?God i Stap Mekem Wanem?

“Hae God. ?From wanem yu stap longwe tumas? ?From wanem yu stap haed taem we mifala i stap long trabol?”—OL SAM 10:1.

TAEM yumi lukluk ol stori long nius, yumi luksave se yumi laef long wan taem blong “trabol.” Mo taem trabol i kasem yumi from we narafala man i brekem loa, yumi kasem wan bigfala aksiden, no wan fren no famle i ded, yumi save harem nogud tumas. Ale yumi stap tingting nao se: ?God i stap luk ol samting ya? ?Hem i kea? ?Hem i rili stap?

?Be yu yu tingbaot finis sipos ol samting we yumi wantem God blong mekem, oli stret no maet oli stanap long ol rong tingting? Traem tingbaot wan smol pikinini we i harem nogud from we papa blong hem i go long wok. Pikinini ya i mestem papa blong hem bigwan mo i wantem se papa blong hem i kambak long haos. Hem i ting se papa blong hem i lego hem finis. Long ful dei ya, hem i gohed blong askem bakegen mo bakegen se: “?Wehem Papa?”

Yumi luksave kwiktaem nomo se tingting blong smol pikinini ya i rong. Papa blong hem i no lego hem, be hem i stap wok blong givim ol samting we famle i nidim. ?Olsem wanem? ?Yu no ting se maet yumi tu yumi gat wan rong tingting taem yumi askem se: “?Wehem God?”

Traem tingbaot: maet samfala oli wantem se God i kilim man i ded kwiktaem blong panisim olgeta we oli stap mekem sam nogud samting. Sam narafala bakegen, oli tingbaot God olsem Fata Krismas we wok blong hem i blong givim presen long ol man. Oli wantem se God i mas givim wan wok long olgeta, i halpem olgeta blong faenem wan man no woman we oli save mared long hem, mo i halpem olgeta blong winim bigfala mane long lotri tu.

Ol man oli gat tingting ya se God i mas mekem stret fasin i kamaot kwiktaem, mo hem i mas givim samting we oli askem long hem. Be taem oli luk we God i no mekem olsem we oli wantem, ale oli ting se God i no kea we yumi stap safa mo hem i no wantem save long ol samting we yumi nidim. ?Olsem wanem? ?Ol tingting ya oli tru? !Nogat! Blong talem stret, naoia Jeova God i stap wok blong givim ol samting we yumi ol man i nidim. Be hem i no mekem long fasin we yumi stap askem long hem.

Oraet, ?God i stap mekem wanem naoia? Blong ansa long kwestin ya, yumi mas tingting i gobak long taem ya we God i wokem faswan man. Long taem ya i gat wan samting we i spolem fasin fren we man i gat wetem God. Be nating se i olsem, i gat rod yet blong stretem problem ya.

Ol Nogud Samting We Oli Kamaot From Sin

Tingbaot wan haos we ol man oli no lukaot long hem mo hem i stap nating nomo blong plante yia. Ruf blong hem i lik, ol doa blong hem oli kamkamaot, mo wol afsaed long haos i nogud olgeta. Bifo, haos ya i gud nomo, be naoia i no moa olsem. Haos ya i nogud fulwan. I no isi blong fiksimap mo bambae i tekem taem blong mekem olsem.

Naoia tingbaot trabol we i hapen samwe 6,000 yia bifo, taem wan rabis enjel, hemia Setan, i pulum Adam mo Iv blong rebel agensem God. Bifo long taem ya, faswan man mo woman, tufala i gat strong bodi mo tufala i gat janis blong laef olwe wetem ol pikinini we bambae oli kamaot biaen long tufala.  (Jenesis 1:28) Be taem Adam mo Iv tufala i mekem sin, i olsem we tufala i spolem gud ol man we oli no bon yet.

Yumi no mas ting nating long ol nogud samting we i kamaot from rebelian ya. Baebol i talem se: “Bifo olgeta, wan man nomo [Adam] i statem fasin blong sin long wol ya. Mo from we hem i mekem sin, hem i ded.” (Rom 5:12) Sin i mekem se yumi ded. Be i no hemia nomo. Sin i spolem fasin fren blong yumi wetem God ya we i Wokem Yumi, mo i spolem yumi long saed blong bodi, tingting, mo filing tu. From samting ya, laef blong yumi ol man i sem mak long wan haos we i nogud finis. Gudfala man ya Job i tok tru nomo taem hem i tokbaot laef blong yumi ol man se “i sotfala nomo, mo i fulap long trabol.”—Job 14:1.

?Be olsem wanem? ?I tru se God i lego ol man afta we Adam mo Iv tufala i mekem sin? !Nogat! Stat long taem ya we tufala i mekem sin i kam kasem tede, Papa blong yumi long heven i stap wok blong givhan long ol man. Blong yumi save moa long saed blong ol samting we hem i stap mekem blong givhan long yumi, i gud yumi tingbaot tri rod blong fiksimap wan haos. Mo bambae yumi tingbaot olsem wanem wanwan long ol trifala rod ya i sem mak long ol samting we God i mekem finis blong ol man oli save kam gud bakegen.

1 Taem man blong haos i kam jekem haos ya we i nogud i stap, hem i mas tekem desisen se bambae hem i fiksimap haos ya no bambae hem i pulumdaon haos ya.

Kwiktaem nomo afta long rebelian long garen blong Iden, Jeova God i talemaot stamba tingting blong hem blong mekem ol man oli kam stret gud bakegen. Hem i talem long rabis enjel we i stap biaen long rebelian ya se: “Yu mo woman ya, bambae yutufala i no laeklaekem yutufala, bambae yutufala i stap agens long yutufala. Ol pikinini we bambae oli kamaot biaen long yu, mo ol pikinini we bambae oli kamaot biaen long hem, bambae oli stap badfren long olgeta. Nao wan long ol pikinini ya blong hem bambae i smasem hed blong yu, mo yu bambae yu kakae leg blong hem.”—Jenesis 3:15, futnot.

Toktok ya i soemaot promes blong Jeova blong spolem man ya we i stamba blong rebelian long garen blong Iden. (Rom 16:20; Revelesen 12:9) Mo tu, Jeova i talemaot wan profet tok long saed blong wan “pikinini” we long fiuja bambae hem i pemaot ol man long sin. * (1 Jon 3:8) Olsem nao, God i mekem wan promes we evriwan i harem, hemia se bambae hem i no spolem ol samting we hem i wokem, be bambae hem i fiksimap ol samting ya, min se bambae hem i mekem samting ya we i nogud, i kam gud bakegen. Be bambae i tekem taem blong mekem ol man oli kam stret gud olgeta olsem faswan man mo woman, long garen blong Iden.

2 Wan man i mekem plan blong haos ya mo plan i soemaot wanem samting blong mekem, blong haos i kam niuwan bakegen.

Jeova God i givim plante loa long ol man Isrel mo wan tempol we bambae oli save go long hem blong mekem wosip long Hem. Baebol i talem se ol samting ya “oli olsem sado nomo blong samting we i no kamtru yet.” (Kolosi 2:17) Oli olsem plan blong wan haos, oli soemaot pija blong wan samting we bambae i kam we i moa gud yet.

 Tingbaot ol sakrefaes blong ol anamol we ol man Isrel oli stap mekem blong God i fogivim sin blong olgeta. (Levitikas 17:11) Ol sakrefaes ya oli olsem sado nomo blong wan sakrefaes we i moa gud, we bambae i hapen plante handred yia biaen. Sakrefaes ya nao bambae i pemaot ol man long sin. * Plan blong haos tapolen mo tempol we ol man Isrel oli stap go long hem blong mekem wosip long God, oli pija blong samting we Mesaea bambae i mekem long fiuja. Oli soemaot samting we bambae hem i mekem stat taem hem i givim laef blong hem olsem wan sakrefaes i go kasem taem ya we hem i go antap long heven.—Lukluk pija long pej 7.

3 Man blong haos i jusum wan man blong bildim haos we bambae i save wok folem plan blong haos, mo mekem haos i kam niuwan bakegen.

Jisas hem i Mesaea we God i promes blong sanem i kam. Hem bambae i folem fasin we ol man Isrel oli mekem taem oli givim ol sakrefaes. Bambae hem i givim laef blong hem wan blong pemaot man. Yes, Jon Baptaes i singaot Jisas se “smol sipsip blong God, we hem bambae i tekemaot sin blong olgeta man long wol.” (Jon 1:29) Jisas i glad nomo blong mekem wok ya. Hem i talem se: “Mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem.”—Jon 6:38.

God i wantem se Jisas i ‘givim laef blong hem blong pem rod blong plante man oli go fri’ mo tu, hem i wantem we Jisas i mekem wan kontrak wetem ol man blong hem long saed blong wan Kingdom. (Matiu 20:28; Luk 22:29, 30) Kingdom ya i rod ya nomo we God bambae i yusum blong mekem stamba tingting blong hem i kamtru long saed blong ol man. !Nius long saed blong Kingdom blong God hemia nao wan “gud nius” from we nius ya i talemaot se God i stanemap wan gavman finis long heven we bambae i rulum wol!—Matiu 24:14; Daniel 2:44. *

Wok Blong Mekem Ol Samting Oli Kam Niuwan Bakegen, i Stap Gohed

Bifo we Jisas i go antap long heven, hem i givim wan oda long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. . . . Mo yufala i mas save se mi bambae mi stap wetem yufala oltaem, gogo wol ya i finis.”—Matiu 28:19, 20.

Taswe wok blong mekem ol man oli kam stret gud olgeta olsem faswan man mo woman long garen blong Iden, i no finis long taem ya we Jisas i ded. Wok ya bambae i gohed gogo kasem taem ya we Baebol i talem se rabis fasin blong “wol ya i finis.” Hemia taem we Kingdom blong God bambae i stat blong rulum wol. Taem ya i kam finis nao. Yumi save samting ya from we Jisas i talem se bambae i gat saen i kamtru klosap long taem ya we bambae rabis fasin blong “wol ya i finis.” Mo saen ya i stap kamtru naoia. *—Matiu 24:3-14; Luk 21:7-11; 2 Timoti 3:1-5.

Tede, ol Witnes blong Jeova long 236 kantri oli stap obei long tok ya blong Jisas blong go talemaot gud nius blong Kingdom blong God. Yes, magasin we yu stap ridim naoia i blong givhan long yu blong lanem moa long saed blong Kingdom ya mo samting we bambae hem i mekem. Long pej 2 blong evri Wajtaoa, bambae yu faenem ol toktok olsem se: “Magasin ya i talemaot gud nius blong Kingdom blong God blong leftemap tingting blong ol man. Kingdom ya i wan gavman long heven mo i no longtaem bambae hem i finisim ol rabis fasin mo mekem wol ya i kam wan paradaes. Magasin ya i pulum yumi blong bilif long Jisas Kraes, we hem i ded blong yumi save kasem laef we i no save finis. Jisas Kraes i stap rul finis olsem King long Kingdom blong God.”

I tru, ating naoia yu stap harem ol nius blong teroris mo ol disasta, mo maet yu kasem wan trabol we i mekem yu yu harem nogud tumas. Be taem yu stadi long Baebol bambae yu save se God i no lego yumi. Defren olgeta, hem “i no stap longwe long yumi nating.” (Ol Wok 17:27) Mo promes blong hem blong mekem ol man oli kam stret gud olgeta mo wol i kam wan naesfala ples bakegen olsem long taem blong Adam mo Iv, bambae i mas kamtru.—Aesea 55:11.

[Ol futnot]

 [Tok blong pija long pej 7]

(Lukluk niuspepa)

‘Pija Blong Prapa Rum We i Tabu’—?Haos Tapolen i Pija Blong Wanem?

OLTA

God i glad blong akseptem sakrefaes blong Jisas.—HIBRUS 13:10-12.

HAE PRIS

Jisas.—HIBRUS 9:11.

1 Long Dei blong Stretem Sin, hae pris i mekem sakrefaes blong tekemaot sin blong ol man.—LEVITIKAS 16:15, 29-31.

1 Long Naesan 14, long yia 33 K.T., Jisas i givim laef blong hem olsem wan sakrefaes long bihaf blong yumi.—HIBRUS 10:5-10; 1 JON 2:1, 2.

RUM WE I TABU

Laef blong Jisas long wol, olsem pikinini blong God we tabu spirit i makemaot hem blong i go long heven.—MATIU 3:16, 17; ROM 8:14-17; HIBRUS 5:4-6.

KALIKO

Bodi blong Jisas we i gat mit mo blad blong hem, hem i olsem kaliko ya we i seraotem laef blong wol mo laef blong heven.—1 KORIN 15:44, 50; HIBRUS 6:19, 20; 10:19, 20.

2 Hae pris i pastru long Rum we i Tabu, i go long Rum we i Tabu we i Tabu, narasaed long kaliko ya.

2 Afta we Jisas i laef bakegen, hem i go antap long heven, hemia i olsem we hem i go narasaed long kaliko ya. Nao hem i ‘stanap long fes blong God blong toktok long saed blong yumi.’—HIBRUS 9:24-28.

RUM WE I TABU WE I TABU

Heven.—HIBRUS 9:24.

3 Taem hae pris i stap long Rum we i Tabu we i Tabu, hem i mas sakem smosmol blad blong sakrefaes ya i go antap long bokis blong promes.—LEVITIKAS 16:12-14.

3 Taem Jisas i karem praes blong blad blong hem we i ron, i go long God, hem i stretem sin blong yumi long wan fasin we i gud moa.—HIBRUS 9:12, 24; 1 PITA 3:21, 22.