JOSEF i stap wokbaot long vranda we i tudak, mo swet blong hem i stap ron from we hem i stap wok had long ples we i hot. San i strong long haos kalabus blong Ijip, mo ples i hot tumas, olsem wan oven blong kukum brikis. I olsem se hem i save hamas brikis we oli stap long wol blong haos kalabus ya, mo hem i save evri ples we i gat smosmol krak long hem. Ples ya i kam olsem haos blong hem. Ol man long kalabus ya, oli tinghae long Josef. Nating se i olsem, hem i stap yet olsem wan presina.

Maet oltaem hem i stap tingbaot ol samting we hem i mekem, blong lukaot long ol sipsip blong papa blong hem long Hebron. Hem i gat samwe 17 yia, taem papa blong hem Jekob, i sanem hem blong go luk ol brata blong hem, mo faenemaot sipos oli oraet. Ol brata blong hem oli stap plante kilometa longwe long haos blong olgeta. I luk olsem se naoia, Josef i no moa fri olsem we hem i tingbaot. Ol brata blong hem oli jalus long hem, nao oli wantem kilim hem i ded. Biaen, oli salem hem olsem wan slef i go long Ijip. Hem i wok long haos blong Potifa, wan haeman blong Ijip. Potifa i trastem gud Josef, kasem taem we woman blong hem i giaman se Josef i slip wetem hem. Nao oli putum Josef long kalabus. *—Jenesis, japta 37, 39.

Naoia Josef i gat 28 yia, mo hem i wan slef we i stap kalabus blong klosap 10 yia. Laef blong hem i had, mo ol samting oli no kamtru olsem we hem i stap tingbaot. ?Olsem wanem? ?Wan dei bambae hem i fri? ?Bambae hem i luk olfala papa blong hem bakegen, mo yangfala brata blong hem Benjamin? ?Bambae hem i stap long kalabus ya kasem wetaem?

Maet samtaem yumi harem olsem Josef. Laef blong yumi i had, mo ol samting oli no kamtru olsem we yumi tingbaot taem yumi yangfala. I tru ol trabol oli save mekem yumi harem nogud, mo oli gohed blong longtaem. Mo hemia i save mekem i had blong yumi winim ol trabol ya. I gud yumi luk wanem we yumi save lanem long stori blong Josef.

Josef i save se God blong hem Jehova i neva fogetem hem. Mo tingting ya i givhan long hem, blong winim ol hadtaem long laef blong hem. Nating se hem i stap kalabus long wan defren ples, be Jehova i faenem rod blong blesem Josef. Taswe, Baebol i talem se: “Oltaem Hae God i stap wetem hem, i stap blesem hem. Nao bos blong kalabus ya i glad long hem.” (Jenesis 39:21-23) Taem Josef i gohed blong wok had, Jehova i blesem hem. Samting ya i leftemap tingting blong Josef blong luksave se, oltaem Jehova i stap wetem hem.

?Olsem wanem? ?Hemia plan blong Jehova blong letem Josef i stap olwe long kalabus ya? Josef i no sua long samting ya, be hem i gat strong tingting blong prea long Jehova mo tokbaot trabol blong hem. Olsem oltaem, Jehova i ansa long prea blong Josef, be long wan rod we Josef i no tingbaot. Wan dei oli putum tu man insaed long kalabus, mo ol man we oli stap long kalabus oli mekem plante noes. Tufala man ya, oli wokman blong Fero. Wan hem i bos long ol man blong mekem bred blong King, mo narawan hem i bos blong ol man blong lukaot long waen blong King.—Jenesis 40:1-3.

Man we i bos long kalabus, i trastem Josef blong i lukaot long tufala wokman blong King. * Wan naet tufala  tugeta i drim, mo ol drim we tufala i luk oli mekem tingting blong tufala i fasfas. Taem Josef i luk tufala long moning, hem i luksave se i gat wan samting i rong. Ale hem i askem long tufala se: “Mi mi luk we tingting blong yutufala i stap trabol tumas long wan samting. ?Wanem samting ya?” (Jenesis 40:3-7) Maet gudfala fasin blong Josef i mekem se tufala i no fraet blong talemaot ol trabol blong tufala. Josef i no save se storian blong olgeta, bambae i jenisim laef blong hem. Sipos Josef i no bin soem se hem i intres long tufala ya, maet bambae oli no save storian. Samting we Josef i mekem i pulum yumi blong askem se, ‘?Mi mi soemaot se mi bilif long God, taem mi toktok long ol man?’

Tufala man ya i talem se, drim we tufala i luk i mekem tufala i wari. Mo tu, i nogat man we i save talemaot mining blong drim blong tufala. Ol man Ijip oli tinghae long ol drim we oli luk, mo oli dipen fulwan long ol man we oli naf blong talemaot mining blong ol drim blong olgeta. Tufala man ya i no save se drim blong tufala i kam long God blong Josef, hemia Jehova. Be Josef i save samting ya. Ale, hem i talem long tufala se: “Paoa blong talemaot mining blong drim, hem i stap long God blong mifala nomo. Yutufala i traem talemaot tufala drim ya long mi.” (Jenesis 40:8) Ol tok blong Josef oli impoten yet long ol man we oli stap stadi Baebol tede. !Sipos olgeta man we oli wosipim God, oli gat tingting daon! Yumi mas glad blong lego prapa tingting blong yumi mo dipen long God, blong kasemsave mining blong tok blong hem.—1 Tesalonaeka 2:13; Jemes 4:6.

Bos blong ol man blong lukaot long waen blong King i go fastaem. Hem i talem long Josef se hem i luk wan rop blong grep we i gat tri han blong hem, mo i gat ol flaoa blong hem, mo i gat ol frut blong hem we oli raep. Mo man ya i i karem kap blong King mo i skwisimaot wota blong ol grep ya i go long hem. Taem Josef i harem samting ya, hem i talem tangkiu long Jehova, from we hem i kasemsave mining blong drim ya. Ale hem i talem long man ya se, mining blong drim ya i olsem. Tri han blong rop ya, hemia tri dei. Bambae i no kasem tri dei yet, Fero bambae i putumap yu bakegen long wok ya we yu stap mekem bifo. Man ya i glad tumas long ol tok blong Josef, nao Josef i askem hem blong mekem wan samting. Hem i talem se: “Plis yu kaen long mi bakegen, yu tokbaot mi long fes blong king, blong givhan long mi blong mi aot long kalabus ya.” Josef i tokbaot trabol we ol brata blong hem oli mekem long hem, mo tu hem talem se oli putum hem long kalabus blong nating nomo.—Jenesis 40:9-15.

Taem man we i bos long ol man blong mekem bred blong King, i luk we mining blong drim we Josef i talem i leftemap tingting blong narafala man ya, hem i askem long Josef blong talemaot mining blong drim blong hem tu. Hem luk tri basket blong bred long hed blong hem, mo ol pijin oli stap kakae. Josef i talemaot mining blong drim ya. Be nius ya i no mekem man ya i harem gud. Nao Josef i talem se: “Bambae i no kasem tri dei yet, king bambae i tekemaot yu long kalabus ya, i lukluk long bisnes blong yu bakegen, nao bambae i katemaot hed blong yu, mo i hangem bodi blong yu long wan pos. Mo ol pijin bambae oli kam kakae bodi blong yu.” (Jenesis 40:16-19) Josef i mekem i sem mak long ol man we oli holemstrong long God tede. Hem i  talemaot nius we i mekem man i glad, mo nius blong jajmen we bambae i hapen i no longtaem.—Aesea 61:2.

Tri dei biaen, ol tok blong Josef oli kamtru. Fero i mekem wan lafet blong betde, wan samting we ol man blong God bifo, oli no stap mekem. Fero i talemaot samting we bambae i hapen long tufala man ya. Man we i bos long ol man blong mekem bred blong King, hem i ded olsem we Josef i talem. Be man we i bos long ol man blong karem waen blong King, hem i gobak long wok we hem i stap mekem fastaem. Sore tumas, hem i fogetem wanem we Josef i talem long hem.—Jenesis 40:20-23.

Tu ful yia i pas. (Jenesis 41:1) !Yu traem tingbaot olsem wanem Josef i stap harem nogud! Maet Josef i gat strong tingting afta we Jehova i givhan long hem blong talemaot mining blong drim blong tufala man ya. Afta long taem ya, evri moning taem Josef i wekap, hem i gat strong tingting se long dei ya bambae hem i kamaot long kalabus. Be nogat, hem i gohed yet blong stap long kalabus. Maet tufala yia ya, oli ol had yia long laef blong Josef. Nating se i olsem, hem i neva lego Jehova. Bitim we hem i harem nogud, hem i gat strong tingting blong stanap strong. Mo ol hadtaem ya oli mekem hem i kam strong moa.—Jemes 1:4.

Long ol lasdei ya, yumi evriwan i nidim blong stanap strong. Yumi mas gat strong tingting, longfala tingting, mo pis long tingting we God i givim blong yumi save fesem ol trabol we yumi stap kasem evri dei. Hem i save givhan long yumi blong yumi winim ol samting we oli mekem yumi harem nogud, mo blong putum tingting blong yumi long ol promes blong hem, olsem Josef.—Rom 12:12; 15:13.

Maet man we i bos long ol man blong karem waen blong King i fogetem Josef, be Jehova i no fogetem hem. Wan naet Jehova i mekem Fero i luk wan drim we hem i no save fogetem. Long faswan drim, hem i luk seven kao we oli fatfat gud mo skin blong olgeta i saen gud, we oli kamaot long Nael Reva. Mo i gat seven kao we oli kamaot folem olgeta, be oli bunbun nogud. Oli girap oli kakae ol seven kao ya we oli fatfat gud. Biaen hem i luk wan stik blong wit we i gat seven bandel we oli nambawan. Mo hem i luk wan narafala stik blong wit we i gat seven bandel we oli slak mo oli smosmol. Nao ol seven slak bandel ya, oli kakae ol seven gudfala bandel wit ya. Long moning taem Fero i wekap, tingting blong hem i trabol tumas, nao hem i singaot ol waesman blong hem mo ol man blong mekem majik blong oli talemaot mining blong drim ya. Be olgeta evriwan oli no naf blong talemaot. (Jenesis 41:1-8) Maet oli sek mo oli talem ol tingting we i olbaot, we yumi no save. Taswe, tingting blong Fero i foldaon, mo hem i wantem save mining blong drim ya.

!Wantaem nomo, man we i bos long ol man blong karem waen blong King, i tingbaot Josef! Tingting blong hem i stikim hem, nao hem i talemaot yangfala man ya we i stap long kalabus, we tu yia bifo hem i bin talemaot mining blong drim blong hem, mo man we i bos blong karem bred blong King. Kwiktaem nomo Fero i singaot Josef blong i kam luk hem.—Jenesis 41:9-13.

Yu traem tingbaot filing blong Josef taem ol wokman blong King oli kam singaot hem. Kwiktaem nomo hem i jenisim ol klos blong hem, mo i katem hea blong hem olsem ol man Ijip. Hem i prea strong long Jehova blong i givhan long hem, taem bambae hem i toktok long King. I no longtaem hem i go insaed long haos blong King, mo i stanap long fored blong King. Baebol i talem se: “Nao king i talem long hem se, “Josef. Mi mi luk wan drim, mo i no gat man long ples ya i save talemaot mining blong hem long mi. Be wan man i talem long mi, se yu yu save talemaot mining blong drim.’” Be bakegen ansa blong Josef i soemaot se hem i gat tingtingdaon mo hem i bilif long God. Hem i talem se: “No, king, mi mi no save mekem samting ya, be God blong mifala, hem bambae i talemaot mining blong drim ya blong yu, we bambae yu yu glad long hem.”—Jenesis 41:14-16.

Jehova i lavem ol man we oli gat tingtingdaon mo oli bilif long hem, taswe hem i givim ansa long Josef we i daonem ol waesman mo ol pris blong Ijip. Josef i talem se tufala drim we Fero i luk i minim sem samting nomo. Jehova i soemaot se hem i “mekem plan blong ol samting ya finis, i no save jenisim” from we Fero i luk drim ya tu taem. Ol seven kao we oli fatfat mo ol seven bandel blong wit, oli minim seven yia we bambae i gat plante kakae long Ijip, mo ol kao we oli bunbun mo ol wit we oli slak, oli minim ol seven yia we bambae kakae i sot long Ijip. Long taem ya, bambae kakae i sot long olgeta ples.—Jenesis 41:25-32.

Fero i kasemsave se Josef i talemaot stret mining blong drim blong hem. Be, ?bambae oli mekem wanem?  Josef i talemaot wan plan long Fero. Mo Fero i nidim wan man “we i waes gud mo we i save ol samting we oli stap hapen,” blong lukaot long ol kakae we ol man oli stap karem i kam long ol seven yia we i gat plante kakae. Mo blong seremaot ol kakae ya, biaen long taem we kakae i sot. (Jenesis 41:33-36) Save blong Josef mo ol samting we hem i mekem, oli soemaot se hem i naf blong mekem wok ya. Be Josef i no putumap hem wan blong mekem wok ya, from we hem i gat tingting daon, mo bilif blong hem nao i mekem hem i kam wan impoten man long Ijip. Sipos yumi bilif strong long Jehova mo yumi trastem gud hem, bambae yumi no gat tingting blong leftemap yumi wan. !Yumi save gat pis, taem yumi putum ol trabol blong yumi long han blong Jehova!

Fero mo ol wokman blong hem, oli luksave se plan we Josef i talem i waes. Fero i talem tu se, ol tok we Josef i talemaot oli kamaot long God blong hem. Hem i talem long ol man we oli wok long haos blong hem se: “!Olgeta! Man ya Josef paoa blong God i stap long hem. Bambae yumi no save faenem wan narafala man we i waes moa, i winim hem.” Mo hem i talem long Josef se: “God blong yu i soemaot ol samting ya long yu. Mo i klia we yu yu waes moa, mo yu stap luksave moa ol samting we i stap hapen, i winim ol narafala man. Bambae mi mi putumap yu yu kam nambawan haeman blong mi blong lukaot long kantri ya blong mi, mo olgeta man blong mi bambae oli mas obei long ol tok blong yu. Yu bambae yu namba tu long mi, mo bambae i no gat narafala man bakegen we i gat paoa long kantri ya olsem yu.”—Jenesis 41:38-41.

Fero i holem promes blong hem. Hem i givim long Josef, wan waet klos we i beswan we oli wokem long linen. Mo i hangem wan gol jen long hem, mo i putum wan spesel ring long fingga blong hem, mo i givim wan kat we hos i pulum. Mo King i givim raet long hem blong go olbaot long kantri ya, mo talemaot ol plan blong hem. (Jenesis 41:42-44) Long wan dei nomo, Josef i aot long kalabus mo i go stap long haos blong King. Mo biaen, hem i ded olsem wan haeman we i namba tu long King Fero. Hemia i pruvum klia se Josef i bilif long Jehova. Mo Jehova i luk ol nogud samting we oli hapen long laef blong Josef, taem hem i stap long kalabus. Hem i stretem ol trabol ya long stret taem mo long stret fasin. Jehova i no stretem nomo ol trabol blong Josef, be hem i stanemap wan rod blong lukaotgud long neson blong Isrel. Long nekis haf we bambae i kamaot, bambae yumi luk wanem i kamtru.

Sipos yu kasem sam trabol olsem, maet ol man oli mekem i no stret long yu we i gohed blong plante yia, yu no letem tingting blong yu i foldaon. I gud yu tingbaot stori blong Josef. From we oltaem hem i gat, kaen fasin, tingtingdaon, hem i stanap strong, mo hem i gat bilif. Hem i mekem evri samting, blong Jehova i blesem hem.