NGABE 3
Aval avé mi ne kôme mejô
“Mi bo’an ayôñ mfa’a ya nye’ane wônan miabebien mi anyeñesan; amu nye’an wo abuti jama mbia bemam.”
Éyoñe mia nyo nnôm nge nyo ngal mia taté ényiñe mia bebaé, minju’u mi ne kui. Minju’u mite mi ne so amu mia simesane ki avale da, mi lôô ki mam avale da, a mia yene ki ényiñ avale da. Minju’u mi ne fe so nseñ, nge ki éyoñ mbia jam éziñ a kui mia atemetem.
Ô ne kômbô jeñe na ô bo ve ane mam mese me ne mvo’é mvo’é, ve Kalate Zambe a ye’ele bia na bia yiane jeñe na bi kôme mejô. (Matthieu 5:23, 24) Nge mia tôñe melebe ya Kalate Zambe, mi yem aval avé mi ne kôme mejô.
1 KOBANÉ AJÔ TE
JÔME KALATE ZAMBE A JÔ: “Jôm ése . . . é bili éyoñ: . . . éyoñe ya kobô.” (Ecclésiaste 3:1, 7) Nyoñané abim éyoñe da sili na mi kobô ajô éziñ. Kôme’e bo na édiñe jôé é yeme wôk avale wo wô’ôtan, a ôsimesane wôé ajô te. “Kobô’ô [ve] benya mejôô” a môt ô nga luk. (Beéphésien 4:25) Ja’a wo wô’ô ôlun aya, te bete tyiñe yôp. Évôvoé éyalan é ne kamane mia na mi sañetan a jô mame ma yiane ki.
Ja’a éyoñe mi nji kui tyiñ, ba’ale mbamba nlem, kele ôsu a semé môt ô nga luk a liti nye nye’an. (Becolossien 4:6) Te tyili, jeñe’e a mengule mese na mi ji’a kôm ajô te.
JÔME MI NE BO:
-
Tobane mbamba éyoñe mi ne kobô ajô te ne séé
-
Éyoñe wo wo yiane vô’ôlô nyô mbok, te tyi’i nye nkobô. Éyoñe jôé ya kobô jé kui fe
2 VÔ’ÔLÔ’Ô, NDEMBEN WO YE TU’A WÔK
JÔME KALATE ZAMBE A JÔ: “Mi tuka’a nye’esan; (...) wua a wumulu’u nyô mbok.” (Beromain 12:10) É ne mfi ya kôme vô’ôlô. Kôme’e jeñe na ô wôk jôm édiñe jôé ja kômbô jô a ‘nleme ya mvam, a nje’ebane nlem.’ (1 Pierre 3:8; Jacques 1:19) Te jô ve na: “Ma wô’ô wo.” Asu na ô kôme vô’ôlô, jôké’é jôme wo bo, nge ke sili nye nge mi ne kobô ajô te éyoñ éfe. Nge ô yene môt ô nga luk ane môte mia nye mi ne ngame jia, sa ke ane nsiñe wôé, wé bo “te bo avôle ya yaa nleme wôé” été.
JÔM Ô NE BO:
-
Kele ôsu a vô’ôlô, ô kañese’e asimesane dé, ja’a wo nye’e ki mame wo wôk
-
Te tebe ve bifia wo wôk, jeñe na ô wô’ô jôme bifia bite bi atinan. Fombô’ô ane édiñe jôé ja kobô, yen aval a bo asu dé a nyôle jé ése
3 BO’ANÉ AVALE MIA TE TYIK
JÔME KALATE ZAMBE A JÔ: “Ésaé ése é bili nsenge,” ve zezé nkobô wo ke môte zene ya azoé. (Minkana 14:23) Jôme mia yiane bo é nji dañe ve na mi kui tyiñe ya bo jam éziñ. Mia yiane fe bo jamete avale mia bebaé mia te tyik. Jamete dé sili na mi ve mengul, ve nge mia bo nalé, mia ye bi bibotan. (Minkana 10:4) Nge mia saé a nleme wua ane bôte be ne ngame jia, mia ye bi “mbamba be ma’an mfa’a ya ésaé” jenan.
JÔME MI NE BO:
-
Tyi’ané jé môt ase a yiane bo asu na mi kôm ajô
-
Mi bo mi fase’e abim avé mi kômeya ajô te
