Ẹmwẹ Na Ya Muẹn So

KPẸRE

Ẹmwẹ Na Ya Muẹn So

Ebe na, na tie ẹre Avbe Ako Ọghe Ebe Nọhuanrẹn Ni Ru Iyobọ Ne Ivbi Otu E Kristi gha ru iyobọ nuẹn ya rẹn avbe ako ọghe Baibol ni gha sẹtin ru iyobọ nuẹn vbe ọlọghọmwa ne u rhirhi gha werriẹ aro daa. Ọ gha vbe ru iyobọ nuẹn ya rẹn ako ọghe Baibol eso ne u gha sẹtin loo ya rhie igiọdu ne emwa ọvbehe, kevbe ne u gha vbe sẹtin loo ya ru iyobọ ne iran ya ru azẹ nọ gha rhie uyi gie Jehova. U ghi fẹko gha rrie uhunmwuta ne u hoo ne u loo. Avbe inọta ne kuẹi kuẹi ni rrọọ, kevbe odẹ ne kuẹi na ya gbe ẹre ọrriẹ ighẹ okha eso ni rre Baibol, gha ru iyobọ nuẹn ya miẹn emwi ne u gualọ. (Ya ghee ẹkpẹti nọ khare wẹẹ “Vbene A Ya Loo Ebe Na Hẹ.”) Ẹ i khian lọghọ, u ke miẹn avbe ako ọghe ebe nọhuanrẹn nibun ni gha rhie ibude, adia kevbe ifuẹko nuẹn. U gha vbe miẹn ilele eso ni ru ekpataki ni rre Baibol, ne u gha sẹtin loo ya ru iyobọ ne emwa ọvbehe vbe iran ghaa rre ọlọghọmwa, u ghi vbe yae rhie ibude kevbe igiọdu ne iran.

Vbene A Ya Loo Ebe Na Hẹ

U ghaa hoo ne u miẹn uhunmwuta ne u gualọ, u sẹtin gbẹn uhunmwuta nii ye eke na na gualọ edọmwadẹ uhunmwuta, u sẹtin vbe ya gualọe vbe abọ na mwamwa edọmwadẹ uhunmwuta yi. Abọ ihinrọn ẹre a mwamwa ebe na yi: Ọlọghọmwa Ne Emwa Werriẹ Aro Daa, Uyinmwẹ, Iko, Emwi Na Ru Vbe Ẹdẹgbegbe, Ẹgbẹe, Nọ Dekaẹn Ugamwẹ Osanobua, kevbe Uyinmwẹ Na Rẹn Ọmwa Yi. Ẹ i mwẹ u ma miẹn uhunmwuta ne u gualọ vbe ọkpa vbe avbe abọ na ya unu kaẹn na. U gha ghi sẹ eke ne dọmwadẹ abọ ye, u ghi gualọe ghee otọ, ne u mieke na miẹn uhunmwuta ne u gualọ. Sokpan, deghẹ u ma wa rẹn abọ ne uhunmwuta ne u gualọ ye, u ghi ya obọ kaẹn All, u ghi fẹko gualọe ghee otọ, a te miẹn wẹẹ u miẹn uhunmwuta ne u gualọ. Vbe ototọ edọmwadẹ uhunmwuta, u gha miẹn olika ẹmwẹ eso na gbẹnnẹ gbodoo. Eso keghi re ifiẹmwẹ kẹkan, vbene eso na re inọta. Zẹvbe ne u ya tie dọmwadẹ ako ọghe ebe nọhuanrẹn na gbẹnnẹ gbodoo ni rre ototọ avbe olika ẹmwẹ na, u ghi muẹn roro vbene emwi nọ rre ako ọghe ebe nọhuanrẹn nii ya kaẹn ifiẹmwẹ nii hẹ, ra vbene ọ ya rhie ewanniẹn ye inọta nii hẹ. Ugbẹnso, avbe olika ẹmwẹ ni rrọọ ghi vbe gha mwẹ abọ ughughan, ne u mieke na sẹtin rherhe miẹn emwi ne u gualọ. U sẹtin vbe miẹn avbe ako ọghe ebe nọhuanrẹn na vbe gbẹnnẹ “Vbe ya ghee” yi. Emwi nọ rre avbe ako ọghe ebe nọhuanrẹn na, vbe ginna emwi na guan kaẹn vbe uhunmwuta nii. U gha miẹn “Igiemwi Ni Rre Baibol Ni Gha Sẹtin Ru Iyobọ Nuẹn” vbe uhunmwuta nibun. U gha miẹn ifiẹmwẹ eso nọ gha ya ruẹ rẹn olika ẹmwẹ ni rre avbe ako ọghe ebe nọhuanrẹn na ya unu kaẹn. Avbe ifiẹmwẹ na, gha ya ruẹ rẹn emwi nọ khẹke ne u gha mu roro, zẹvbe ne u ya tie ako ọghe ebe nọhuanrẹn nii.

Ebe na ma wa ya unu kaẹn avbe ako ọghe ebe nọhuanrẹn hia ni ginna edọmwadẹ uhunmwuta na guan kaẹn. Sokpan, te a mwamwa ebe na, ne u mieke na miẹn ako eso vbe ebe nọhuanrẹn ne u hoo ne u loo; adeghẹ u ghi hoo ne u rẹn sayọ, u sẹtin ya ru ezanzan yọ. (Itan 2:1-6) Adeghẹ u hoo ne u gualọ otọ re sayọ, u ghi loo avbe ako na tie ẹre marginal references kevbe study notes ni rre New World Translation of the Holy Scriptures. U ghaa hoo ne u rẹn vbene a ya rhan otọ ako eso hẹ vbe ebe nọhuanrẹn kevbe vbene a gha ya sẹtin rhie ẹre ye uyinmwẹ hẹ, u sẹtin loo Research Guide for Jehovah’s Witnesses ra Watch Tower Publications Index. Avbe ebe na sunu yi na, gha ru iyobọ nuẹn ya rẹn ebe ra e vidio ne otu e Jehova he ru ladian nọ rhan otọ ako ọghe ebe nọhuanrẹn nii. Nọ ghi ru ọghe ọgbọn sẹ vbọ, gha ya ruẹ rẹn odẹ ne ima ghi ya rẹn otọ ako ọghe ebe nọhuanrẹn nii.

Erhunmwu ne ima na ọre wẹẹ, ne ebe na, na tie ẹre Avbe Ako Ọghe Ebe Nọhuanrẹn Ni Ru Iyobọ Ne Ivbi Otu E Kristi ru iyobọ nuẹn, ne u ya gha mwẹ ẹwaẹn, irẹnmwi, kevbe a rẹn otọ emwi ni rre Ebe Nọhuanrẹn. Zẹvbe ne u ya loo ebe na, u gha gele rẹn wẹẹ, “ẹmwẹ Osanobua keghi re nọ rrọọ, erriọ ẹre ọ vbe ya zẹ ẹtin.”—Hib 4:12.

AVBE AKO ỌGHE EBE NỌHUANRẸN NI RU IYOBỌ NE IVBI OTU E KRISTI