Tabu spirit i paoa blong God, mo hem i stap yusum. (Maeka 3:8; Luk 1:35) God i sanem tabu spirit blong hem taem i sanem paoa ya blong hem i go long eni ples blong mekem wil blong hem.—Ol Sam 104:30, NW; Ol Sam 139:7.

 Long Baebol tok ya “spirit” i kamaot long Hibru tok ya ruʹach mo Grik tok ya pneuʹma. Plante taem ol tok ya oli minim paoa blong God, o tabu spirit. (Jenesis 1:2) Be, Baebol i yusum tok ya blong tokbaot sam narafala samting tu olsem:

•   Win we yumi pulum.—Habakuk 2:19, NW; Revelesen 13:15.

•   Win.—Jenesis 8:1; Jon 3:8.

•   Paoa we i stap long ol laef samting.—Job 34:14, 15.

•   Tingting o aksen blong wan man.—Namba 14:24, NW.

•   Spirit man, hemia i minim God mo ol enjel tu.—1 King 22:21, NW; Jon 4:24.

 Evri samting ya we yumi tokbaot antap oli stap be yumi no save luk. Yumi save luk nomo samting we paoa ya i mekem. Wan diksonari (Expository Dictionary of New Testament Words) we man ya Vine i raetem i tokbaot se spirit blong God i wok long sem fasin. Hem i se, “i olsem win, man i no save luk mo tajem, be i gat paoa.”

 Baebol i tokbaot tu se tabu spirit i olsem “han” o “fingga” blong God. (Ol Sam 8:3, NW; Ol Sam 19:1, NW; Luk 11:20, futnot; skelem wetem Matiu 12:28.) Olsem wan man blong katem wud we i yusum tufala han blong hem blong wok, God i yusum tabu spirit blong mekem ol samting olsem:

•   Heven mo wol.—Ol Sam 33:6; Aesea 66:1, 2.

•   Baebol.—2 Pita 1:20, 21.

•   Ol merikel we ol man blong hem blong bifo oli mekem mo strong tingting blong prij.—Luk 4:18; Ol Wok 1:8; 1 Korin 12:4-11.

•   Ol man we oli obei long hem oli gat gudfala fasin.—Galesia 5:22, 23.

Tabu spirit i no wan man

 Baebol i tokbaot spirit blong God olsem “han,” “fingga,” o “win,” hemia i soemaot se tabu spirit i no wan man. (Eksodas 15:8, 10) Han blong wan man we i katem wud i no save wok hem wan, han ya i mas joen long bodi mo bren blong man ya we i katem wud blong i kontrolem han ya. Long sem fasin, tabu spirit blong God i wok nomo olsem we God i wantem. (Luk 11:13) Baebol i tokbaot tu se spirit blong God i olsem wota mo i tokbaot tabu spirit taem i stap tokbaot bilif mo save. Taem yumi skelem tabu spirit wetem ol samting ya i klia nomo se tabu spirit i no wan man.—Aesea 44:3; Ol Wok 6:5; 2 Korin 6:6.

 Baebol i talem se nem blong God hem i Jehova mo Pikinini blong hem, nem blong hem Jisas; be i nogat wan vas long Baebol we i talem nem blong tabu spirit. (Aesea 42:8, NW; Luk 1:31) Taem Steven i luk wan vison we God i givim long hem, hem i luk tu man nomo, i no tri man. Baebol i talem se: “tabu spirit i fulap long hem, mo hem i lukluk i go antap long heven, nao i luk God long bigfala paoa blong hem mo Jisas we i stap stanap long raet saed blong God.” (Ol Wok 7:55) Tabu spirit hem i paoa blong God we God i yusum blong mekem Steven i luk vison ya.

 Giaman: Tabu spirit i wan man mo hem i wan haf blong Triniti, olsem i stap long 1 Jon 5:7, 8 long King James Baebol.

 Trutok: Long King James Baebol, 1 Jon 5:7, 8 i talem se “long heven, Papa, Tok, mo Tabu Spirit: mo trifala ya i wan nomo. Mo i gat tri we oli witnes long wol.” Ol man we oli mekem stadi long saed ya oli faenemaot se ol tok ya oli no blong aposol Jon mo i no stret blong oli stap insaed long Baebol. Profesa Bruce M. Metzger i raetem long buk ya A Textual Commentary on the Greek New Testament se: “Ol toktok ya ol man oli ademap mo i no stret nating blong oli stap long Niu Testeman.”

 Giaman: Baebol i tokbaot tabu spirit olsem we i wan man, so samting ya i pruvum se hem i wan man.

 Trutok: I tru se samtaem Baebol i tokbaot tabu spirit olsem wan man, be hemia i no pruvum se tabu spirit i wan man. Baebol i tokbaot tu waes, ded mo sin olsem we oli man. (Ol Proveb 1:20; Rom 5:17, 21) Eksampol, Baebol i talem se waes i gat “ol gudfala wok” mo ol “pikinini,” mo sin i stap pulum man blong mekem nogud, kilim man, mo i stap kavet.—Matiu 11:19; Luk 7:35, NW; Rom 7:8, 11.

 Long sem fasin, taem aposol Jon i talem ol tok blong Jisas, hem i tokbaot tabu spirit olsem wan ‘helpa’ (pa·raʹkle·tos) we bae i soemaot pruf long ol man, i lidim ol man, i toktok, i lesin, i talemaot ol samting we oli mas kamtru, i leftemap nem blong Jisas, mo bae i kasem ol samting we oli blong Jisas. (Jon 16:7-15) Samtaem Jon i yusum narafala tok ya tu pneuʹma blong tokbaot tabu spirit. Mo hem i yusum tok ya “hem” we i no minim wan man o wan woman.—Jon 14:16, 17.

 Giaman: Baptaes long nem blong tabu spirit i min se hem i wan man.

 Trutok: Samtaem Baebol i yusum “nem” blong tokbaot paoa o haenem. (Dutronome 18:5, 19-22; Esta 8:10) Hemia i sem mak long tok ya “long nem blong loa,” be i no min se loa i wan man. Wan man we i baptaes “long nem blong ” tabu spirit i luksave se paoa mo wok blong tabu spirit i blong mekem samting we God i wantem.—Matiu 28:19.

 Giaman: Ol aposol blong Jisas mo ol fas Kristin oli bilif se tabu spirit i wan man.

 Trutok: Baebol mo ol man blong histri oli no talem samting ya. Buk ya Encyclopædia Britannica i talem se: “Save ya se Tabu Spirit i wan Man we i olsem wan god . . . i kamaot long taem blong Kaonsel blong Constantinople long yia 381.” Hemia bitim 250 yia afta we ol laswan aposol i ded.