Laswan buk blong Baebol i talem se, 666 i wan namba o nem blong wael anamol ya we i kamaot long solwota we hem i gat seven hed mo ten hon. (Revelesen 13:1, 17, 18) Wael anamol ya i pija blong politik sistem blong wol, we i gat paoa long ‘olgeta laen, mo olgeta grup blong man, mo olgeta lanwis, mo olgeta kantri.’ (Revelesen 13:7) Nem ya 666 i soem se politik sistem ya i no naf nating long lukluk blong God. ?Olsem wanem yumi save samting ya?

  I no jes wan nem nomo. Ol nem we God i givim oli gat mining. Eksampol, God i givim nem ya Ebram we i minim “Papa i Hae (Leftemap Nem Blong Papa),” nem ya Ebraham we i minim “Papa Blong Wan Bigfala Hip Blong Man (Papa Blong Plante Man),” mo God i promes se Hem bambae i mekem Ebraham i “kam stamba [papa, NW] blong ol man blong plante ples.” (Jenesis 17:5) Long sem fasin, God i givim nem ya 666 long wael anamol ya blong soemaot ol fasin we anamol ya bae i stap mekem.

  Namba ya sikis i minim samting we i no stret gud olgeta. Plante taem, Baebol i yusum ol namba olsem saen blong minim wan samting. Namba seven oltaem i minim wan samting we i fulwan o i stret gud olgeta. From we namba sikis i sot long wan namba blong mekemap namba seven, hemia i save minim samting we i no fulwan o i no stret gud long fes blong God, mo namba ya i save minim ol enemi blong God.—1 Kronikel 20:6; Daniel 3:1.

  Oli raetem namba sikis tri taem blong makem gud. Samtaem taem Baebol i wantem makem wan samting hem i talem tri taem. (Revelesen 4:8; 8:13) So namba ya 666 i blong makem gud se ol politik sistem blong man oli no naf nating long ae blong God. Bifo finis i kam oli no save mekem se ol man oli gat pis mo oli harem se oli sef blong olwe—hemia ol samting we Kingdom blong God nomo i save mekem.

Mak blong wael anamol

 Baebol i talem se ol man we oli folem wael anamol oli “kasem mak” blong hem from we oli “sapraes tumas long samting” we hem i mekem nao oli go bitim mak oli stap wosipim hem. (Revelesen 13:3, 4; 16:2) Oli mekem olsem taem oli ona bitimak long kanti blong olgeta, long ol flag, o long ol ami blong olgeta. Buk ya The Encyclopedia of Religion i talem wan samting we i sem mak se: “Tede, fasin ya blong flas from kantri i kam olsem wan wosip we ol man oli stap mekem.” a

 ?Olsem wanem mak blong wael anamol ya i stap long raet han o fored blong wan man? (Revelesen 13:16) God i bin talem long loa we hem i givim long ol man Isrel se: “Yufala i mas fasem ol tok ya long han blong yufala, mo long fored blong yufala.” (Dutronome 11:18) Hemia i no min se ol man Isrel oli putum sam mak long prapa han mo fored blong olgeta. Be hem i minim se bambae tok blong God i mas gat paoa long ol aksen mo ol tingting blong olgeta. Long sem fasin, namba ya 666 i no stap long han mo fored blong ol man olsem wan tato, be namba ya blong anamol i soemaot ol man we oli letem politik sistem blong wol ya i rulum laef blong olgeta. Olgeta we oli gat mak blong wael anamol oli mekem olgeta wan oli kam ol enemi blong God.—Revelesen 14:9, 10; 19:19-21.