Antoni: Halo, Tim. Mi glad blong luk yu bakegen.

Tim: Mi tu mi glad blong luk yu.

Antoni: Mi karem sam niufala Wajtaoa mo Wekap! blong yu. Ating bambae yu glad blong ridim ol haf we oli stap insaed.

Tim: Tangkiu tumas. Mi glad se yu kam tede, from we mi mi wantem askem wan kwestin long yu.

Antoni: I oraet yu save askem.

Tim: Lastaem mi stap storian wetem wan fren blong mi. Mi tokbaot ol buk we yu stap givim long mi mo mi talem long hem se mi laekem tumas. Be hem i talem se mi no mas ridim ol buk ya from we ol Witnes blong Jehova oli no bilif long Jisas. ?Hemia i tru ya? Mi talem long fren blong mi se taem yu kambak, bambae mi askem kwestin ya long yu.

Antoni: Mi glad we yu kam askem stret long mi. Ating yu yu agri se blong faenemaot samting we man i bilif long hem, yu mas askem stret long hem.

Tim: Yes hemia nao samting we mi tingbaot.

Antoni: Ol Witnes blong Jehova oli bilif long Jisas. Mifala i save se i impoten tumas we man i bilif long Jisas, sipos hem i wantem we God i sevem hem.

Tim: Mi save se yufala i bilif long Jisas. Be taem fren blong mi i talem olsem, naoia mi wantem save se i tru no nogat. Mo mi tingbaot se yumitu no tokbaot samting ya yet.

Antoni: ?Yu yu glad sipos mi soem sam vas blong Baebol long yu, we oli soemaot se i impoten blong bilif long Jisas? Ol vas ya mifala i yusum oltaem, taem mifala i storian wetem ol man.

Tim: I stret.

Antoni: I gud yumitu ridim ol tok blong Jisas, long Jon 14:6. Hem i stap storian wetem wan disaepol blong hem. Long vas ya, “Jisas i talem long hem se, ‘Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.’” Folem vas ya, ?hu nao i olsem rod we i tekem yumi go klosap long God?

Tim: Hemia Jisas.

Antoni: Yes. Mifala i bilif strong long samting ya. Bambae mi askem wan kwestin long yu: Taem yumi prea, God i talem se long en blong ol prea ya, ?yumi mas sanem prea long nem blong hu?

Tim: Long nem blong Jisas.

Antoni: I tru. From samting ya olgeta prea we mi mi mekem, mi sanem long nem blong Jisas. Olgeta Witnes blong Jehova oli prea olsem.

Tim: I gud blong save samting ya.

Antoni: Yumitu save ridim wan narafala vas, long Jon 3:16. Hemia wan impoten vas long Baebol we plante man oli singaot se wan smol Gospel. Vas ya i soemaot evri samting we ol fofala Gospel oli talem blong tokbaot laef blong Jisas mo wok blong prij we hem i mekem long wol ya. Maet yu glad blong ridim vas ya.

 Tim: Oke. I talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”

Antoni: Tangkiu. ?Ating yu save vas ya finis?

Tim: Yes, mi harem oli tokbaot plante taem long jos blong mi.

Antoni: Plante man oli save vas ya. Taem yu lukluk gud long vas ya, i gud yu makem tok blong Jisas, we i talem se God i lavem yumi tumas nao hem i mekem se yumi save gat laef we i no save finis. Be, ?yumi mas mekem wanem blong kasem laef ya?

Tim: Yumi mas bilif.

Antoni: Yes. Yu mas bilif long stret pikinini blong God, Jisas Kraes. Hemia i openem rod blong yu save kasem laef we i no save finis, yu save luk long pej 2 blong magasin we mi givim long yu. Magasin ya “i pulum yumi blong bilif long Jisas Kraes, we hem i ded blong yumi save kasem laef we i no save finis. Jisas i stap rul finis olsem king long Kingdom blong God.”

Tim: Man tru ya, ol magasin ya oli pruvum se yufala i bilif long Jisas.

Antoni: Hemia nao.

Tim: Be ?from wanem ol man oli talem se yufala i no bilif long Jisas?

Antoni: I gat plante risen. Be plante taem oli talem olsem from we oli harem ol narafala man oli talem. No maet ol lida blong jos blong olgeta oli talem long olgeta.

Tim: Mi ting se ol man oli talem olsem, from we yufala i talem se yufala i Witnes blong Jehova, i no Witnes blong Jisas.

Antoni: Maet hemia tu wan risen.

Tim: Be ?from wanem yufala i tokbaot Jehova oltaem?

Antoni: Mifala i bilif se i impoten blong yusum nem blong God, Jehova, olsem we pikinini blong hem i mekem. Yu traem luk samting we Jisas i talem long Papa blong hem taem hem i prea. Bambae yumitu luk long Jon 17:6. ?Plis yu save ridim vas ya?

Tim: Yes. “Ol man ya we yu yu tekemaot olgeta long wol ya blong givim long mi, mi mi stap talemaot nem blong yu long olgeta blong mekem olgeta oli save yu. Fastaem, olgeta oli man blong yu, be yu yu putum olgeta long han blong mi, blong oli man blong mi. Olgeta oli stap obei long ol tok blong yu.”

Antoni: Tangkiu. Yu luk long vas ya Jisas i talem se hem i talemaot nem blong God long olgeta. ?Yu ting se from wanem hem i mekem samting ya?

Tim: Mi no save.

Antoni: Maet i gud yumitu ridim wan narafala vas, we i givim moa save long saed ya. Mi stap tingbaot vas ya long Ol Wok 2:21. Hem i talem se: “Olgeta man we oli singaot mi long nem blong mi, mi bambae mi sevem olgeta.” Naoia ating yu agri se sipos yumi singaot long nem ya Jehova, bambae hem i sevem yumi. Jisas tu i save samting ya.

Tim: Yes, i tru ya.

Antoni: Jisas i save se, blong ol man blong hem oli sef, i impoten we oli save nem blong God mo oli yusum nem blong hem. Mo hemia nao bigfala risen from wanem mifala i tokbaot nem blong Jehova oltaem. Mifala i luksave se i impoten tumas we ol man oli save nem blong God, taswe mifala i stap givhan long ol man blong singaot long nem ya.

Tim: Nating sipos ol man oli no save nem blong God mo oli no yusum nem ya, be taem oli talem God, oli save God ya we oli stap tokbaot.

Antoni: Maet i tru. Nating se i olsem, taem God i talem nem blong hem long yumi, hemia i mekem se i isi long yumi blong kam klosap long hem.

 Tim: ?Yu minim wanem?

Antoni: Yu traem tingbaot: Yumi no nid blong save nem ya Moses. Yumi save talem nomo se man ya we i seraotem Red Si, no man ya we i kasem Ten Komanmen. Noa tu, yumi no nid blong save nem blong hem. Yumi save talem nomo se man ya we i wokem wan bigfala sip mo i sevem famle blong hem mo ol anamol. Hemia i sem mak long Jisas tu. Yumi save talem nomo se man we i kamdaon long wol blong i ded from sin blong yumi. ?Yu ting se i stret blong mekem olsem?

Tim: Yes mi ting se i oraet nomo.

Antoni: Be God i mekem we yumi save stret nem blong olgeta wanwan. Taem yumi save stret nem blong olgeta, yumi tingbaot se stori blong olgeta i tru. Nating se yumi neva mitim Moses, Noa, mo Jisas, be taem yumi save nem blong olgeta, hemia i mekem yumi tingbaot se ol man ya oli rili stap.

Tim: !Mi neva tingbaot samting ya, be i tru ya!

Antoni: I gat wan narafala risen from wanem ol Witnes blong Jehova oli yusum nem blong God oltaem. Mifala i wantem givhan long ol man blong oli bilif se Jehova i tru God we ol man oli save kam klosap long hem. Mo tu, mifala i tinghae long Jisas from hem nao hem i impoten man ya we i save sevem yumi. Maet i gud yumitu ridim laswan vas.

Tim: I oraet.

Antoni: Maet yu tingbaot tok blong Jisas we yumitu ridim finis long Jon 14:6, we i se: “Mi nao rod ya, mo mi mi stamba blong trutok, mo mi stamba blong laef.” Be naoia i gud yumitu ridim ol vas bifo long vas 6, i gud yu makem samting we Jisas i talem long Jon 14:1. ?Plis yu save ridim tok we Jisas i talem long en blong vas ya?

Tim: Oke. Vas ya i talem se: “Yufala i mas bilif long God, mo yufala i mas bilif long mi tu.”

Antoni: Tangkiu, ?hemia i min se yumi mas bilif long God nomo?

Tim: No. Jisas i talem se yumi mas bilif long hem tu.

Antoni: Yes. Maet yu agri se i no naf we yumi talem nomo se yumi bilif long God mo long Jisas. Ol samting we yumi mekem long laef blong yumi oli mas soemaot se yumi bilif.

Tim: Yes hemia i tru ya.

Antoni: ?Be, wan man i save soemaot olsem wanem se hem i rili bilif long God mo long Jisas? ?Maet yumitu save tokbaot ansa blong kwestin ya long wan narafala taem? *

Tim: Yes i gud.