Nin Bibulukalan in sen fɛ, i ye fɛn caman kalan Jehova ko la. I ye fɛn minnu kalan a ko la, olu ye i bila ka a kanu kosɛbɛ. Laala yɛrɛ o ye i bila i ka i yɛrɛbakun di a ma ani ka batise. Nka ni i ma o kɛ fɔlɔ, laala i bɛ ka miiri o kɛli la don nataw la. Hali ni i ye batɛmu ta ka ban, i mago b’a la ka ta’a fɛ ka ɲɛtaaw kɛ halisa. I bɛ se ka ta’a fɛ ka gɛrɛ kosɛbɛ Jehova la tuma bɛɛ. I bɛ se ka o kɛ cogo di?

1. Mun na i ka kan ka ta’a fɛ ka i ni Jehova ka teriya fanga bonya?

An ka kan ka cɛsiribaw kɛ walasa ka ta’a fɛ ka an ni Jehova ka teriya fanga bonya. Mun na? “Walisa an kana na ɲinɛ ka [Jehova] bila.” (Heburuw 2:1) Mun de bɛ se ka an dɛmɛ walasa an ka ta’a fɛ ka Jehova bato ni kantigiya ye? An bɛ se ka to ka caman kɛ waajulibaara la, ani ka cogoya wɛrɛw ɲini walasa ka baara kɛ kosɛbɛ an ka Ala ye. (Filipekaw 3:16 kalan.) Jehova batoli de ye ɲɛnamaya kɛcogo bɛɛ la ɲuman ye!​—Zaburu 84:11.

2. I ka kan ka ta’a fɛ ka fɛn wɛrɛ jumɛn kɛ halisa?

Hali ni nin ye i ka Bibulukalan bannen ye, i ka kan ka ta’a fɛ ka ɲɛnamaya kɛ iko krecɛn. Bibulu b’a fɔ ko an ka “jogo kura don” an na. (Efesekaw 4:23, 24) Ni i bɛ ta’a fɛ ka Ala ka Kuma kalan ani ka lajɛw taali matarafa, i bɛna fɛn kura caman dɔn Jehova ani a jogow kan. Cogoyaw ɲini minnu fɛ i bɛ se ka Jehova jogow ladege kosɛbɛ i ka ɲɛnamaya kɔnɔ. I ka kan ka yɛlɛma fɛn o fɛn kɛ walasa ka a nisɔndiya, ta’a fɛ ka olu kɛ.

3. Jehova bɛna i dɛmɛ cogo di i ka se ka ɲɛtaaw kɛ?

Bibulu b’a fɔ ko: “Ala . . . yɛrɛ na aw dafa, ka aw sabati, ka aw barika bonya, ka aw sinsin.” (1 Piɛrɛ 5:10) Kɔrɔbɔliw bɛ an bɛɛ sɔrɔ. Nka an mago bɛ fɛn minnu na walasa ka se sɔrɔ u kan, Jehova bɛ olu di an ma. (Zaburu 139:23, 24) Ka Jehova bato ni kantigiya ye, a ye layidu ta ko a bɛ o kɛli nege ani o kɛli se di i ma.​—Filipekaw 2:13 kalan.

 DƆ FARA I KA DƆNNIYA KAN

4. Ta’a fɛ ka to ka kumaɲɔgɔnya kɛ ni i teriw bɛɛ la ɲuman ye

Delili ani Bibulukalanw ye i dɛmɛ i ka kɛ Jehova teri ye. O kow kɛli bɛ se ka i dɛmɛ cogo di i gɛrɛlen ka to a la kosɛbɛ?

Zaburu 62:9 kalan, o kɔ aw ka baro kɛ nin ɲininkali kan:

• Walasa ka i ni Jehova ka teriya fanga bonya, i bɛ se ka i ka deliliw kɛcogow ani u kɔnɔkumaw fisaya cogo jumɛn na?

Zaburu 1:2 kalan, o kɔ aw ka baro kɛ nin ɲininkali kan:

• Walasa ka i ni Jehova ka teriya fanga bonya, i bɛ se ka i ka Bibulu kalanjɛ kɛcogoya fisaya cogo jumɛn na?

I bɛ se ka mun de kɛ walasa i ka yɛrɛkalan ka i nafa kosɛbɛ? Walisa ka hakilina dɔw sɔrɔ o kan, a’ye WIDEYO lajɛ, o kɔ aw ka baro kɛ nin ɲininkaliw kan:

• Hakilina minnu dira wideyo kɔnɔ, i bɛ se ka olu jumɛnw de waleya?

• A bɛ diya i ye ka kalan kɛ barokun jumɛnw kan?

 BAKURUBAFƆLI

Ta’a fɛ ka i ni Jehova ka teriya fanga bonya ani ka alako kuntilennaw sigi i yɛrɛ la. O la, i bɛ se ka ɲɛnamaya kɛ nisɔndiya la kabini sisan ani ka o kɛ fo badaa!

Seginnkanni

• Mun na i bɛ se ka da a la ko Jehova bɛna i dɛmɛ i ka a bato kantigiya la?

• I bɛ se ka i ni Jehova ka teriya fanga bonya cogo di?

• Alako kuntilennaw bɛ se ka i dɛmɛ cogo di i ka ɲɛtaaw kɛ?