?Yu Yu Save Singaot God Long Nem Blong Hem?

Tingbaot sipos wan haeman i talem long yu blong singaot hem long prapa nem blong hem. Ating bambae yu sapraes we hem i mekem long yu olsem se yu fren blong hem. Plante taem yumi singaot ol haeman long ol tok olsem, “Presiden,” “Masta,” no “King.” Taswe, sipos wan haeman i talem long yu se, “Plis, yu singaot mi long nem blong mi nomo,” ating bambae yu harem gud from we man ya i tingbaot yu olsem fren blong hem.

TRU God i talem long Tok blong hem Baebol, se: “Mi mi Jeova. Hemia nao nem blong mi.” (Aesea 42:8, NW) Ol man oli singaot God long plante defren tok, olsem “God we i Wokem olgeta samting,” “God ya we i gat Olgeta Paoa,” mo “Haefala Masta mo King.” Be oltaem God i glad we ol man blong hem, oli singaot hem long prapa nem blong hem. Samting ya i mekem ol man blong hem oli harem gud tumas.

Taem Moses i wantem toktok wetem God, hem i talem se: “[Jeova] yu yu Masta blong mi.” (Eksodas 4:10) * Taem King Solomon i mekem opening blong haos prea long Jerusalem, hem i statem prea blong hem se: “[Jeova]. Yu yu God blong mifala.” (1 King 8:22, 23) Mo taem profet Aesea i wantem toktok long God long saed blong ol man Isrel, hem i se: “[Jeova], yu yu Papa blong mifala.” (Aesea 63:16) Yumi luksave se Papa blong yumi long heven, i wantem we yumi singaot hem long prapa nem blong hem.

I tru se i impoten blong singaot God long prapa nem blong hem, Jeova. Be i no samting ya nomo we yumi mas mekem. Yumi mas save gud hem mo mining blong nem blong hem. Jeova i promes long ol man we oli lavem hem mo trastem hem se: “Olgeta man we oli singaot long mi long nem blong mi, mi bambae mi sevem olgeta.” (Rom 10:13) Tru ya, God bambae i sevem yumi sipos yumi singaot hem long prapa nem blong hem. I min se nem ya i spesel. ?Wanem mining blong hem? ?Mo yumi mas mekem wanem blong save gud God mo nem blong hem?

[Futnot]