KALANSEN 01

Bibulu bɛ se ka i dɛmɛ cogo di?

A BILA A LA

An bɛɛ b’a fɛ ka fɛn caman dɔn ɲɛnamaya, tɔɔrɔw, saya ani sini ko la. Don o don kow fana bɛ an kun kan i n’a fɔ an magɔɲɛfɛnw sɔrɔli walima hɛrɛ sɔrɔli denbaya kɔnɔ. Ɲininkali minnu nafa ka bon ni ɲininkaliw bɛɛ ye ɲɛnamaya kɔnɔ, mɔgɔ caman yʼa ye ko Bibulu bɛ ka u dɛmɛ ka olu jaabiw sɔrɔ. Nka o dɔrɔn tɛ, a bɛ laadilikan nafamaw di u ma fana don o don ɲɛnamaya ko la. Yala e hakili la, Bibulu bɛ se ka mɔgɔw dɛmɛ wa?

1. Bibulu bɛ ɲininkali minnu jaabiw di, olu dɔw ye jumɛnw ye?

Bibulu bɛ nin ɲininkali nafama ninnu jaabiw di: Ɲɛnamaya daminɛna cogo di? Ɲɛnamaya kun ye mun ye? Mun na mɔgɔw bɛ ka tɔɔrɔ? Mun bɛ saya kɔfɛ? Ni mɔgɔw bɛɛ bɛ ka hɛrɛ de ɲini, mun na kɛlɛw ka ca nin cogo la? Yala don nataw la, laban bɛna kɛ dugukolo la wa walima laban tɛna kɛ a la? Bibulu bɛ dusu don an kɔnɔ, an ka o ɲininkali suguw jaabiw ɲini wa mɔgɔ caman ye jaabiw sɔrɔ o ɲininkaliw la minnu ye u wasa kosɛbɛ.

2. Bibulu bɛ se ka an dɛmɛ cogo di an k’an ka don o don ɲɛnamaya diyabɔ?

Bibulu bɛ laadilikan ɲumanw di an ma. Misali la, denbayaw bɛ hɛrɛ sɔrɔ tigitigi cogo min na, a bɛ denbayaw kalan o la. A bɛ laadilikanw di an ma jɔrɔnankow ɲɛnabɔ cogo kan ani an ka baara ko bɛ se ka diya an ye cogo min na. Bibulu bɛ min fɔ nin barokun ninnu ani dɔ wɛrɛw ko la, i bɛna o dɔn ni an tɔra ka baro kɛ nin gafe in kan ɲɔgɔn fɛ. A bɛ se ka kɛ ko i bɛna sɔn a ma ko, “nafa” bɛ “Kitabu kuma bɛɛ” la [Fɛn o fɛn bɛ Bibulu kɔnɔ].—2 Timote 3:16.

Nin gafe tɛ gafe ye min bɛ bila Bibulu nɔ na. Nka a bɛ dusu don i kɔnɔ, i yɛrɛ ka Bibulu sɛgɛsɛgɛ. O de la, an b’a ɲini i fɛ i ka Bibulu tɛmɛsiraw kalan minnu bɛ nin kalansenw kɔnɔ ani ka u sanga fɛnw ma i bɛ ka minnu kalan.

DƆ FARA I KA DƆNNIYA KAN

A ɲini k’a dɔn Bibulu ye mɔgɔ dɔw dɛmɛ cogo min na, a kalanni bɛ se ka diya i ye cogo min na ani mun na a ka ɲi i ka dɛmɛ sɔrɔ walisa k’a faamu.

3. Bibulu bɛ se ka an ɲɛminɛ

Bibulu bɛ i n’a fɔ yeelenba dɔ. A bɛ se ka an ɲɛminɛ an ka latigɛli ɲumanw kɛ ani a bɛ se k’a fɔ an ye fɛn minnu bɛna kɛ sini.

Zaburu 119:105 kalan, o kɔ aw ka baro kɛ nin ɲininkaliw kan:

Nin Zaburu sɛbɛnbaga tun bɛ Bibulu ye cogo di?
E yɛrɛ dun, e bɛ Bibulu ye cogo di?

4. Bibulu bɛ se ka an ka ɲininkaliw jaabi

Muso dɔ y’a ye ko Bibulu ye a ka ɲininkaliw jaabi, a tun bɛ to ka miiri minnu ko la kabini san caman. A’ye WIDEYO lajɛ, o kɔ aw ka baro kɛ nin ɲininkaliw kan:

WIDEYO: I jija, kana bɔ i ka jigiya kan abada! (1:48)

Wideyo kɔnɔ, ɲininkali sugu jumɛnw de tun bɛ nin muso in bolo?
Bibulu kalanni y’a dɛmɛ cogo di?

Bibulu bɛ dusu don an kɔnɔ an ka ɲininkaliw kɛ. Matiyu 7:7 kalan, o kɔ aw ka baro kɛ nin ɲininkali kan:

Ɲininkali jumɛnw de bɛ e bolo Bibulu bɛ se ka minnu jaabi?

5. I bɛ se ka nafa sɔrɔ Bibulukalan na

A ka di mɔgɔ caman ye ka Bibulu kalan wa u bɛ ka nafa sɔrɔ o la. A’ye WIDEYO lajɛ, o kɔ aw ka baro kɛ nin ɲininkaliw kan:

WIDEYO: Bibulu kalanjɛ (2:05)

Wideyo kɔnɔ, funankɛw ye mun de miiri kalanjɛ kɛli ko la?
Hali ni kalanjɛ kɛli man di u ye, mun na Bibulu kalanni ka di u ye?

Fɛn fɔlen minnu bɛ Bibulu kɔnɔ, olu bɛ se ka an dusu saalo ani ka jigiya di an ma. Zaburu 119:49, 50 kalan, o kɔ aw ka baro kɛ nin ɲininkali kan:

Dususaalo ni jigiya minnu bɛ sɔrɔ Bibulu kɔnɔ, yala olu ka di i ye wa?

6. Mɔgɔ wɛrɛw bɛ se ka an dɛmɛ an ka Bibulu faamu

Hali ni mɔgɔ caman bɛ Bibulu kalan u yɛrɛw ye, u y’a ye ko ni mɔgɔ wɛrɛw bɛ Bibulukalan kɛ u kun, o bɛ u dɛmɛ kosɛbɛ. Kɛwalew 8:26-31 kalan, o kɔ aw ka baro kɛ nin ɲininkali kan: