Den nali bɛ se ka kɛ nisɔndiyaba ye ani baaraba ye furuɲɔgɔnmaw bolo. Ni aw kɛra bangɛbaga kuraw ye, aw dabali bɛna ban k’a ye ko aw ka waati ani aw ka fanga bɛɛ bɛna bila aw den ladonni de kama. Sunɔgɔ baliya ni i kɔnɔko yɛlɛmaliw bɛ se ka na ni jɔrɔnankow ye aw ka jɛɲɔgɔnya kɔnɔ. I ni i furuɲɔgɔn ka kan ka yɛlɛma dɔw kɛ walasa k’aw den ladon ani k’aw ka furu kisi. Bibulu ladilikanw bɛ se ka aw dɛmɛ cogo di ka nin gɛlɛya ninnu kunbɛn?

BIBULU BƐ NIN DE FƆ: “Muɲuli bɛ kanuya la, a falen bɛ ɲumaya la”. Ani fana, kanuya “t’a yɛrɛ nafa ɲini. A tɛ dimin joona”. (1 Kɔrɛntekaw 13:4, 5) Ni i ye denbatigi kura ye, a bɛnnen don i hakili bɛɛ ka kɛ i den na. O la i cɛ bɛ se k’a miiri k’i y’a kɛ bolokɔfɛfɛn ye, o de kama i kana ɲinɛ ko ale fana mago bɛ i k’i janto a la. Ni muɲuli ni ɲumanya ye, a dɛmɛ a k’a dɔn ko nafa b’a la ani a sen don den lamɔli la.

“Cɛw, aw ka aw musow minɛ ni hakilitigiya ye.” (1 Piɛrɛ 3:7) A faamuya k’a fɔ ko i furumuso bɛna a barika fanba bɛɛ don aw den ladonni la. Den sɔrɔ bɛ dɔ fara a ka baaraw kan, k’a kunkololataw caya ani k’a sɛgɛn. Tuma dɔ la yɛrɛ, a bɛ se ka dimi i kɔrɔ, nka a ɲini k’i mada, “mɔgɔ sabalilen ka fisa ni kɛlɛkɛ cɛ ja gɛlɛn ye.” (Ntalenw 16:32) Kɛ hakilitigi ye, ani a mago bɛ dɛmɛ min na o k’a ye.—Ntalenw 14:29.

I BƐ SE KA MIN KƐ:

• Faw: Aw y’aw musow dɛmɛ u ka u janto u den na, hali n’a kɛra sufɛla ye. Aw bɛ fɛn wɛrɛ minnu kɛ aw ye dan kɛ o waatiw la, o cogo la aw bɛna se ka kɛ ni aw muso ni aw den ye.

• Denbaw: Ni aw furucɛw ko u bɛ aw dɛmɛ den ladon la, aw ye sɔn u ka dɛmɛ ma. Ni a tɛ o baara kɛ ka ɲɛ, kana a lagosi, nka ni ɲumanya ye a jira a la a bɛ se ka o baara kɛ ka ɲɛ cogo min na.

BIBULU BƐ NIN DE FƆ: “U na kɛ farisogo kelen ye.” (Jenɛse 2:24) Hali n’a y’a sɔrɔ ko aw ye mɔgɔ kura sɔrɔ aw ka denbaya kɔnɔ, i hakili to a la ko i n’i furuɲɔgɔn ye ‘farisogo kelen de ye.’ Aw ye cɛsiribaw kɛ walasa aw ka jɛɲɔgɔnya barikalen ka to.

Furumusow, aw furucɛw bɛ dɛmɛ min kɛ aw ye, aw y’aw ka waleɲumandɔn jira u la o kosɔn. Aw ka waleɲumandɔn fɔli bɛ se ka “kɛnɛyali” kɛ. (Ntalenw 12:18) Furucɛw, aw y’a jira aw musow la aw bɛ u fɛ cogo min na ani nafa min bɛ u la. A bɛ baara min kɛ denbaya kɔnɔ a tanu o la.—Ntalenw 31:10, 28.

“Mɔgɔ si kana a yɛrɛ nafa ɲini, fɔ mɔgɔ wɛrɛ nafa.” (1 Kɔrɛntekaw 10:24) Ko min kaɲi i furuɲɔgɔn ma o kɛ tuma bɛɛ. I n’a fɔ furuɲɔgɔnmaw, aw ye waati ta ka kuma, ka ɲɔgɔn tanu ani ka ɲɔgɔn lamɛn. Kɛ mɔgɔ labilalen ye cɛ ni musoya fan fɛ. I furuɲɔgɔn mago bɛ fɛn minnu na i hakili to o la. Bibulu b’a fɔ ko: “Aw kana ban ɲɔgɔn na, fɔ ni aw fila bɛnna a la”. (1 Kɔrɛntekaw 7:3-5) Aw ye kuma o ko kan aw fila ni ɲɔgɔn cɛ. Aw ka muɲuli ni aw ka ɲɔgɔn faamuyali bɛna fanga don aw ka jɛɲɔgɔnya la.

I BƐ SE KA MIN KƐ:

• Aw kana ɲinɛ ka waati ta aw fila dɔrɔn kama

• Ko fitinin dɔw kɛ min b’a jira i furuɲɔgɔn na ko i b’a fɛ, i n’a fɔ batakininw cili a ma, walima ka nilifɛn fitinin dɔ di a ma

BIBULU BƐ NIN DE FƆ: “I ye Kitabu senumaw dɔn kabini i denmisɛnma. Olu de bɛ se ka hakilitigiya di i ma, walisa i ka kisi”. (2 Timote 3:15) I bɛna i den kalan cogo min na o fɛɛrɛ tigɛ. Kabini a ma wolo seba b’a ye ka ko faamu. Ka den yɛrɛ to kɔnɔbara la a bɛ se k’aw kumakan dɔn ani a bɛ se k’aw kɛcogoya dɔn. Kalan kɛ a kun kabini a denmisɛnma. Hali n’a bɛ se ka kɛ ko i bɛ ka min kalan a tɛ o faamu, o bɛ se k’a dɛmɛ kalan ka diya a ye ni a kɔrɔbayara.

K’i lamɛn alako kuma fɔli la, i den tɛ dɔgɔya o ma abada. A to a k’i lamɛn k’i to Jehova delili la. (Dutɛrɔnɔmɛ 11:19) Hali k’aw to tulonkɛ la ɲɔgɔn fɛ, kuma a fɛ Jehova ka ko kɛtaw kan. (Zaburu 78:3, 4) Ni i den bɛ kɔrɔbaya a bɛna a ye ko Jehova kanuya bɛ i la, ani ale fana bɛna a ɲini ka Jehova kanu.

I BƐ SE KA MIN KƐ:

• Delili kɛ kɛrɛnkɛrɛnnenyala walasa ka hakilitigiya sɔrɔ ka i den lamɔ

• Segin kuma ani hakilina kolomaw kan i den ye walasa a ka se k’a dege olu la joona