Ebe Mak 12:1-44
-
Erre ọghe avbe ọgbugbo ne izigha (1-12)
-
Osanobua kevbe Siza (13-17)
-
Ọta na nọ rẹn vbekpa arhiọkpaegbe (18-27)
-
Uhi eva nọ ghi hin usi sẹ (28-34)
-
Ovbi e Devid ẹre Kristi khin ra? (35-37a)
-
Jesu we ne emwa gha begbe vbe egbe avbe skraib (37b-40)
-
Agiẹghẹ (ekọẹn) eva ne okhuo ọkpa nọ dẹgbẹe ne ovbiogue ya ru izọhẹ (41-44)
12 Ọ na ghi suẹn gha zẹ erre ma iran, ọ na wẹẹ: “Okpia ọkpa keghi mu ugbo e vaẹn, ọ na gbogba ga ẹre, ọ na vbe fian ako na na ru ayọn yọ, deba ọni, ọ na bọ owa ọbodẹ* yọ; ọ ghi mu ugbo nii ne avbe ọgbugbo nẹ vbe agbeghae,* ọ na kpa gha rrie isi.
2 Ẹghẹ ghi sẹ, ọ na gie ọviẹn ọnrẹn bu avbe ọgbugbo nii, nọ ya miẹn iran emwiokọ eso nọ rre ugbo e vaẹn nii.
3 Sokpan, iran na muẹn, iran na ya ugbemwẹ yan rẹn, iran na khu ẹre fua, ọ na fi abọ gha rrie.
4 Ọ na werriegbe gie ọviẹn ọvbehe bu iran, iran na gbe emwi ye ọviẹn nii uhunmwu, iran na vbe ru ẹre emwi oya.
5 Ọ na werriegbe gie ọvbehe bu iran, iran na wa gbe ọni rua; ẹ i re avbiẹ eviẹn ẹre ọ gie bu iran vberriọ, iran ya ugbemwẹ yan eso, iran na gbe eso rua.
6 Orhunmwu ọkpa nọ ghi kẹ, nọ ma he gie, kegha re ovbi ẹre nọ hoẹmwẹ ọnrẹn. Ọ na ghi gie ẹre bu iran, ọ na wẹẹ, ‘Ẹ i mwẹ iran ma daa ne ovbi mwẹ.’
7 Sokpan, avbe ọgbugbo nii keghi koko zẹ iro, iran na wẹẹ, ‘Ọna ẹre ọ khian rri ukhu erhae. Wa larre, ne uwa gia gbe ẹre rua, ne ukhu ọghẹe mieke na khian ọghe ima!’
8 Iran na ghi muẹn, iran na gbe ẹre rua; ẹre iran na si ẹre ladian vbe ugbo e vaẹn nii.
9 De emwi ne ọmwa nọ yan ugbo e vaẹn nii gha ru? Ọ ghi rre do gbele avbe ọgbugbo nii rua, ọ ghi vbe mu ugbo e vaẹn nii ne emwa ọvbehe.
10 Wa ma he ka tie ẹmwẹ na vbe ebe nọhuanrẹn ẹdẹ, nọ khare wẹẹ, ‘Okuta ne iran ni bọ owa he, ẹre ọ ghi do khian okuta a ma miẹn a i ru’?*
11 Wa ma he vbe tie ẹre wẹẹ, ‘Obọ e Jehova* ẹre ọna ke rre, kevbe wẹẹ, ọyunnuan nọ vbe aro ima’ ra?”
12 Ẹre iran na gha hoo ne iran muẹn, rhunmwuda, iran rẹnrẹn wẹẹ, iran ẹre ọ ya erre nii fi itan gie; sokpan, iran kegha mu ohan emwa ni gbẹbu. Iran na ghi sẹrae, iran na kpa.
13 Iyeke ọni, iran keghi gie avbe Farisi eso kevbe eso vbe ekpayẹ e Hẹrọd bu ẹre, ne iran mieke na ya ẹmwẹ ne unu ẹnrẹn gbalọe.
14 Iran ghi sẹ eke nọ ye, iran na tama rẹn wẹẹ: “Ọmamwaemwi, ọmwa ẹmwata ẹre ima rẹn ruẹ yi kevbe wẹẹ, u i ghee ikpanro ọmwa rhọkpa; u i vbe gbe ewanmwẹ ghee obọ ọkpa, sokpan, ẹmwata nọ dekaẹn Osanobua ẹre u ma emwa ẹre. Ọ khẹke na gha ha igho uhunmwu gie Siza ra, ra ọ ma khẹke?
15 Ne ima hae ra, ra ne ima ghẹ hae?” Ọ ghi bẹghe ẹre wẹẹ, emwa okeke ẹre iran khin, ọ na tama iran wẹẹ: “Vbọzẹ ne uwa na danmwẹ mwẹ ghee? Wa rhie dinariọs* ọkpa gu mwẹ ne I ghee ẹre.”
16 Ẹre iran na rhie ọkpa gie ẹre, ọ na ghi nọ iran wẹẹ: “De uhunmwu ọmwa kevbe eni ọmwa nọ rre igho na?” Iran na tama rẹn wẹẹ: “Ọghe Siza nọ.”
17 Jesu na ghi kha wẹẹ: “Wa rhie emwi e Siza ne Siza, sokpan, wa ghi vbe rhie ọghe Osanobua ne Osanobua.” Ẹmwẹ ọnrẹn na wa yan iran unu ruan.
18 Avbe Sadusi ni kha wẹẹ arhiọkpaegbe i rrọọ, keghi bu ẹre gha dee do nọ rẹn wẹẹ:
19 “Ọmamwaemwi, e Mozis gbẹn ọnrẹn yotọ ne ima wẹẹ, adeghẹ ọmwa nọ mwẹ ọtẹn nokpia na wu sẹ ọvbokhan rẹn rae, vbene ọ ma na biẹ, ọtiọnrẹn nokpia ghi rhie ọvbokhan rẹn rọnmwẹ, nọ mieke na biẹ ne ọtiọnrẹn nọ wu nii.
20 Etẹn nikpia ihinrọn kegha rrọọ. Nọdiọn keghi rhie okhuo, sokpan, ọ na wu, vbene ọ ma na biẹ.
21 Nogieva keghi rhie okhuo nii rọnmwẹ, sokpan, ọ na vbe wu, vbene ọ ma na biẹ; erriọ ẹre ọ vbe gha ye ne nogieha.
22 Erriọ ẹre iran ihinrọn ya wulo, vbene iran rhọkpa ma na biẹ. Vbe okiekie, okhuo nii na vbe wu.
23 Ọ gha ghi sẹ ẹghẹ arhiọkpaegbe, de amwẹ ọmwa nọ khian ghi gha khin, ugbẹnvbe a miẹn wẹẹ, te iran ihinrọn wa rhie ẹre gba obọ?”
24 Jesu keghi tama iran wẹẹ: “Wa ma bẹghe emwi nọ si ẹre ne uwa na baeku? Rhunmwuda, wa ma rẹn Ebe Nọhuanrẹn, amaiwẹ te uwa khian rẹn vbene Osanobua mwẹ ẹtin hẹ.
25 Rhunmwuda, vbe ẹghẹ ne emwa khian ya rhiọ kpaegbe, ikpia i khian ghi gha rhie okhuo, a i khian ghi vbe gha ya ikhuo ne ọdọ, sokpan, iran ghi yevbe avbe odibosa ni rre ẹrinmwi.
26 Sokpan, vbe nọ dekaẹn arhiọkpaegbe ọghe emwa ni wulo, wa ma he tie ẹre vbe ebe Mozis ra, vbe okha ọghe oha* ne erhẹn na gha baa, ne Osanobua na tama rẹn wẹẹ: ‘Mẹ ọre Osanobua ọghe Ebraham, Osanobua ọghe Aizik kevbe Osanobua ọghe Jekọb’?
27 Osa ọghe iran ni rrọọ ẹre irẹn khin, ẹ i re ọghe iran ni wulo nẹ. Te uwa wa gele baeku.”
28 Ọkpa vbe avbe skraib* nọ rre, nọ vbe họn ẹmwẹ ne iran ghaa ta,* ghi bẹghe ẹre wẹẹ, ewanniẹn ne Jesu rhie ne iran wa deyọ, ọ na nọ e Jesu wẹẹ: “De nọ re okaro* vbe uwu avbe uhi hia?”
29 Jesu na wanniẹn wẹẹ: “Nokaro ọre, ‘Wa danmwehọ oo, Izrẹl, e Jehova* ne Osanobua mwa keghi re Jehova* ọkpa,
30 te u gha vbe ya otọ ẹko ruẹ hia, arrọọ* ruẹ hia, ekhọe ruẹ hia kevbe ẹtin ruẹ hia hoẹmwẹ e Jehova* ne Osanobua ruẹ.’
31 Nogieva ọre, ‘Te u gha hoẹmwẹ ogieva ruẹ zẹvbe ne u hoẹmwẹ egbuẹ.’ Uhi ọvbehe i rrọọ nọ kpọlọ sẹ avbe uhi na.”
32 E skraib* nii na tama rẹn wẹẹ: “Ọmamwaemwi, u wa guan ẹse, ẹmwata ẹre u wa ta. ‘Irẹn Ọkpa gele nọ,* ọmwa ọvbehe i rrọọ vbọ gberra irẹn’;
33 na vbe ya otọ ẹko ima hia, ekhọe ima hia, kevbe ẹtin ima hia hoẹmwẹ ọnrẹn, kevbe wẹẹ, na hoẹmwẹ ogieva ima zẹvbe ne ima hoẹmwẹ egbe ima, wa kakabọ ru ekpataki sẹ avbe ese na giẹn ruan kevbe na zọ.”
34 Jesu ghi miẹn vbene ọ ya ya ẹwaẹn guan hẹ, ọ na tama rẹn wẹẹ: “Wẹ sikẹ Arriọba Osanobua nẹ.” Sokpan, ohan ma ghi gi ọmwa rhọkpa werriegbe nọ rẹn ọta.
35 Vbọrhirhighayehẹ, vbe Jesu ye ma emwa emwi vbe ọgua Osa, ọ na wẹẹ: “Vbọzẹ na na miẹn wẹẹ, avbe skraib* kha wẹẹ, ovbi e Devid ẹre Kristi khin?
36 Orhiọn nọhuanrẹn keghi loo e Devid tobọre ya kha wẹẹ, ‘E Jehova* keghi tama Enọyaẹnmwẹ wẹẹ: “Tota ye obọ erha ọmwa mwẹ, a te miẹn wẹẹ, I viọ avbe eghian ruẹ ye ototọ owẹ ruẹ.”’
37 Ugbẹnvbe a miẹn wẹẹ, e Devid tobọre tie ẹre Enọyaẹnmwa, vbe ọ ghi ya re ovbi ẹre hẹ?”
Emwa nibun ni gbẹbu vba kegha danmwehọ ọre, ẹko na gha rhiẹnrhiẹn iran.
38 Vbe ọ ye ma emwa emwi nii, ọ na kha wẹẹ: “Wa gha begbe vbe egbe avbe skraib,* ni hoo ne iran gha khian yo khian rre, ke iran ke ẹwu ne guọrọ ne iran mu yọ, iran ghi gha hoo ne emwa gha kpee tuẹ iran vbe adesẹ ẹki.
39 Avbe aga ni rre odaro* vbe sinagọg* kevbe ehe nọ ghi maan sẹ vbe eke ne emwa na gbẹbu gha rri evbare ota, ẹre ọ yẹẹ iran na tota yi.
40 Iran gha miẹn ikhuo ni dẹgbẹe, iran ghi gbe iran miẹn iran owa,* iran ghi vbe gha na erhunmwu nọ taẹn vbe otọ, ọghe na ba bẹghe mwẹ.* Ohiẹn na khian bu gbe iran, ẹre ọ khian wegbe* sẹ.”
41 Jesu keghi tota ye ọkpẹn eke ne avbe ẹkpẹti na viọ igho yi ye, ọ na ke evba gha ghee vbene emwa ya gha viọ igho ye uwu avbe ẹkpẹti nii hẹ; emwa nibun ni fe kegha viọ agiẹghẹ* nibun yọ.
42 Okhuo ọkpa nọ dẹgbẹe ne ovbiogue keghi rre, ọ na viọ agiẹghẹ* eva ne giẹrẹ, ni ma sẹ emwi rhọkpa* yọ.
43 Ẹre Jesu na ghi we ne erhuanegbe ẹre sikẹ irẹn, ọ na tama iran wẹẹ: “Ne I ta ẹmwata ma uwa, igho ne okhuo na nọ dẹgbẹe ne ovbiogue viọ ye ẹkpẹti, ẹre ọ sẹ igho ne iran nikẹre viọ yọ.
44 Rhunmwuda, vbe uwu ọrhẹnrhẹn ne iran mwẹ, ẹre iran hia na viọ ye uwu ẹkpẹti, sokpan, nọ ne okhuo na, egbe nọ rhe ya re ovbiogue, emwi hia nọ mwẹ, nọ khian ya gaga egbe, ẹre ọ viọ yọ.”
Avbe Futnot
^ Ra “owa ọkhẹ.”
^ Ra “ehaya.”
^ Ra “nọ da igiekẹn ọghe owa yi.”
^ Ya ghee Apẹndis A5.
^ Ya ghee Apẹndis B14.
^ Ra “oha igban.”
^ Ra “iran ni ma emwa Uhi.”
^ Ra “vbe iran muan ẹmwẹ.”
^ Ra “De uhi nọ ghi hin usi sẹ.”
^ Ya ghee Apẹndis A5.
^ Ya ghee Apẹndis A5.
^ Ya ghee Apẹndis A5.
^ Ra “ẹdagbọn.”
^ Ra “Nọ ma emwa Uhi.”
^ Ra “Irẹn ọkpa ẹre ọ gele re Osanobua.”
^ Ra “iran ni ma emwa Uhi.”
^ Ya ghee Apẹndis A5.
^ Ra “iran ni ma emwa Uhi.”
^ Ra “aga ni ghi maan sẹ.”
^ Ọni ọre, owa ugamwẹ ọghe Ivbi e Ju.
^ Ra “emwi ne iran mwẹ.”
^ Ra “ọghe abawẹ.”
^ Ra “khọọ.”
^ Ra “ekọẹn (coin).”
^ Ra “ekọẹn (coin).”
^ Vbe Grik, “e lẹptọn eva, nọ re kuọdrans ọkpa.” Ya ghee Apẹndis B14.
