Ékôane Bengaa be Yéhôva ya zia melu jangane nyi é nga taté memane ya mimbu 1800. Melu mete, mone nsamba beyé’é mejô me Zambe, a too fefele tisone ya Pittsburg, e Pennsylvanie, si ya Amerka, a nga taté na a fase Kalate Zambe nya mfasane. Be mbe be nyoñe bedo’otene ya miñyebe, a ve’e be a benya miñye’elane ya Kalate Zambe. Ane be nga taté na ba kuli mame be nga yé’é e bekalate mefoé a bekalate befe. Kalate wua ya été a ne jôé dene na Nkume mmombô a bete a yôtan Éjôé Yéhôva.

Môte wua ya été a mbe jôé na Charles Russell. Akusa bo na Russell nye a nga too ntebe ôsu ya ésaé ya ye’ele bôte Kalate Zambe, a too fe nyô a nga taté tili kalate mefoé Nkume mmombô a bete, a nji té mfefé ñyebe. Nsôñane Russell a Beyé’é mejô me Zambe bevok (nne be mbe be lo’one be nalé) ô nga too na be miase miñye’elane mi Yésus a tôñ éve’ela ya akônda bekristene ya ntete mimbu ôsusua. Amu Yésus émien nnye a nga té ñyebe wo tôñe Krist, ajô te bia yene na Yésus nnye a ne nlô ya ñyebe wongan.—Becolossien 1:18-20.