Tabu Spirit​—?From Wanem Tingting Blong Ol Man i Fasfas Long Saed Ya?

?WANEM ya tabu spirit? Kwestin ya i isi, be plante man oli luk se i had blong faenem ansa blong hem. Pop Benedict 16 i talem long wan bigfala hip blong man long Ostrelia se: “I luk olsem se i no gat rod blong yumi kasem save gud long Tabu Spirit.”

Ol man oli gat plante defdefren tingting long saed blong ansa blong kwestin ya, ?Wanem ya tabu spirit? Mo oli no suagud se weswan nao hem i stret ansa. Samfala oli ansa se:

• Tabu spirit i wan man we i stap insaed long ol disaepol blong Kraes.

• Hem i rod we God i yusum blong soem se hem i stap long wol.

• Hem i namba tri man long Triniti.

?From wanem tingting blong ol man i fasfas long saed blong tabu spirit? From we stat long ol yia 300 K.T., * sam man we oli stadi long ol tijing blong jos oli talem se tabu spirit i wan man we i sem mak long God. Be Baebol i no tijim tingting ya, mo ol faswan disaepol blong Kraes tu oli no tijim samting ya. Buk ya, The New Catholic Encyclopedia, i eksplenem se: “I klia we Oltesteman i no tokbaot spirit blong God se hem i wan man, . . . spirit blong God hem i paoa blong God nomo.” Buk ya i talem tu se: “Bighaf blong ol vas long Niutesteman oli soemaot se spirit blong God i wan samting, i no wan man; hemia i klia from we oli tokbaot spirit blong God mo paoa blong God olsem se tufala i sem mak.”

Tru ya, i had long ol man blong tingbaot se paoa i wan man. From samting ya, yumi luk long wan stadi we ol man oli mekem long Yunaeted Stet, se bighaf blong ol man oli sakemaot tingting ya se tabu spirit i wan man no wan “laef samting we i save tingting.” ?Olsem wanem? ?Tingting blong olgeta i stret? ?No yumi mas bilivim samting we ol man ya blong stadi long ol tijing blong jos oli talem, se “Tabu Spirit i wan Man we i gat prapa tingting mo filing blong hem olsem Papa blong yumi mo Pikinini blong hem”?

Blong faenem stret ansa blong ol kwestin ya, yumi mas lukluk i go long Tok blong God, Baebol. Hem i talemaot plante smosmol samting long saed blong tabu spirit. Aposol Pol i talem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok.”—2 Timoti 3:16.

?From wanem yu mas traehad blong faenemaot trutok long saed blong tabu spirit? From we trutok ya i save openem rod blong yu yu kasem help long God. ?Olsem wanem? ?Samtaem yu harem se yu no naf blong gohed long prapa paoa blong yu nomo? Jisas i promes long ol disaepol blong hem se: “Sipos yufala i wantem samting, yufala i mas gohed blong askem, nao bambae yufala i save kasem. . . . Yufala i save givim ol gudgudfala samting long ol pikinini blong yufala.  Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Tpirit long ol man we oli askem long hem.”—Luk 11:9, 13.

Long ol haf we oli kam biaen, Baebol nao bambae i eksplenem long yumi wanem ya tabu spirit. Mo bambae yumi luk olsem wanem tabu spirit i save givhan long laef blong yumi.

[Futnot]

[Tok blong pija long pej 3]

Baebol i eksplenem long yumi wanem ya tabu spirit