I stret nomo blong yumi lukaotgud long laef blong yumi, from we ded i olsem wan enemi we i mekem yumi fraet. (1 Korin 15:26) Be, i gat ol giaman tingting tu long saed blong ded we i mekem se long ful laef blong ol man “oli slef from we oli fraet long ded.” (Hibrus 2:15) Fraet long ded i save mekem se yu no moa mekem sam samting long laef blong harem gud. Be taem yu save trutok long saed blong ded bambae yu fri long fraet.—Jon 8:32.

Ol Trutok long saed blong ded

•   Ol dedman oli no save tingting. (Ol Sam 146:4) Taswe, yu no mas fraet se bambae yu harem nogud mo yu safa afta we yu ded, from we Baebol i talem se taem man i ded i olsem we hem i stap slip nomo.—Ol Sam 13:3; Jon 11:11-14.

•   Ol dedman oli no save spolem yumi. Nating sipos wan rabis man i ded, hem i no moa gat paoa blong spolem ol narafala. Baebol i talem tu se, ‘fasin blong olgeta blong oli no laekem ol man mo oli agens long olgeta, no oli jalus tumas long olgeta, be taem oli ded, ol samting ya oli lus wetem olgeta.’—Prija 9:6.

•   Ol man oli no ded blong olwe. God bambae i mekem se ol man we oli ded bae oli laef bakegen.—Jon 5:28, 29; Ol Wok 24:15.

•   God i promes se wan dei “bambae i no moa gat man i ded.” (Revelesen 21:4) Baebol i tokbaot se long taem ya “ol stret man ya bambae oli tekem graon ya i blong olgeta, mo bambae oli stap long hem gogo i no save finis.” Hemia i minim tu se bambae oli no moa fraet nating long ded.—Ol Sam 37:29.