Ol man Jiu oli berem ol dedman blong olgeta kwiktaem afta we oli ded, plante taem long sem dei nomo. I gat tu risen from wanem oli mekem olsem. Faswan se, from we ples blong olgeta long Medel Is i hot tumas, mekem se ol dedbodi oli kam roten kwiktaem nomo. Nambatu se, ol man long taem ya oli bilif se sipos oli livim wan dedbodi i stap blong sam dei, we oli no berem, hemia i no soemaot respek long man ya we i ded, mo long ol famle blong hem.

Long ol fofala buk blong Baebol we oli kolem ol Gospel, mo long buk blong Ol Wok, i gat fo stori we i soemaot se oli berem man long sem dei nomo we hem i ded. (Matiu 27:57-60; Ol Wok 5:5-10; 7:60–8:2) Long sam handred yia bifo, taem Jekob mo famle blong hem oli stap wokbaot i go long wan narafala ples, Rejel we i gudfala waef blong Jekob i ded. Jekob i no tekem dedbodi blong Rejel i gobak long ples we oli stap berem ol famle blong olgeta long hem. Be hem i berem Rejel “long saed blong rod we i go long . . . Betlehem.”—Jenesis 35:19, 20, 27-29.

I gat ol stori long Baebol we oli tokbaot fasin blong berem ol dedman. Ol stori ya oli soemaot se ol man Jiu oli rerem gud dedbodi bifo we oli berem. Ol famle mo ol fren oli wasem bodi blong hemia we i ded, oli putum oel mo ol samting we oli gat gudfala smel, mo oli kavremap long kaliko. (Jon 19:39, 40; Ol Wok 9:36-41) Ol man we oli stap raonabaot oli save kam soem sore blong olgeta, mo oli leftemap tingting blong ol famle.—Mak 5:38, 39.

Long plante ples long Isrel, ol man oli katem ol hol long ol ston, mo oli berem ol famle blong olgeta long ol hol ya. Taem oli mekem olsem, oli folem fasin blong ol bubu blong olgeta bifo. Taem Ebraham, Sera, Aesak, Jekob, mo sam narafala bakegen oli ded, oli berem olgeta long wan hol blong ston long Makpela, klosap long Hebron.—Jenesis 23:19; 25:8, 9; 49:29-31; 50:13.

Ol man oli berem Jisas long wan hol long ston we ol man oli katemrere finis. (Mak 15:46) Plante taem, maot blong hol blong ston i smol nomo. Insaed long hem, ol man oli katem ol ples blong putum dedbodi blong famle blong olgeta. Afta we bodi blong dedman i roten, ol man oli go tekem ol bun blong hem mo oli putum long wan bokis we oli katem long ston. Hemia nao kastom we ol man Jiu long taem blong Jisas oli stap folem. Long rod ya, ol famle oli gat rum insaed long hol blong ston, blong oli berem famle blong olgeta long hem.

Folem Loa blong Moses, ol man Jiu oli no mas berem ol dedman long Sabat dei. Jisas i ded tri aoa bifo we Sabat dei i stat. Samting ya i mekem se man Aramatia we nem blong hem Josef, wetem sam narafala man bakegen, oli berem Jisas stret nomo. Oli no gat taem blong putum sam lif we i gat gudfala smel long bodi blong hem. (Luk 23:50-56) Taswe afta long Sabat dei, sam long ol fren blong Jisas oli go stret long beregraon from we oli wantem putum ol samting ya long bodi blong Jisas.—Mak 16:1; Luk 24:1.