Plante man oli askem kwestin long saed blong mining blong laef. Oli askem ol kaen kwestin olsem: ?From wanem yumi laef? o ?Mi mi laef blong mekem wanem? Baebol i soemaot se yumi laef blong yumi fren gud wetem God. Traem luk sam long ol stamba trutok ya we Baebol i soemaot long yumi.

•   God i Mekem yumi. Baebol i talem se: “Hae God, hem i God. Hem nomo i mekem yumi, mo yumi man blong hem.”—Ol Sam 100:3; Revelesen 4:11.

•   God i gat wan stamba tingting long saed blong evri samting we hem i wokem, hemia i minim yumi ol man tu.—Aesea 45:18.

•   Taem God i wokem yumi, hem i mekem se yumi nidim hem, mo samting ya nao i mekem se yumi wantem tumas blong save long mining blong laef. (Matiu 5:3) Mo hem i wantem se yumi faenemaot mining blong laef, mo harem gud long hem.—Ol Sam 145:16.

•   Taem yumi traehad blong fren gud wetem God, hemia i olsem se yumi stap lukaot God. Maet samfala oli harem se i had blong fren gud wetem God, be Baebol i leftemap tingting blong yumi se: “Yufala i mas stap klosap long God, nao hem bambae i kam stap klosap long yufala.”—Jemes 4:8; 2:23.

•   Blong kam fren blong God, yumi mas mekem laef blong yumi i laenap wetem samting we hem i wantem long saed blong yumi. Baebol i tokbaot samting ya long Prija 12:13, se: “Yu mas obei long ol tok blong [God], from we hemia nao samting we hem i mekem yumi from.”

•   Long fiuja, God bambae i mekem stamba tingting blong hem long saed blong ol man, i kamtru fulwan, taem hem i tekemaot ol samting we oli stap mekem yumi harem nogud, mo i givim laef we i no save finis long ol fren blong hem, hemia olgeta we oli wosipim hem.—Ol Sam 37:10, 11.