Ebe Luk 11:1-54
-
Vbene a ya na erhunmwu hẹ (1-13)
-
Jesu ma erhuanegbe ẹre vbene a ya na erhunmwu hẹ (2-4)
-
-
Jesu ya ikpianbọ ọghe Osanobua khulo avbe orhiọn dan fua (14-23)
-
Orhiọn dan werriegbe rrie ehe nọ na kpa (24-26)
-
Oghọghọ nọ sẹ otọ ẹko (27, 28)
-
Ama ọghe Jona (29-32)
-
Ukpa ọghe egbe (33-36)
-
Jesu keghi ta ku emwa okeke (37-54)
11 Vbe ẹdẹ ọkpa, ọ kegha na erhunmwu vbe ako ọkpa, ọ ghi dobọ yi nẹ, ọkpa vbe erhuanegbe ẹre keghi tama rẹn wẹẹ: “Enọyaẹnmwa, ma ima vbene a ya na erhunmwu hẹ, zẹvbe ne Jọn vbe ma erhuanegbe ẹre re.”
2 Ọ na ghi tama iran wẹẹ: “Ẹghẹ ke ẹghẹ ne uwa ya na erhunmwu, wa ghi kha wẹẹ: ‘Evbavba, gi eni ruẹ gha re na kpe huan.* Gi Arriọba ruẹ rre.
3 Rhie evbare* nọ gha sẹ ima re vbe dọmwadẹ ẹdẹ ne ima.
4 Ya orukhọ ọghe ima bọ ima, rhunmwuda, ma tobọ ima vbe yabọ emwa hia ni ru ima khọọ;* ghẹ vbe gi ima de ye edanmwẹ.’”*
5 Ọ na ghi tama iran wẹẹ: “Gia kha wẹẹ, ọkpa vbe uwu uwa bu ọsiọre gha rrie owa vbe ogiasọn, ọ na tama ọsiọre nii wẹẹ, ‘Ọse mwẹ lahọ, viọ ebrẹd eha mẹ mọmọ,
6 rhunmwuda, ọse mwẹ ọkpa nọ da ke ehe rre, rre owa mwẹ, I i mwẹ emwi rhọkpa vbe owa ne I khian rhie nẹẹn.’
7 Sokpan, ọsiọre nii na ghi ke ughugha wanniẹn ọnrẹn wẹẹ: ‘Ghẹ ghi kpokpo mwẹ. Ma khui urho nẹ, mẹ vbe ivbi mwẹ ne giẹrẹ ẹre ọ gba rre ebẹdi. I i khian ghi sẹtin kpaegbe do rhie emwi rhọkpa nuẹn.’
8 Ne I tama uwa, adeghẹ ọ ma kpaegbe, rhunmwuda wẹẹ, ọse ẹre iran eva khin, nọ do rhie emwi nọ gualọ nẹẹn, ẹ i mwẹ ọ ma kpaegbe rhie emwi nọ gualọ nẹẹn, rhunmwuda nọ na rhiegba yọ, vbene ọ ma na gi ekhue muẹn.
9 Nọnaghiyerriọ, I tama uwa nian wẹẹ, wa ye gha nọ, ọ gha sẹ uwa obọ; wa ye gha gualọ, wa gha miẹn; wa ye gha sobọ, a gha kie ne uwa.
10 Rhunmwuda, adeghẹ ọmwaikọmwa na gha nọ, a gha rhie nẹẹn, ọmwaikọmwa ghaa gualọ, ọ gha miẹn, ọmwaikọmwa gha vbe gha sobọ, a gha kie nẹẹn.
11 Ọghe ne ẹmwata, de erha nọ rre uwu ẹbu uwa, ne ovbi ẹre gha nọ re ehẹn, nọ gha mu ẹyẹn ye ọre obọ, nọ gha te ya rhie ehẹn nẹẹn?
12 Ra, adeghẹ ovbi ẹre na nọ re ekẹn ọkhọkhọ, ọ gha mu ekpakpahuangan ye ọre obọ ra?
13 Nọnaghiyerriọ, adeghẹ uwa rẹn vbene a ya viọ emwi nọ maan ne ivbi uwa hẹ, agharhemiẹn wẹẹ emwa dan ẹre uwa khin, inu ghi nọ ne Erha uwa nọ rre ẹrinmwi? Ẹ i re te irẹn gha vbe rhie orhiọn nọhuanrẹn ne emwa ni nọ rẹn ra?”
14 Vbọ ghi zẹ kpẹẹ, ọ keghi khu orhiọn dan nẹi guan* hin okpia ọkpa egbe rre. Orhiọn dan nii ghi ladian nẹ, okpia nii nẹi te guan, na suẹn gha guan, ọna keghi yan emwa ni gbẹbu unu ruan.
15 Sokpan, eso vbe uwu iran keghi kha wẹẹ: “Ẹtin e Biẹlzibọb* nọ re ọkaolotu ọghe avbe orhiọn dan, ẹre ọ ya khulo avbe orhiọn dan kua.”
16 Emwa ọvbehe ni ghaa hoo ne iran danmwẹ ọnrẹn ghee, na suẹn gha tama rẹn, nọ ru emwi ọyunnuan ye iran aro, nọ gha re ama ne iran khian ya rẹn wẹẹ Osanobua ẹre ọ gie ẹre rre.
17 Jesu rẹn emwi nọ rre iran ekhọe, rhunmwuda ọni, ọ na tama iran wẹẹ: “Arriọba ne iwannegbe rhirhi gha ye, te ọ de; owa ke owa ne iwannegbe vbe ye, te ọ khian zagha.
18 Erriọ vbe ye, adeghẹ e Setan na gha gu egbe ẹre khọn, ẹ i re te arriọba ọghẹe khian ghi de vberriọ? Wa wẹẹ, ẹtin e Biẹlzibọb ẹre I ya khulo avbe orhiọn dan.
19 Adeghẹ ẹtin e Biẹlzibọb ẹre I ya khulo avbe orhiọn dan, de ẹtin ne ivbi uwa* ghi loo ya khulo iran? Ọna ẹre ọ si ẹre ne iran khian na bu ohiẹn uwa.
20 Sokpan, adeghẹ ikpianbọ ọghe Osanobua ẹre I ya khulo avbe orhiọn dan, ọni rhie ma wẹẹ, Arriọba Osanobua gele la uwa ban nẹ.
21 Okpia nọ wegbe, nọ viọ emwi igbinna mwẹ, ghaa khẹ odẹ vbe ẹguae ẹre, emwi rhọkpa i khian ru emwi nọ mwẹ.
22 Sokpan, ọmwa nọ wegbe sẹ ọre na rre do gu ẹre khọn, ọ na vbe khọnmiotọ yan rẹn, ọ ghi viọ emwi igbinna ọghẹe hia nọ te mu ẹtin yan, ẹghẹ nii, ọ ghi ghae emwi ọghẹe nọ viọ re.
23 Ọmwaikọmwa nẹi rre obọ ọghomwẹ, oghian mwẹ nọ, ọmwaikọmwa nọ ma vbe deba mwẹ si emwa koko, te ọ zagha iran.
24 “Orhiọn dan* gha kpa hin egbe ọmwa rre, ọ ghi zozo lele eke ne amẹ i ye, nọ ya gualọ eke nọ gha dia. Sokpan, deghẹ ọ ma na ghi miẹn, ọ ghi kha wẹẹ, ‘I werriegbe rrie owa ne I na kpa.’
25 Ọ gha ghi sẹ evba, ọ ghi miẹn wẹẹ a kpolo owa nii sẹsẹsẹ, a vbe dọlọe yi.
26 Ẹghẹ nii, ọ ghi werriegbe kpa, ya viọ ihua ẹre ihinrọn ni khọọ sẹ irẹn ba egbe, iran ghi gha dee. Iran gha ghi la owa nẹ, iran ghi miẹn agba dia vba. Ẹghẹ nii, ẹdagbọn ọmwa nii ghi do kulo sẹ vbene ọ ka gha ye.”
27 Vbe ọ wa ye guan nii, okhuo ọkpa keghi ke uwu ẹbu nii guan ladian wẹẹ: “Oghọghọ nọ ne ako ọmọ nọ mu ruẹ, kevbe ewẹn ne u wẹn!”
28 Sokpan, Jesu keghi kha wẹẹ: “Ẹo, nọghayayerriọ, oghọghọ nọ ne emwa ni danmwehọ ẹmwẹ Osanobua, ni vbe yae ru emwi!”
29 Vbe emwa ni gbẹbu ghi bun yọ bun yọ, ọ na suẹn gha kha wẹẹ: “Orre dan ẹre orre na khin; iran gha gualọ ama, sokpan, iran i khian miẹn ama rhọkpa, vbọ gberra ama ọghe Jona.
30 Zẹvbe ne Jona ya gha re ama ne Ivbi e Nenivẹ, erriọ ẹre Ovbi ọmwa khian vbe gha ye ne orre na.
31 Oloi ọghe odẹ ahọ* gha deba ivbi orre na rhiọ kpaegbe vbe ẹghẹ ibuohiẹn; ọ ghi bu ohiẹn gbe iran, rhunmwuda, ọ ke ehe nọ rree gha dee, do danmwehọ ẹmwẹ ẹwaẹn nọ ke unu e Sọlomọn ladian. Sokpan, emwi nọ sẹ e Sọlomọn rre emwa na.
32 Ivbi e Nenivẹ gha deba orre na rhiọ kpaegbe vbe ẹghẹ ibuohiẹn, iran ghi bu ohiẹn gbe orre na, rhunmwuda, vbe Jona kporhu ma iran, iran na fi werriẹ. Sokpan, emwi nọ sẹ e Jona rre emwa na.
33 Ọmwa gha ghi rhu ukpa nẹ, ẹ i khian muẹn ye ehe nọ lẹre, ra nọ ya okhuae* gue ẹre ginna otọ; sokpan, ọ ghi muẹn yan erhan ọmukpa, ne emwa ni la owa mieke na gha bẹghe awanwan ọghe ukpa nii.
34 Aro ruẹ ọre ukpa ọghe egbe ruẹ. Adeghẹ u na rhie aro ye efọnkpa,* egbe ruẹ hia ghi vbe ye wannawanna.* Sokpan, adeghẹ aro ruẹ na gha wu ye emwi,* egbe ruẹ hia ghi vbe so ebiebi.
35 Rhunmwuda ọni, u ghi gha begbe, ne awanwan nọ rrọ ruẹ egbe ghẹ gha re ebiebi.
36 Nọnaghiyerriọ, adeghẹ egbe ruẹ hia na ye wannawanna, vbene ehe rhọkpa vbọ ma na so ebiebi, ehe hia vbe egbe ruẹ ghi gha baa, zẹvbe ukpa nọ ya ọmwa bẹghe odẹ.”
37 Ọ ghi ta ẹmwẹ na nẹ, e Farisi ọkpa keghi tama rẹn nọ do gu irẹn rri evbare vbe owa. Ẹre ọ na gha khian; ọ ghi sẹ evba, ọ na tota nọ rri evbare.*
38 Vbọrhirhighayehẹ, ọ keghi kpa e Farisi nii odin, vbe ọ bẹghe ẹre wẹẹ, ọ ma ka kpe obọ,* ọ ke rri evbare nii.
39 Sokpan, Enọyaẹnmwa keghi tama rẹn wẹẹ: “Wa ne avbe Farisi keghi kpe iyeke ukpu kevbe iyeke ọkpan huan sẹsẹsẹ, sokpan, uyinmwẹ arovbẹmwẹ kevbe ọkhọ, ẹre ọ vuọn uwu egbe uwa.
40 Wa ne akpa vbe abobo! Ẹ i re ọmwa nọ yi ikinnegbe, ẹre ọ vbe yi uwu egbe ra?
41 Sokpan, wa gi ẹse ne uwa ru ne emwa ne obọ ma sẹ ọre,* gha re nọ ke ekhọe uwa rre, ẹghẹ nii, emwi hia vbekpa uwa ghi gha re nọhuanrẹn.
42 Ọ gha baa so uwa gbe, wa ne avbe Farisi! rhunmwuda, wa gua gha zẹ obọ ọkpa ọghe emwiokọ na tie ẹre mint kevbe rhuu,* kevbe ọghe avbe ebe ughughan na ghi re nẹ, vbe a gha ghae ẹre ye ihe igbe, sokpan, ọ gha de ọghe odẹ nọ khẹke ne Osanobua we na ya gha ru emwi, kevbe uhi nọ we na hoẹmwẹ Osanobua, wa ghi bizugbe ẹre! Ọ te gele khẹke ne uwa ru avbe izọhẹ nii, sokpan, ọni ma rhie ma wẹẹ, ne uwa bizugbe avbe emwi nikẹre.
43 Ọ gha baa so uwa gbe, wa ne avbe Farisi! rhunmwuda, aga ni rre odaro* vbe sinagọg* ẹre ọ yẹẹ uwa na tota yi, erriọ ẹre uwa vbe hoo ne emwa gha kpee tuẹ uwa vbe adesẹ ẹki!
44 Ọ gha baa so uwa gbe, rhunmwuda, te uwa yevbe avbe idin nai bẹghe ẹse;* emwa ghi gha ya owẹ mamaẹn gberra, vbene iran i na rẹn wẹẹ idin nọ!”
45 Ẹre ọkpa vbe uwu iran ni wa rẹn Uhi ẹsẹse na wanniẹn ọnrẹn wẹẹ: “Ọmamwaemwi, te uwẹ vbe rhovbiẹ ima na.”
46 Ọ na ghi kha wẹẹ: “Ọ gha vbe baa so uwa gbe, wa ni wa rẹn Uhi ẹsẹse, rhunmwuda, wa ghi kun ihẹ nọkhua ne emwa, ne iran gha mu khian, sokpan, wa tobọ uwa i ya ikpianbọ ọkpa kẹkan kaan ihẹ nii!
47 “Ọ gha baa so uwa gbe, rhunmwuda, wa bọlọ idin ọghe avbe akhasẹ, sokpan, avbe erha uwa odede ẹre ọ gbele iran!
48 Vbene ẹmwata, wa rẹn emwi ne avbe erha uwa odede ru, ọrheyerriọ, wa na ye kue yọ; iran ghi gbele avbe akhasẹ rua, wa na bọlọ idin ọghe avbe akhasẹ nii.
49 Ọni ẹre ọ si ẹre ne Osanobua nọ mwẹ ẹwaẹn* na vbe kha wẹẹ: ‘I gha gie avbe akhasẹ kevbe avbe ukọ bu iran, iran ghi gbele eso rua vbọ, iran ghi vbe zẹ eso kpokpo,
50 ne esagiẹn ọghe avbe akhasẹ hia na he gbele, ke na ya bu agbọn tu agbọn gha dee, mieke na gha rre uhunmwu orre na,
51 ke egbe esagiẹn ọghe Ebẹl kpa, ya sẹ egbe esagiẹn ọghe Zẹkaraia, na gbua vbe uwu ẹkpo ogiukpo kevbe owa Osanobua.’* Vbene ẹmwata, I tama uwa nian wẹẹ, uhunmwu orre na, ẹre ọ khian gha ye.*
52 “Ọ gha baa so uwa gbe, wa ni wa rẹn Uhi ẹsẹse, rhunmwuda, wa rhie isanhẹn urho ọghe irẹnmwi kpa. Wa tobọ uwa ma la owa, wa ma vbe gi enọ gha laọ, laọ!”
53 Jesu ghi kpa hin evba rre nẹ, avbe skraib* kevbe avbe Farisi na suẹn gha kpankaẹn, iran na ye gha nọ rẹn ọta ughughan nibun,
54 iran na gha khuan khẹ ọre, ne iran mieke na ya ẹmwẹ ne unu ẹnrẹn gbalọe.
Avbe Futnot
^ Ra “gia ya ọghọ ye eni ruẹ; gia gha ghee eni ruẹ zẹvbe emwi nọhuanrẹn.”
^ Vbe Grik, “ebrẹd.”
^ Vbe Grik, “emwa hia ni mwẹ ima osa.”
^ Vbe Grik, “ghẹ vbe viọ ima la edanmwẹ.”
^ Ra “orhiọn dan nọ ya ọmwa khian odin.”
^ Ọni ọre, ovan na tie Setan re.
^ Ra “ekpayẹ ọghe uwa.”
^ Vbe Grik, “Orhiọn nọ ma huan.”
^ Ọni ọre, south.
^ Ra “okhuae na ya mwa emwi.”
^ Ra “egbe ruẹ hia ghi gha baa vbe na ghee ukpa.”
^ Vbe Grik, “aro ruẹ na gha re ọghe dan.”
^ Ra “Adeghẹ aro ruẹ hianrẹn.” Vbe Grik, “Adeghẹ aro ruẹ ye khuẹrhẹ.”
^ Ra “ọ na tota nọ rri evbare vbe eteburu.”
^ Ọna i wa re obọ na kpe kẹkan, sokpan, ọ keghi re obọ na kpe, na ya lele ilele ọghe Ivbi e Ju nọ rre otọ.
^ E mint kevbe rhuu keghi re emwi na ya le evbare, nọ ya evbare rhiẹnrhiẹn kevbe nọ yae winhin.
^ Ra “aga ni ghi maan sẹ.”
^ Ọni ọre, owa ugamwẹ ọghe Ivbi e Ju.
^ Ra “na ma yi ama yi.”
^ Vbe Grik, “ẹwaẹn ọghe Osanobua.”
^ Ra “ọgua Osa.”
^ Ra “a gha nọ esagiẹn iran vbe obọ orre na.”
^ Ra “iran ni ma emwa Uhi.”
