“?FROM WANEM God i letem samting ya i hapen long mi?” Wan boe blong Brasil we i gat 24 yia, nem blong hem Sidnei, i askem kwestin ya. Hem i kasem wan aksiden taem hem i stap ski long wota, nao hem i mas stap long wiljea blong ful laef blong hem.

Man i save kam kros long God taem hem i kasem wan aksiden no sik, taem wan fren no famle i ded, no wan disasta no faet i kamaot long ples blong hem. Long taem bifo tu, sam man oli kros long God. Job i kasem plante trabol, nao hem i talem long God se: “Mi mi stap krae i go long yu, be yu yu no ansa long mi. Taem mi mi prea long yu, be yu yu no lesin long mi. Oltaem yu stap mekem i strong tumas long mi. Long olgeta paoa blong yu, yu stap ronem mi blong spolem mi.”—Job 30:20, 21.

Job i no save hu i stamba blong trabol blong hem, mo from wanem trabol ya i kasem hem, mo from wanem God i letem trabol ya i kam long hem. Yumi glad se Baebol i talemaot from wanem ol trabol i kamaot, mo samting we yumi save mekem taem wan trabol olsem i kasem yumi.

Baebol i tokbaot God, i se: “Fasin blong hem i gud tumas, mo hem i stret olwe nomo. Hem bambae i God blong olgeta, mo hem i tru. Oltaem, tingting blong hem bambae i stap strong long olgeta. Oltaem hem i stap mekem ol samting we i stret, mo i stap mekem sem mak nomo long olgeta man.” (Dutronome 32:4) ?Yu ting se God we i “stap mekem ol samting we i stret, mo i stap mekem sem mak nomo long olgeta man,” bambae i plan se ol man oli safa? ?Yu ting se bambae hem i putum trabol long man blong panisim hem no blong stretem hem?

Nogat. Baebol i talem se: “Taem ol samting oli kam blong traem yufala, bambae yufala i no talem se ‘Ol samting ya blong traem mi oli kamaot long God.’ From we i no gat samting nogud we i save kam traem God. Mo i no fasin blong God blong traem man.” (Jemes 1:13, Nytesteman Wetem Ol Sam Long Bislama) Yes, Baebol i talem se God i mekem Adam mo Iv tufala i stret gud olgeta. Hem i putum tufala long wan gudfala ples we i hom blong tufala, i givim ol samting we tufala i nidim blong laef, mo i givim wok we tufala i save harem gud long hem. God i talem se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.” I no gat wan samting nating we tufala i save kros long God from.—Jenesis 1:28.

Be tede laef i defren. Taem ol yia oli pas, ol trabol we man i kasem i kam strong moa. Baebol i talem se: “Olgeta samting ya we God i mekem oli stap krae, from we olgeta oli stap harem nogud, olsem we woman i harem nogud, blong bambae pikinini blong hem i bon.” (Rom 8:22) ?From wanem i olsem?

Blong ansa long kwestin ya, yumi mas tingbaot bakegen samting we i hapen long taem blong Adam mo Iv. Tufala i lesin long wan stronghed enjel, we biaen hem i kam Setan. Nao tufala i no moa wantem folem samting we God i talem se i stret mo i no stret. God i talem se tufala i no mas kakae long ‘tri ya we frut blong hem i save mekem tufala i save ol fasin we i gud, mo ol fasin we i nogud.’ Setan i talem long Iv se bambae tufala i no ded sipos tufala i kakae frut ya. Long rod ya, Setan i talem se God i wan man blong giaman. Mo hem i talem tu, se tufala i gat raet blong talem wanem fasin i stret mo wanem fasin i no stret, be God i stap blokem tufala. (Jenesis 2:17; 3:1-6) Be Setan i talem se bambae tufala i harem gud moa sipos God i no rul long tufala. Long rod ya, Setan i stanemap wan kwestin we i impoten tumas, hemia se: ?I stret we God i rul long ol man?

Setan i stanemap wan narafala kwestin tu. Hem i talem se ol man oli mekem wok blong God blong kasem samting nomo. Hem i talem long God se: “Oltaem yu stap lukaot gud long [Job] wetem ol pikinini blong hem mo olgeta samting blong hem, mo yu stap blokemgud olgeta. . . . Be sipos yu tekemaot ol samting ya, bambae hem i tok nogud long yu, stret long fes blong yu.” (Job 1:10, 11) Setan i stap tokbaot Job, be hem i wantem minim se olgeta man oli mekem wok blong God blong kasem samting nomo.

?Wanem rod we i beswan blong ansa long ol kwestin ya we Setan i stanemap? From we God i waes olgeta,  hem i save rod we i beswan mo i no save mekem yumi harem nogud. (Rom 11:33) Hem i letem ol man oli rul long olgeta bakegen. Frut we i kamaot, bambae i soemaot sipos rul blong man i moa gud i winim rul blong God.

Ol trabol we yumi luk long wol tede oli soemaot se rul blong man i nogud olgeta. Ol gavman blong man oli no putum pis long wol, oli no mekem ol man oli glad mo sef, be oli stap spolem wol. Yumi luksave klia wan stamba trutok we Baebol i talem se: “I no gat man i save kam bos long laef blong hem.” (Jeremaea 10:23) Plan blong God i blong mekem pis mo glad i stap olwe long wol, mo blong givim ol samting we ol man oli nidim. Rul blong God nomo i save mekem plan ya i kamtru.—Aesea 45:18.

?God bambae i mekem plan ya i kamtru olsem wanem? Yu traem tingbaot prea we Jisas i tijim ol disaepol long hem, i se: “Plis, yu mekem Kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Matiu 6:10, NW) Yes, long stret taem blong God, bambae Kingdom blong hem i tekemaot olgeta trabol we oli mekem man i safa. (Daniel 2:44) Bambae i no moa gat puaman. Sik mo ded tu bambae oli finis. Baebol i talem se: “[God] bambae i stap sevem ol puaman we oli stap singaot i go long hem.” (Ol Sam 72:12-14) Long saed blong ol sikman, Baebol i promes se: “Bambae i no moa gat man olbaot long kantri ya we i save talem se hem i sik.” (Aesea 33:24) Mo Jisas i tokbaot ol dedman we God i tingbaot olgeta, i se: “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.” (Jon 5:28, 29) !Yumi harem gud tumas blong tingbaot ol promes ya!

Samwe long 17 yia afta we Sidnei i kasem aksiden, hem i talem se: “Mi no ting se Jehova God i mekem aksiden ya i hapen. Be i tru se fastaem mi mi kros long God. Samtaem mi harem nogud tumas, mo mi krae from we mi no moa save wokbaot. Be Baebol i givhan long mi blong mi kasem save se aksiden ya i no wan panis we i kamaot long God. Baebol i talem se ‘samting we yumi no tingbaot i save kasem yumi enitaem nomo.’ Taem mi prea long Jehova mo mi ridim sam vas we mi laekem tumas, hemia i leftemap tingting blong mi, mo bilif blong mi i kam strong bakegen.”—Prija 9:11; Ol Sam 145:18; 2 Korin 4:8, 9, 16.

Sipos yu yu kros long God, ?yu save mekem wanem? Yu mas tingbaot from wanem God i letem man i safa. Mo yu tingbaot tu se i no longtaem, bambae hem i tekemaot ol trabol we i mekem yu yu safa. Baebol i talem se God “i stap mekem i gud long olgeta we oli stap traem faenem hem.” Olgeta we oli bilif long God mo Pikinini blong hem, bambae oli no save harem nogud.—Hibrus 11:6; Rom 10:11.