Baebol i tokbaot tatu wan taem nomo, long Levitikas 19:28, se: “Yufala i no mas wokem tatu long skin blong yufala.” God i givim loa ya long neson blong Isrel, mo hemia i mekem se ol man blong hem oli defren long ol narafala neson, we oli wokem ol pija mo saen blong ol god blong olgeta long skin blong olgeta. (Dutronome 14:2) Ol Kristin oli no stap aninit long Loa we God i givim long ol man Isrel, be nating se i olsem, yumi mas tingting gud long bigfala tingting we loa ya i stanap long hem.

?I stret blong wan Kristin i mekem tatu long bodi blong hem?

 Ol vas blong Baebol we oli stap, oli save givhan long yu blong tingting gud long bisnes ya:

•   “Mi wantem se taem ol woman oli flasem olgeta, . . . oli mas soemaot se oli gat respek.” (1 Timoti 2:9) Rul ya i go long ol woman mo long ol man tu. Yumi mas respektem filing blong ol narafala, mo yumi no mekem samting blong pulum ae blong narafala.

•   Samfala oli mekem tatu blong soemaot se oli bigman. Mo sam narafala, oli mekem tatu blong soemaot se oli gat raet blong mekem samting we oli wantem long bodi blong olgeta. Be Baebol i pulum ol Kristin se: “Yufala i givim bodi blong yufala i go long God olsem wan sakrefaes we i laef mo i tabu, mo we God i glad long hem. Hemia wan tabu wok we yufala i mas yusum gud tingting blong yufala blong mekem.” (Rom 12:1) Traem ‘yusum gud tingting blong yu,’ blong faenemaot se from wanem yu wantem gat wan tatu. Maet yu wantem from we yu luk se plante man oli gat, no blong yu joen long wan grup. Long taem olsem, i gud yu tingbaot se sipos wan dei yu jenisim tingting blong yu, be bambae yu no moa save tekemaot tatu ya, hem i stap olwe. Sipos yu tingting gud fastaem, hemia bambae i givhan long yu blong mekem wan waes desisen.—Ol Proveb 4:7.

•   “Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.” (Ol Proveb 21:5) Plante taem, man i kwik blong jusum se bae hem i gat wan tatu, be frut we i kamaot from desisen ya bae i stap longtaem, bae i save spolem fasin fren blong hem wetem ol narafala mo i save spolem wok blong hem tu. Sipos yu wantem gat wan tatu, samtaem yu mas spenem plante mane from, mo sipos yu wantem tekemaot wan tatu long bodi blong yu, yu mas safa bigwan. Ol man blong stadi, mo olgeta we wok blong olgeta i blong tekemaot tatu long bodi blong man, oli talem se bighaf blong ol man we oli gat tatu, oli sore biaen se oli gat ol tatu ya.