?Bambae Bigfala Faet Blong Amagedon i Kamtru Wetaem?

“Mi luk wan bigfala hip blong ol man, we olgeta i plante we plante, i no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen, mo long olgeta lanwis. . . . Hemia ol man ya we oli kasem bigfala trabol, . . . be naoia oli winim ol trabol ya finis.”—REVELESEN 7:9, 14.

OL SAMTING oli rere finis blong bigfala faet ya Amagedon. ?From wanem yumi talem olsem?

Plante man long olgeta ples long wol, oli stap joen finis blong wosipim Jehova. Mo oli stap folem ol loa we Baebol i talem, blong oli gat ol gudfala fasin. God i stap blesem olgeta, i mekem se plante milian man blong ol defren kantri, laen, mo lanwis oli stap joen gud olsem wan famle nomo, we oli lavlavem olgeta. Olgeta ya we oli joen olsem wan bigfala famle, hemia ol Witnes blong Jehova.—Jon 13:35.

I no longtaem bambae Setan i singaot ol ami blong hem oli kam wanples, mo bambae hem i lidim olgeta blong agensem ol man ya we oli man blong pis. I luk olsem se bambae i isi nomo blong spolem olgeta. Bambae Setan i mekem i moa nogud long olgeta i bitim ol narafala taem bifo. (Esikel 38:8-12; Revelesen 16:13, 14, 16) ?From wanem yu save gat strong tingting se bambae bigfala faet ya i kamtru? Baebol i talemaot klia sam samting we bambae i hapen, we i givhan long yumi blong save wetaem bigfala faet blong Amagedon bambae i kamtru. Plante long ol samting ya we Baebol i talemaot, oli stap kamtru naoia.

Ol Samting We Yu Stap Luk Oli Kamtru

Ol disaepol blong Jisas oli askem se wanem bambae i givhan long ol man blong oli save se klosap nao bambae “wol ya i finis.” (Matiu 24:3) Blong ansa long olgeta, Jisas i tokbaot wan taem we “ol man bambae oli mekem faet long ol narafala man. Mo ol kantri bambae oli mekem faet long ol narafala kantri. Ol man bambae oli gat hadtaem blong kasem kakae. Mo olbaot long wol, bambae graon i seksek.” Mo hem i talem se: “Ol samting ya, i olsem we woman i stat harem we bak blong hem i soa blong i bonem pikinini.” (Matiu 24:7, 8) Aposol Pol i talem se hemia ol “Lasdei.” Hem i talem se long taem ya, “laef long wol ya bambae i kam strong tumas.” (2 Timoti 3:1) ?Wanem tingting blong yu? ?Ol profet tok ya oli stap tokbaot ol samting we yu stap luk tede?

 ?From wanem laef long taem ya bambae i strong tumas? Aposol Jon i givhan long yumi blong save ansa. Hem i talemaot se Jisas i sakemaot Setan mo ol rabis enjel oli aot long heven, oli kamdaon long wol. Bambae oli lidim ol man oli go krangke, be i blong “smol taem nomo.” Jon i talem se long taem ya Setan i “kros tumas.” (Revelesen 12:7-12) I no long wan ples nomo we ol man oli kros mo oli raf, be hemia long olgeta ples long wol. ?Yu yu luk se i olsem?

Jisas i talem se long taem ya we bambae i gat plante trabol, bambae i gat wan nambawan wok we ol man blong God oli mekem. Hem i talem se: “Bambae ol man oli stap talemaot gud nius ya, se God i King blong olgeta man [“gud nius ya blong kingdom,” NW]. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.” (Matiu 24:14) Tede, ol Witnes blong Jehova oli stap talemaot gud nius blong Kingdom blong God long plante kantri, i bitim 235 kantri mo i bitim 500 lanwis. Oli wokem tufala magasin ya Wajtaoa mo Wekap!, mo oli seremaot long plante man long wol, i bitim ol narafala magasin we ol man i seremaot. Mo tu ol Witnes oli tanem Baebol long samwe 100 lanwis. Wok ya we oli mekem, oli no kasem pei from, mo wok ya i stanap long ol presen mane nomo. ?Olsem wanem? ?Yu ting se wok ya blong talemaot gud nius i mekem profet tok blong Jisas i kamtru?

Baebol i talemaot sam samting we bambae i hapen bifo we bigfala faet ya i stat. Taem ol samting ya oli kamtru finis, bambae Jehova God i mekem faet long olgeta we oli stap agensem hem. Yumi save tokbaot tri profet tok we bambae yu luk oli kamtru.

Ol Samting We Bambae Yu Luk Oli Kamtru i No Longtaem

Profet tok namba 1. Baebol i talem se ol neson bambae oli talem se “olgeta samting i kwaet, i gud nomo.” Yes, bambae oli talemaot we i gat pis mo seftaem. Bambae oli ting se klosap oli winim ol bigfala trabol long wol. Be ol samting we i kamaot afta we oli talem toktok ya, bambae i soemaot se i no gat pis nating.—1 Tesalonaeka 5:1-3.

Profet tok namba 2. Biaen bambae ol defdefren gavman oli mekem wan desisen blong agensem ol jos long wol. Baebol i tokbaot ol gavman ya se oli olsem wael anamol. Mo i tokbaot ol giaman jos long wol se oli olsem wan woman we i sidaon long baksaed blong wael anamol ya. (Revelesen 17:3, 15-18) Ol gavman we oli olsem wael anamol ya, bambae oli mekem samting we God i wantem, nating we oli no save se oli stap mekem olsem. Bambae oli spolem olgeta jos we oli giaman se oli wok long nem blong God.

Wan vison we aposol Jon i luk i soemaot samting we ol gavman bambae i mekem long ol jos, hem i se: “Ol ten hon blong anamol ya, we yu luk, bambae oli no laekem woman ya nating, oli agensem hem. Bambae oli tekemaot olgeta samting we hem i gat, mo bambae oli livim hem i stap we i neked nomo. Mo bambae oli kakae ol mit blong bodi blong hem, nao bambae oli bonem hem long faea blong spolem hem olgeta. Bambae oli mekem olsem, from we God i putum long tingting blong olgeta, blong oli mekem olsem we hem i wantem.”—Revelesen 17:16, 17.

Profet tok namba 3. Afta we ol gavman oli spolem ol giaman skul, bambae Setan i pulum ol neson blong oli mekem i nogud long olgeta we oli wosipim Jehova God.—Revelesen 7:14; Matiu 24:21.

?Olsem Wanem Long Yu?

Sipos yu no gat janis blong stadi gud long Baebol, maet i had blong yu bilif se ol samting we yumi tokbaot bambae oli kamtru. Be yu save gat strong tingting se olgeta smosmol samting we Baebol i talemaot bambae i kamtru i no longtaem. Ol profet tok we Baebol i talemaot longtaem finis, oli stap kamtru. Taswe yu save trastem ol tok ya blong God. *

I gud yu tekem taem blong faenemaot from wanem ol Witnes blong Jehova oli bilif strong se faet ya blong “Bigfala Dei blong God ya we i gat olgeta paoa” i klosap finis. Mo bambae yu kasem save from wanem yu no nid blong fraet long bigfala faet ya. I gud yu askem long olgeta blong oli tokbaot wanem we Baebol i talem se yu mas mekem, blong yu stap sef wetem olgeta ya we Jehova God bambae i sevem olgeta. (Revelesen 16:14) Maet bambae samting we yu lanem i jenisim tingting blong yu long saed blong fiuja.

[Futnot]

[Tok blong makem poen long pej 8]

?Wok we ol Witnes blong Jehova oli mekem, hemia nao wok we profet tok long Baebol i tokbaot?