Kwestin Blong Olgeta We Oli Ridim Magasin Ya

?Setan i Rili Stap?

Yes, Baebol i tijim se Devel Setan i wan trufala man. Ol man we oli agensem Baebol, oli no agri long tingting ya se Setan i wan trufala man. Oli talem se, Setan i minim nomo ol rabis fasin blong ol man.

?Yumi mas sapraes long ol defdefren tingting we ol man oli gat long saed blong Setan se hem i hu? Nogat. Wan eksampol: Wan rabis man i ravemaot ol mak blong fingga blong hem afta we hem i kilim wan man i ded, blong bambae ol man oli no luksave se hem nao i mekem rabis wok ya, ale hem i save gohed nomo blong mekem ol rabis wok blong hem. Long sem fasin, Setan i olsem wan man blong kilim man we i stap biaen long ol rabis fasin. Jisas i soemaot klia se Setan hem i stamba blong ol rabis fasin we ol man oli mekem. Hem i singaot Setan se: “Jif blong wol ya.”—Jon 12:31, NW.

?Setan i kam long weples? Fastaem, God i wokem hem long heven olsem wan spirit pikinini we i stretgud olgeta. Ale, from we enjel ya i wantem kasem wosip we i go long God nomo, hem i rebel, nao i kam Setan. Baebol i tokbaot wan storian bitwin Setan mo Jisas long wol. Long taem ya, Setan i soem klia se hem i wantem kasem hae nem. Setan i traem pulum Jisas blong i ‘bodaon, i mekem wosip long hem.’—Matiu 4:8, 9.

Long storian we Setan i gat wetem Jeova, Setan i soemaot klia tingting we i pusum hem blong wantem mekem rabis wok blong hem bakegen. Stori ya i stap long buk blong Job. Hem i talem se bambae hem i mekem eni samting blong pulum ol man oli lego God—Job 1:13-19; 2:7, 8.

Traem tingbaot: Sipos Setan i toktok wetem Jeova God mo Jisas Kraes, yumi no save talem se hem i wan rabis fasin nomo we i stap insaed long man. !God mo Pikinini blong hem, Jisas, tufala i no gat rabis fasin nating! Taswe, i klia se Setan i wan trufala man—wan rabis spirit man we i no gat respek long Jeova mo Jisas.

Ol rabis fasin we ol man oli stap mekem, oli pruvum se Setan i wan trufala man we i laef i stap. Ol neson long wol oli letem ol haf kakae oli stap roten nomo, be i gat plante man we oli stap hanggri from we oli no gat kakae. Ol neson oli stap hivimap ol tul blong faet we i save kilim fulap man i ded. Oli stap spolem win, solwota mo graon. Bighaf blong ol man oli no kasem save from wanem oli no laeklaekem olgeta nating, mo from wanem oli stap spolem olgeta. ?From wanem oli no kasem save?

Baebol i talemaot klia se Setan “i satem tingting blong ol man we oli no gat bilif.” (2 Korin 4:4, NW) Setan i yusum wan ogenaesesen we yumi no save luk, blong tantanem man. Hem i “jif blong ol devel.” (Matiu 12:24) Setan i olsem wan man blong kilim man i ided we i no wantem ol man blong oli luksave hem, se hem nao i stamba blong ol rabis fasin long wol ya. Hem i yusum ol rabis enjel long ogenaesesen blong hem, blong oli bos long fulap man we oli no luksave wok mo paoa blong hem.

!Yumi harem gud tumas from we Baebol i talemaot klia wok blong Setan mo ogenaesesen blong hem! Olsem nao, yumi save mekem sam samting blong blokem paoa blong Setan. Baebol i givim advaes long yumi se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.”—Jemes 4:7.