Ebe Mak 1:1-45
-
Ikporhu ọghe Jọn ne Ọ Dinmwi Ọmwa Ye Amẹ (1-8)
-
Idinmwiamẹ ọghe Jesu (9-11)
-
Setan danmwẹ e Jesu ghee (12, 13)
-
Jesu suẹn gha kporhu vbe Galili (14, 15)
-
Jesu tie avbe erhuanegbe ẹre nokaro (16-20)
-
Jesu khu orhiọn dan hin ọmwa egbe rre (21-28)
-
Jesu mu emwa nibun egbe rran vbe Kapaniọm (29-34)
-
Jesu gha na erhunmwu vbe ehe nọ divbiẹ (35-39)
-
Jesu mu ọkhọnmwọ oti ọkpa egbe rran (40-45)
1 Omuhẹn ọghe iyẹn nọ maan vbekpa e Jesu Kristi, ne Ovbi Osanobua:
2 Zẹvbe ne Aizaia ne akhasẹ gbẹn ọnrẹn yotọ, nọ na wẹẹ: “(Ghee oo! I gha gie ukọ mwẹ ke odaro nuẹn, nọ ya dọlọ odẹ ruẹ yi.)
3 A keghi họn urhu ọghe orhunmwu ọkpa vbe uwu ato, nọ ghaa datu wẹẹ: ‘Wa dọlọ odẹ ọghe Jehova* yi! Wa ya avbe odẹ ọghẹe khian enọ diae.’”
4 E Jọn ne Ọ Dinmwi Ọmwa Ye Amẹ kegha rre uwu ato, ọ na gha tama emwa, ne iran dinmwiamẹ, ne iran ya rhie ẹre ma wẹẹ iran fi werriẹ nẹ, na mieke na ya orukhọ ọghe iran bọ iran.
5 Emwa ni rre otọ e Judia hia, kevbe emwa hia ni rre Jerusalẹm kegha bu ẹre rre, ọ na gha dinmwi iran ye amẹ vbe Ẹzẹ e Jọdan, iran na gha miẹn orukhọ ọghe iran kue vbe idagbo.
6 E Jọn keghi yọ ukpọn na ya eto e kamẹl do, ọ na vbe ya ugbẹkun ọghe ohian gba ẹkun. Ọ kegha rri irhiso kevbe owọn na miẹn vbe oha.
7 Ọ kegha tama emwa* wẹẹ: “Ọmwa nọ wegbe sẹ mwẹ dee. I ma sẹ nọ gha ghughẹ rre, ne I rhan irri nọ rre ibata ẹre.
8 Amẹ ẹre imẹ dinmwi uwa yi, sokpan, irẹn gha dinmwi uwa ye uwu orhiọn nọhuanrẹn.”
9 Vbe ẹghẹ nii, Jesu keghi ke Nazarẹt ọghe Galili gha dee, e Jọn na dinmwi ẹnrẹn ye amẹ vbe Ẹzẹ e Jọdan.
10 Ọwara ọkpa nọ wa ya ladian vbe uwu amẹ, ọ keghi miẹn vbe ẹrinmwi kie yotọ, ọ na bẹghe orhiọn ọghe Osanobua vbe ọ tuorre dee, ọ yevbe na ghee idu, ọ khian do rhuẹ yan rẹn.
11 Urhu ọkpa keghi guan ke ẹrinmwi rre, ọ wẹẹ: “Wẹ ọre Ovbi mwẹ, ne I hoẹmwẹ ọnrẹn; I miẹn ruẹ yi nẹ.”
12 Vbe ọwara ọkpa nii, orhiọn nọhuanrẹn keghi gua ẹre kpa, nọ gha rrie uwu ato.
13 Ọ kegha rre uwu ato vbe ọwara ikpẹdẹ iyeva (40), evba nii ẹre Setan na danmwẹ ọnrẹn ghee. Avbe aranmwẹ oha vbe gha rre uwu ato nii, sokpan, avbe odibosa na gha ru iyobọ nẹẹn.
14 Ugbẹnvbe a ghi mu e Jọn khui nẹ, Jesu na gha rrie Galili, ọ na ya gha kporhu iyẹn nọ maan ọghe Osanobua,
15 ọ na gha kha wẹẹ: “Ẹghẹ na buru sẹ nẹ, Arriọba Osanobua vbe sotọ nẹ. Wa ro iro fi uyinmwẹ werriẹ, ne uwa mu ẹtin yan iyẹn nọ maan ọghe Osanobua.”
16 Ọ ghi khian lele ọkpẹn Okun e Galili, ọ na bẹghe Saimọn kevbe ọtiọnrẹn ighẹ Andru, iran kegha fi ọga ọghe iran ye uwu okun, rhunmwuda, ọgbehẹn ẹre iran ghaa khin.
17 Jesu keghi tama iran wẹẹ: “Wa lele mwẹ, I gha ma uwa vbene a ya munọ emwa nagbọn hẹ, vbene uwa vbe munọ ehẹn.”
18 Vbe ọwara ọkpa nii, iran keghi sẹ ọga ne iran ya gbe ehẹn rae, iran na lelẹe.
19 Ọ ghi vbe sikẹ odaro kherhe, ọ keghi bẹghe Jems ne ovbi e Zẹbẹdi kevbe ọtiọnrẹn ighẹ e Jọn. Iran kegha rre uwu okọ ọghe iran, iran na gha dọlọ ọga ne iran ya gbe ehẹn yi.
20 Vbe ọwara ọkpa nii, ọ keghi tie iran. Ẹre iran na sẹ erha iran ighẹ e Zẹbẹdi rae ye uwu okọ, kẹ kevbe ikpia ne iran viọ re vbe iwinna, iran na lelẹe kpa.
21 Iran na kpa gha rrie Kapaniọm.
Ọ ghi wa sẹ Ẹdẹ Ikẹtin, ọ na gha rrie sinagọg,* ọ na suẹn gha ma emwa emwi.
22 Vbene ọ ya gha ma emwa emwi keghi yan iran unu ruan, rhunmwuda, te ọ ghaa ma iran emwi vbe na ghee ọmwa nọ mwẹ asẹ, ọ ma yevbe avbe skraib.*
23 Vbe ẹghẹ na kha na, okpia ọkpa ghaa rre sinagọg* ọghe iran, ne orhiọn dan* ghaa loo. Ọ na datu wẹẹ:
24 “Vbọ kaan ima kaan ruẹ, Jesu ne Ovbi e Nazarẹt? Te uwẹ rre do fuẹn ima rua ra? I wa rẹn ọmwa ne u khin; wẹ ọre Ọmwa Nọhuanrẹn Ọghe Osanobua!”
25 Sokpan, Jesu keghi zaro mu orhiọn dan nii, ọ na tama rẹn wẹẹ: “Gue unu ruẹn, ne u ladian vbe egbe okpia na rre!”
26 Orhiọn dan* nii keghi mu okpia nii rueghe, ahẹ na muẹn; ẹre orhiọn dan nii na rhie so, iyeke ọni, ọ keghi kpa hin egbe okpia nii rre.
27 Sokpan, emwi nọ sunu na keghi kpa emwa hia odin, iran na suẹn gha gu egbe guan wẹẹ: “Vba vbe tie ena? Imamwaemwi ọgbọn na khin na! Uhiẹn, ọ vbe mwẹ asẹ na ya tama avbe orhiọn dan* emwi ne iran gha ru, iran ghi gele họn ẹmwẹ nẹẹn.”
28 Rhunmwuda ọni, ẹmwẹ ọnrẹn keghi wa rherhe titi gba ehe hia vbe ikinkin ọghe Galili.
29 Iran keghi kpa vbe sinagọg,* iran na gha rrie owa e Saimọn kevbe Andru; e Jems kevbe Jọn keghi lele iran.
30 Na kha na, iye ọvbokhan e Saimọn rre ilovbiẹ, rhunmwuda, evbirraro ghaa ru ẹre.* Vbe ọwara ọkpa nii, iran keghi tama e Jesu vbekpa ẹre.
31 Jesu keghi bu ẹre, ọ na da ẹre obọ yi, ọ na si ẹre kpaegbe. Evbirraro* nii na fo vbe egbe ẹre, ẹre okhuo nii na suẹn gha ru emwi, nọ ya mu ọghọ ye iran egbe.
32 Ọ ghi sẹ ẹghẹ ota, vbe owẹn ghi de nẹ, emwa na suẹn gha viọ emwa hia ni khuọnmwi kevbe ne orhiọn dan loo bu ẹre rre;
33 emwa hia ni rre ẹvbo keghi si koko ye onurho owa nii.
34 Ẹre ọ na mu emwa nibun ni khuọnmwi emianmwẹ ughughan egbe rran, ọ na vbe khulo orhiọn dan nibun hin emwa egbe rre; sokpan, ẹ i kue ne avbe orhiọn dan nii guan, rhunmwuda, iran rẹnrẹn wẹẹ irẹn ọre Kristi.*
35 Vbọ ghi rre owiẹ fioro, vbe ẹdẹ ma he gbe fo, Jesu keghi kpaegbe, ọ na ladian, ọ na gha rrie ehe nọ divbiẹ, ọ na suẹn gha na erhunmwu vba.
36 Vbọrhirhighayehẹ, e Saimọn vbe ihua ẹre kegha gualọe khian,
37 iran ghi miẹn ọnrẹn, iran na tama rẹn wẹẹ: “Emwa hia wa gualọ ruẹ khian.”
38 Sokpan, ọ keghi tama iran wẹẹ: “Wa gia gha rrie ihe ọvbehe, na gha rrie avbe ẹvbo ni sikẹ emwa, ne I mieke na vbe ya kporhu vba, rhunmwuda, ọna ẹre ọ ya mwẹ rre.”
39 Ẹre ọ na ghi kpa, ọ na gha lele otọ e Galili hia khian, ọ na gha kporhu vbe avbe sinagọg* ọghe iran, ọ na vbe gha khulo avbe orhiọn dan.
40 Ọkhọnmwọ oti ọkpa keghi vbe bu ẹre rre, ọ na gha rinmwiaẹn, ọ na kue viọ iguẹ ye otọ, ọ na wẹẹ: “Adeghẹ u hoo, u gha sẹtin ya mwẹ khian nọhuanrẹn.”
41 Ohan rẹn keghi to e Jesu ẹsẹse, ẹre Jesu na ghi niẹn obọ, ọ na yae kaan rẹn, ọ na tama rẹn wẹẹ: “I wa hoo! Khian nọhuanrẹn.”
42 Vbe ọwara ọkpa nii, emianmwẹ oti nii keghi fo vbe egbe ẹre, ọ na do khian nọhuanrẹn.
43 Vbene okpia nii ghi te kpa, Jesu keghi ya obọ sekhae nẹẹn,
44 ọ na tama rẹn wẹẹ: “Ghẹ tama ọmwa rhọkpa, sokpan, bu ohẹn gha khian nọ ghee ruẹ egbe, u ghi vbe zọ ese ne Mozis we na gha zọ vbe a gha kpe ọmwa huan, nọ mieke na gha re osẹ ne iran.”*
45 Sokpan, okpia nii ghi kpa, ọ na suẹn gha na iyẹn nii khian vbe ehe hia, sẹrriọ wẹẹ, Jesu ma ghi sẹtin gha la orere ẹvbo vbene emwa i na rẹn. Rhunmwuda ọni, ehe nọ divbiẹ ẹre Jesu ghi gha dia. Ọrheyerriọ, emwa na ye gha ke ehe ughughan bu ẹre rre.
Avbe Futnot
^ Ya ghee Apẹndis A5.
^ Ra “kporhu ma emwa.”
^ Ọni ọre, owa ugamwẹ ọghe Ivbi e Ju.
^ Ra “iran ni ma emwa Uhi.”
^ Ọni ọre, owa ugamwẹ ọghe Ivbi e Ju.
^ Vbe Grik, “orhiọn nọ ma huan.”
^ Vbe Grik, “Orhiọn nọ ma huan.”
^ Vbe Grik, “avbe orhiọn ni ma huan.”
^ Ọni ọre, owa ugamwẹ ọghe Ivbi e Ju.
^ Ra “ọ ghaa mwẹ e fiva.”
^ Ra “E fiva.”
^ Ọ sẹtin vbe gha re, “iran rẹn ọmwa nọ khin.”
^ Ọni ọre, owa ugamwẹ ọghe Ivbi e Ju.
^ Ra “nọ mieke na gha re osẹ nọ rhie ẹre ma wẹẹ, egbe rran ruẹ nẹ.”
