“Bia Sophia * bi mbe bi lu’aneya tañe mimbu 39 éyoñ ôkon ô nga bi nye a wôé nye. Bemvôé bam be nga su’u ma angôndô ya abui, a mamiene me nji ba’a mo. Ve tañe ngume mbu, me mbe me wô’ôtane ve ane me ne ñyaban e zañ. Mintaé mi mbe mi bete’e a sis, mi beta fe so. Ja’a na mimbu milal mi lôteya nté ane a nga wu, biyoñe biziñ me wô’ô tem mintaé mi nga beta bet.”​—Kostas.

Ye môte wo too ô nye’e a wuya wo? Nge nalé, ô ne ve’ele wô’ôtan ane Kostas. Abui mam e nji taé nlem nge ntyele nleme yôp ane awu môte mia nye mia too nlu’an, nge awu môte ya nda bôte jangan, nge mvôé bia too bi dañe nye’e. Ja’a bôte ba fase mintaé y’awu, be ne tyiñe jia a ajô ete. Nlô ajô ya kalate mefoé The American Journal of Psychiatry a liti na, “éyoñe môte ba too be nye’e a wu, abui da simesane na b’aye beta yene nye môs éziñ a jame te da taé be nlem nya nya abuii.” Éyoñe mintaé mi lôteya nkôñ, môt a yôn a ne sili émiene na: ‘Mé wô’ô mintaé mi akekui éyoñ évé? Ye mé fo’o beta bi meva’ ényiñ? Aval avé me ne yene mvolan?’

Biyalane ya minsili mite bi ne Vee Ôyo! nyi. Nlô ajô wo tôñe wuna wo ye liti jam ô ne ji’a bo nge môte wo too ô nye’e a ndôme wu. Minlô mejô mivok mia ye liti mame me ne volô wo na ô sé’é mintaé miôé.

Bi to ndi na, mame ma tôñe valé ma ye ve môt ase a juan a mintaé y’awu ngule nyul a mvolane wo yian.