Ol Nefilim oli ol bigbigfala man. Ol Nefilim oli gat raf fasin mo oli pikinini blong ol rabis enjel we oli tekem ol woman long taem blong Noa. a

 Baebol i talem se “taem ol gel ya oli stap kam bigbigwan, ol enjel blong God oli luk we oli gudfala tumas.” (Jenesis 6:2) Tok ya ‘ol enjel blong God’ o ol pikinini blong God, i minim ol gudfala enjel we biaen oli rebel agens long God taem oli “lego prapa ples blong olgeta” long heven, nao oli jenis i kam olsem man, mo oli go ‘tekem ol gel ya olsem we oli wantem.’—Jud 6; Jenesis 6:2.

 Ol pikinini ya blong olgeta oli ol narakaen pikinini stret. (Jenesis 6:4) Oli ol bigbigfala man we oli raf. From we oli bigbigwan oli stap kilim ol narafala, mekem se wol ya i fulap long rabis fasin. (Jenesis 6:13) Baebol i tokbaot ol Nefilim ya se “ol man ya bifo we oli lariken man blong faet, we olgeta man oli savegud nem blong olgeta.” (Jenesis 6:4) Oli mekem se rabis fasin mo fraet i fulap long wol.—Jenesis 6:5; Namba 13:33. b

Giaman toktok long saed blong ol Nefilim

 Giaman: Ol Nefilim oli ol nogud enjel.

 Trutok: Ol tok raonabaot long Jenesis 6:4 i soemaot se ol Nefilim oli no ol enjel, be oli ol pikinini blong ol enjel ya we oli jenisim bodi blong olgeta i kam man nao oli slip wetem ol gel blong wol ya. Afta we ol enjel ya ‘oli stap tekem ol gel ya olsem we oli wantem,’ Jehova i talem se bae oli laef blong 120 yia nomo nao bae hem i kilim olgeta. (Jenesis 6:1-3) Vas 4 i gohed blong talem se “mo long taem ya,” ol enjel ya we oli jenisim bodi blong olgeta i kam man oli “gohed blong slip wetem ol gel blong ol man” nao ol gel ya oli bonem “ol strong man blong bifo, ol man we oli gat nem,” hemia ol Nefilim.—Jenesis 6:4, NW.