’ (Efes. 6:17-20) ?Olsem wanem taem yu prea yu wan? ?Yu yu prea from ol narafala Kristin?
10. ?Prea we yumi mekem from narafala i save givhan olsem wanem long yumi?
10 Taem yumi prea from narafala, samting ya i save jenisim tingting we yumi gat long hem. Sipos yumi no laekem wan man nao yumi prea from hem, ?yu ting se yumi save gohed blong tingting nogud long hem mo mekem samting we i no soemaot lav long hem? Nogat. (1 Jon 4:20, 21) Ol prea olsem oli bildimap yumi mo oli pulum yumi blong joengud wetem ol brata sista blong yumi. Antap moa, taem yumi prea olsemia, yumi soemaot se yumi lavem narafala olsem Kraes. (Jon 13:34, 35) Fasin ya i frut blong tabu spirit blong God. ?Olsem wanem? ?Yu yu prea from tabu spirit, yu askem long Jeova blong i halpem yu blong soemaot frut blong spirit olsem lav, glad, pis, longfala tingting, kaen fasin, gud fasin, bilif, kwaet fasin, mo fasin we man i bos long tingting blong hem? (Luk 11:13; Gal. 5:22, 23, NW) Sipos yumi mekem olsem, ol toktok blong yumi mo ol samting we yumi mekem, bambae oli soemaot se tabu spirit i stap lidim yumi long laef blong yumi.—Ridim Galesia 5:16, 25.
11. ?From wanem i stret blong askem long ol narafala man blong oli prea from yumi?
11 ?Olsem wanem sipos pikinini blong yumi i mas mekem eksam long skul, nao yumi faenemaot se i gat samting we i pulum tingting blong hem blong wantem kopi ol ansa long wan buk no long narafala studen? Yumi mas prea from pikinini ya mo givim advaes blong Baebol long hem, blong givhan long hem blong i no giaman mo i no mekem krangke fasin ya. Pol i talem long ol Kristin long Korin se: “Mifala i stap prea long God from yufala, blong bilif blong yufala i no go krangke.” (2 Kor. 13:7) Wan kaen prea olsem we i soem tingting daon, i mekem Jeova i glad mo i soemaot se yumi wan gudfala man. (Ridim Ol Proveb 15:8.) Yumi save askem long ol narafala man blong oli prea from yumi, olsem aposol Pol i mekem. Hem i raetem se: “Mifala i harem se i no gat wan samting nating we i mekem mifala i harem nogud, tingting blong mifala i klin gud nomo. Mo mifala i wantem tumas we oltaem mifala i stap mekem i stret nomo. Plis, oltaem yufala i mas prea from mifala.”—Hib. 13:18.
Sam Moa Samting We Ol Prea Blong Yumi Oli Soemaot
12. ?Wanem ol impoten samting we yumi mas tokbaot long prea blong yumi?
12 ?Ol prea we yumi mekem oli soemaot se yumi glad? ?Oli soemaot se yumi ol Witnes blong Jeova we oli wok strong, no nogat? ?Ol prea we yumi mekem long God oli tokbaot wanem samting? ?Yumi tokbaot blong mekem samting we God i wantem, mo wok blong talemaot Kingdom? ?Yumi askem long Jeova blong i leftemap hae rul blong hem, mo mekem we ol man oli holem nem blong hem i stap tabu? Hemia nao ol impoten samting we yumi mas tokbaot long prea blong yumi, olsem Jisas i bin talem long prea blong hem we i wan eksampol blong yumi folem. Prea ya i stat wetem ol tok ya se: “Papa blong mifala long heven, plis mekem we ol man oli holem nem blong yu i stap tabu. Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.”—Mat. 6:9, 10, NW.
13, 14. ?Ol prea we yumi mekem oli soemaot wanem long saed blong yumi?
13 Ol prea we yumi mekem long God oli soemaot ol tingting we i stap pusum yumi blong mekem samting, ol samting we yumi intres long hem, mo ol samting we yumi wantem. Jeova i save gud se yumi wanem kaen man. Ol Proveb 17:3 i talem se: “Gol mo silva, man i save bonem long faea blong faenemaot se i gud no i nogud, be tingting blong man, Hae God nomo i save mekem olsem long hem blong faenemaot se i gud no i nogud.” God i lukluk wanem we i stap long hat mo tingting blong yumi. (1 Saml. 16:7) Hem i savegud ol filing we yumi gat long saed blong ol miting blong yumi, wok blong prij, mo ol Kristin brata sista blong yumi. Jeova i save tingting we yumi gat long ol “brata” blong Kraes. (Mat. 25:40) Jeova i save sipos yumi rili wantem samting we yumi stap prea from, no yumi stap ripitim ol semfala toktok nomo. Ol man long taem blong Jisas oli gat rong tingting long saed blong prea, taswe hem i talem se: “Taem yufala i prea, yufala i no mas talem semfala toktok bakegen mo bakegen, olsem ol hiten man oli mekem. Olgeta oli ting se sipos oli talem plante toktok, bambae God i harem prea blong olgeta.”—Mat. 6:7, NW.
14 Ol prea blong yumi oli soemaot tu sipos yumi dipen bigwan long God no nogat. Deved i talem se: “Yu [“Jeova,” NW] yu stap lukaot gud long mi, yu stap blokem ol enemi blong mi. Plis yu letem mi mi stap long tabu ples blong yu oltaem long laef blong mi, yu letem mi mi faenem sefples long yu, olsem we pikinini blong faol i faenem sefples aninit long wing blong mama blong hem.” (Sam 61:3, 4) Taem God ‘i pulum haos tapolen blong hem antap long yumi,’ yumi haremgud from yumi stap gud mo hem i lukaot gud long yumi. (Rev. 7:15, NW) !Yumi haremgud tumas blong kam klosap long Jeova tru long prea, wetem strongfala bilif se ‘hem i stap wetem yumi’ taem enikaen trabol i kasem yumi we i traem bilif blong yumi!—Ridim Sam 118:5-9.
15, 16. ?Prea i save givhan long yumi blong luksave wanem long saed blong tingting ya blong wantem gat moa wok long kongregesen?
15 Yumi mas tok tru taem yumi prea long Jeova long saed blong tingting we i pusum yumi blong mekem samting. Hemia i save givhan long yumi blong luksave klia ol tingting ya blong yumi. Olsem nao, sipos yumi wan brata we i wantem mekem wok blong lukaot long ol man blong God, ?yumi wantem mekem wok ya from wanem? ?Yumi gat tingting daon blong wantem halpem ol narafala mo mekem wanem we yumi naf blong mekem, blong givhan long wok blong Kingdom? ?No maet yumi wantem kam “lida” blong ol narafala nomo, no maet yumi wantem “gat paoa” nomo antap long olgeta? Hemia wan fasin we i no mas stap long medel blong ol man blong Jeova. (Ridim 3 Jon 9, 10; Luk 22:24-27.) Sipos samting we yumi wantem i no stret, yumi mas tok tru taem yumi prea long Jeova. Ale Jeova i save mekem ol nogud tingting ya oli kamaot klia, mo hem i save halpem yumi blong jenisim ol tingting ya bifo we oli kam strong tumas blong karemaot.
16 Ating ol Kristin waef oli wantem tumas se hasban blong olgeta i save wok olsem man blong givhan mo elda. Ol sista ya oli save wok folem prea we oli mekem olgeta wan, taem oli traehad blong mekem ol fasin we wan Kristin waef i mas gat. I impoten tumas blong mekem olsem, from we toktok mo fasin blong famle ya i save mekem se papa ya i gat gudnem no nogud nem long kongregesen.
Prea Long Fored Blong Ol Man
17. ?From wanem i gud blong prea yumi wan long wan ples we i no gat man long hem?
17 Sam samtaem Jisas i aot long ol man, i go long wan ples we i no gat man long hem, blong i prea hem wan long Papa blong hem. (Mat. 14:13; Luk 5:16; 6:12) I sem mak taem yumi wantem prea yumi wan, yumi mas faenem wan ples we i no gat man long hem. Taem yumi prea long ples we i kwaet, yumi save mekem ol desisen we Jeova i glad long olgeta mo we oli halpem yumi blong stap strong long wosip blong hem. Be Jisas i prea long fored blong ol man tu, mo i gud we yumi save stret fasin blong mekem prea olsem.
18. ?Wanem ol samting we ol brata oli mas tingbaot taem oli prea long fored blong kongregesen?
18 Long ol miting blong yumi, ol brata we oli ona gud long God oli prea long fored blong long kongregesen. (1 Tim. 2:8) Long en blong wan prea olsem, ol narafala man blong bilif oli save talem “amen,” we i minim “i mas olsem.” Blong mekem olsem, oli mas agri wetem ol samting we brata i talem long prea ya. Long prea blong Jisas we i olsem eksampol, i no gat wan samting we i save mekem man i sek no spolem tingting blong narafala. (Luk 11:2-4) Antap moa, hem i no talemaot evri nid mo wari blong wanwan man we i stap lesin long prea blong hem. Ol nid mo wari blong yumi wanwan, i gud blong talemaot taem yumi prea yumi wan be i no long fored blong ol man. Mo taem yumi prea long fored blong ol man, yumi no mas talemaot ol samting we i no blong ol man i save long hem.
19. ?Taem wan brata i stap prea long fored blong kongregesen, fasin blong yumi i mas olsem wanem?
19 Yumi mas soemaot se yumi “ona gud long God” taem wan brata i stap prea long fored blong kongregesen. (1 Pita 2:17) I gat taem mo ples we i stret blong mekem sam fasin, be long Kristin miting, i no stret nating blong mekem ol fasin ya. (Pri. 3:1) Traem tingbaot, sipos plante man oli holem han olsem wan grup long taem blong prea. Maet fasin ya i save spolem tingting blong samfala no maet samfala oli no moa lesin. Antap moa, sam we oli kam long miting we oli no gat semfala bilif olsem yumi bambae oli save sem. Tufala we i mared, maet tufala i holem han long wan fasin we tufala i no soem tufala long fored blong ol man. Be sipos long taem blong prea tufala i putum han i goraon long tufala, maet samting ya i save mekem sam man we oli luk tufala, oli harem nogud. Oli save ting se tufala ya i stap tingbaot fasin fren blong tufala i bitim we tufala i ona long Jeova. Blong soem respek long God, i gud we yumi ‘mekem olgeta samting blong leftemap nem blong hem’ mo blokem ol fasin we oli save mekem se man i no moa lesin, i sek nogud, no i foldaon.—1 Kor. 10:31, 32, NW; 2 Kor. 6:3.
?Prea Long Saed Blong Wanem Samting?
20. ?Yu save talem mining blong Rom 8:26, 27?
20 Wanwan taem, maet yumi no save wanem blong talem taem yumi prea yumi wan. Pol i raetem se: “Problem se, yumi no save wanem we yumi mas prea from. Be spirit ya i toktok long saed blong yumi, i krae long fasin we yumi no save harem. Be hem we i skelem hat blong man i save wanem we spirit i traem blong talem.” (Rom 8:26, 27, NW) Jeova i mekem se i gat plante prea i stap long Baebol. Hemia ol prea we Jeova i glad long olgeta. Olsem nao yumi save yusum olgeta tu blong askem samting long hem, mo bambae hem i mekem ol samting ya i kamtru. God i save yumi, mo hem i save mining blong ol samting we hem i mekem tabu spirit i talemaot long ol man we oli raetem Baebol. Jeova i ansarem ol prea blong yumi taem tabu spirit i “toktok long saed blong yumi” no i toktok long bihaf blong yumi. Be taem yumi kasem save moa long Tok blong God, bambae i isi moa blong tingbaot wanem we i stret blong prea from.
21. ?Long nekis stadi bambae yumi lukluk wanem?
21 Olsem yumi lanem finis, ol prea blong yumi oli soemaot plante samting long saed blong yumi. Oli save soemaot sipos yumi kam klosap finis long God no nogat, mo oli soem tu sipos yumi save gud Tok blong hem, no nogat. (Jem. 4:8) Long nekis stadi, bambae yumi lukluk sam prea we oli stap long Baebol, mo ol tingting mo filing we i stap long ol prea ya. ?Ol prea ya long Baebol oli save gat paoa olsem wanem long ol prea we yumi mekem i go long God?
?Bambae Yu Yu Ansa Olsem Wanem?
• ?Yumi mas gat wanem tingting taem yumi prea long Jeova?
• ?From wanem yumi mas prea from olgeta we oli gat sem bilif olsem yumi?
• ?Ol prea we yumi mekem oli save soemaot wanem long saed blong yumi mo ol tingting we oli stap pusum yumi blong mekem samting?
• ?Wanem fasin we yumi mas gat taem wan brata i stap prea long fored blong kongregesen?
[Kwestin]