“Ol tingting blong seks oli jes kam nomo olsem long tingting blong mi. I olsem se wan man i stap kontrolem bren blong mi.”—Vera.

 “I had tumas blong kontrolem tingting blong i no tingbaot seks. Be ating bae i moa isi blong mi muvmuvum ol han blong mi mo wis se mi save flae.”—Jon.

 ?Yu yu gat sem tingting olsem Vera mo Jon? Sipos yes, atikol ya bambae i givhan long yu.

•  ?From wanem yumi no mas gohed blong tingbaot seks?

•  ?From wanem i had blong no tingbaot seks?

•  Samting we yu save mekem

•  Sam yangfala oli talem wanem

 Wan yangfala nem blong hem Aleks i talem se: “Angkel blong mi i talem se sipos God i no wantem se mi mi harem gud long filing blong seks, bambae hem i no putum filing ya long mi.”

 Samting we angkel blong Aleks i talem i tru—God i givim filing blong seks long yumi, be hem i givim from wan gudfala risen. God i givim filing blong seks blong mekem se tede i gat ol man long wol. Taswe ?from wanem yu mas traehad blong no tingbaot seks? Hemia tu gudfala risen:

•   Baebol i tijim se stamba tingting blong God long saed blong seks, hem i blong man mo woman nomo we tufala i mared.—Jenesis 1:28; 2:24.

   Sipos yu yu singel mo yu respektem rul ya blong God, be yu stap gohed blong tingbaot seks, bambae yu harem nogud nomo from we yu no save kasem samting we yu wantem. Mo tingting ya i save pulum yu blong wantem kasem mo mekem seks, hemia wan desisen we plante yangfala oli mekem mo biaen oli harem nogud from.

•   Taem yu traehad blong sakemaot ol tingting blong seks, hemia i halpem yu blong gat fasin ya blong bos long tingting mo i save givhan long yu long ful laef blong yu.—1 Korin 9:25.

 Fasin blong bos long tingting i save mekem se yu gat wan hapi laef naoia mo long fiuja. Sam man blong stadi oli talem se sipos ol pikinini oli gat fasin ya blong bos long tingting, taem oli kam bigman, bambae oli no gat problem long saed blong helt, wari long saed blong mane, mo problem wetem polis. a

 From we yumi laef long wan wol we ol man oli tokbaot seks oltaem, mo tu ol homon long bodi blong yumi oli stap jenis taem yumi yangfala, mekem se i had blong yumi no tingbaot seks.

 “I luk olsem se ol program long TV oli stap soem se i oraet nomo blong wan man mo woman i mekem seks nating se tufala i no mared, mo i no gat nogud samting we i save kamaot from. Taswe i isi nomo blong gat ol nogud tingting long saed blong seks sipos oli no soem ol nogud samting we i save kamaot from rabis fasin blong seks.”—Rut.

 “Long ples blong wok, mi stap harem plante nogud storian long saed blong seks, mo mi stat blong wantem save moa. Hemia i save mekem yumi ting se rabis fasin blong seks i nomol nomo, mo i had blong luk se i wan rong samting.”—Nikol.

 “I isi moa blong yu foldaon long trap taem yu skrol long ol foto long sosol media. Wan rabis foto nomo blong seks we yu luk, i save stap long tingting blong yu mo bae i had blong yu fogetem!”—Maria.

 Maet ol risen ya oli mekem yu harem olsem aposol Pol we i raetem se: “Taem mi wantem mekem samting we i stret, be tingting blong mekem i nogud, hem tu i stap long mi.”—Rom 7:21.

 Tingbaot sam narafala samting. Traem tingbaot sam narafala samting i bitim seks. Maet yu save tingbaot sam samting we yu laekem blong mekem taem yu spel, ol spot, eksasaes, o eni narafala samting we i save givhan long tingting blong yu. Wan yangfala woman nem blong hem Valeri i talem se: “Fasin blong ridim Baebol i givhan. Baebol i fulap wetem ol gudfala tingting long saed blong God mo taem yu tingting long olgeta, bambae i had blong yu tingbaot eni narafala samting.”

 I nomol blong man i tingbaot seks. Be i stap long yu nomo se bambae yu mekem wanem wetem ol tingting ya. Yu yu naf blong sakemaot ol tingting ya sipos yu jus blong sakemaot.

 “Taem mi stat blong tingbaot seks, mi traem blong putum tingting blong mi long wan narafala samting. Mo tu mi traem blong faenemaot samting we i mekem se mi stat blong tingbaot seks, maet hem i wan singsing o wan foto we mi mas dilitim.”—Helen

 Advaes blong Baebol: “Yufala i mas gohed blong tingting [o, “tingbaot no tingting dip,” futnot] long olgeta samting we oli tru, olgeta samting we oli impoten, olgeta samting we oli stret, olgeta samting we oli klin.”—Filipae 4:8.

 Jusum ol gudfala fren. Sipos ol fren blong yu oli stap tokbaot seks oltaem, bambae i had blong yu gat wan tingting we i klin.

 “Olsem wan yangfala, mi faenem i had blong mi tingbaot wan gudfala samting, mo wan bigfala samting hemia ol fren blong mi. Taem yu stap wetem ol man we oli tokbaot ol rabis fasin oltaem, bambae yu no moa save tingbaot ol gudfala samting—mo hemia i olsem se oli ademap moa fuel i go long faea.”—Sera.

 Advaes blong Baebol: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.”—Ol Proveb 13:20.

 Blokem ol samting blong spel we oli doti. Tede evri man oli save se ol miusik, muvi mo ol narafala samting olsem oli soemaot seks nomo. Nikol i talem se “Long mi, miusik i gat bigfala paoa long mi. Hem i save mekem ol filing blong mi i kam strong mo i go kasem mak ya we mi no save kontrolem.”

 “Mi mi stat blong wajem ol muvi mo ol program long TV we oli soemaot ol rabis fasin blong seks. Fastaem mi no ting se bambae i save spolem tingting blong mi, be biaen mi stat blong tingbaot seks. I isi blong faenemaot from wanem mi gat ol tingting ya. Taem mi stop blong wajem ol muvi mo ol program blong TV, mi no moa tingbaot seks tumas. I isi moa blong sakemaot ol nogud tingting taem mi jusum gud ol samting we mi mekem blong spel.”—Joanne.

 Advaes blong Baebol: “Yufala i no mas tokbaot nating enikaen doti fasin blong seks, mo enikaen doti samting, mo toktok blong yufala i no mas soemaot se yufala i wantem plante samting.”—Efesas 5:3.

 Stamba poen: Sam man oli ting se ol filing blong olgeta long saed blong seks oli impoten tumas, taswe oli no mas—mo oli no save—kontrolem. Be Baebol i talem samting we i defren olgeta. Baebol i tijim se yumi save kontrolem ol tingting blong yumi, mo hemia i soemaot se samting we yumi mekem i impoten tumas long God.

 Advaes blong Baebol: “Yufala i mas gohed blong mekem se paoa we i stap pusum tingting blong yufala, i kam niuwan.”—Efesas 4:23.